مجموعة من القصائد المكتوبة لمسلم بن عقيل عليه السلام
القصيدة الاولى
گـصـد للـكـوفـة وتـلگـه حـشـودها ... ضـنـه أهـل الغـدر تـوفي وعـودها
گـصـد للكـوفة ويعـرفونه الـسفـير
من ابن خير الرسل راعي الضمير
ما عـرف مسلم بكـوفانه شـيـصير
تـرعه هـذه الناس حگ أعهـودها
وگـف گال حسيـن جــاب الـعـايـلـة
رايـــد الــديـــن بـدمــــاه يـعـــدلــة
الـيـنـصـره ينـول أعــظـم مـنــزلـة
والـيخـونـه بـصـقـر وي طاغوتها
جاوبـوه أويـاك كلنه أعله الحتوف
ننصر الاسـلام فـي وادي الطفـوف
بلحظة غدرت بيه كل ذيج الالـوف
وصفـر صار الـعـدد مـن معـدودها
وحـده مسلم صـار بالكـوفة غـريـب
لا صـديــق ولا قــريـب ولا حـبـيـب
بس مرة النصرته المسلم يا عجيب
وطــوعه بــس الطاعـت لمعـبودها
مثل عـمه اللـيـث صال بـصـارمــه
ولـو حـمل يـنـدب يحـماي الـحـمـه
سـطـر أبـتـاره اشـــرف مـلـحــمـه
ودفـتر الاسلام يـروي شـهـودهــا
ضحه لـجـل الـديـن مسلـم بالـعـمـر
وكحـل اجـروحة بنياشـين الصـبــر
چـالشمس مسلم تعاله أعله الگصر
وبيـن الـثـورة وشـنو مگـصودها
المهندس
كـرار عـزيز
القصيدة الثانية
غيــر مسلـم قـائــد إحنـه ما نــريـــد
كريم الحاج فليح
ونسإلكم الدعاء
الحَـذَر يـا مسلم إمنهل العراق *** مثــل مـا طَبــروا علـي إيطَبـرونـك
ـــــــــــــــــــ
يـا سَفيــر ويــا إبــن عـــــم الحُســين
بيــن إهـل الكـوفـه طحـت الغادريــن
لا إلـك ضل نـاصر ولا ضـل معيــن
وبيـن لـيـلـه والضحـى يغـدرونــك
ـــــــــــــــــ
لا حُكـم سفيــان ﮔـالــوا لا يَـــزيــــد
غيــر مسلـم قـائــد إحنـه ما نــريـــد
تـالـي عـافـوك إبشــوارعهــم وحيـد
إوحيــد مـا بيـن العـده يخلـونـــك
ــــــــــــــــــ
ﮔـالـوا إنـت السَيِّـد وإحنــه العَبيـــــد
بـالإهــل نفــديــك مسلــم والــوريــد
موقف إهـل الكوفـه موقف مو جـديـد
بساعــة الجـِـد هُمــه يخـونـونـك
ـــــــــــــــــــ
بسـاعـة الجــد كلمـن الـراسـه يضـم
مـا يـريـــدون النـزاهـــه بــالحكــــم
تعلمــوا عـالجــور والله والظلــــــــم
شلــون إلهــم حـاكـم يـريـدونــك
ـــــــــــــــــــ
نـاس عـاشـت عالدجل بس والخـِـدَع
ودينهــم دينـــارهـــم آ يـالطمــــــع
الهالسبـب ديــن الله والهادي إنصـدع
وبـالـدراهـم للعــده إيبيعـونــــك
ــــــــــــــــــ
طـوعـه بس طوعـه الـذي ما خذلتك
حيــن شـافتــك وحيـــد إبغــربتـــك
بـدارهـا إبعــزه وكـرامـه ضيفتــــك
تـدري للمـوت العـده يطلبـونـــك
ــــــــــــــــــ
طوعه سمعت صوت هالخيول وصهيـل
صـاحـت إﮔـعـد والـدمـع مـن دم يسيـــل
هــاك سيفــك يـالبطــل يـا بــــن عقيـــل
خـل يحـز إرﮔـابهـم مسنـونــــك
ـــــــــــــــــــــ
خـل يحـز هـالسيـف رﮔبـة كــل نَــذل
إتفَـــزِّعــه ودمـــوم دمعتهـــا تهــــــل
يـالـي إصلــك طيـب وطيــب النســـل
يالـي تجـدح غيـرتـك بعيـونـك
ـــــــــــــــــــ
يـالخـــذت منهـــم مـآخــذ بـالقتــــال
وجنـدلـت فـرسـانهـا وذيــﭻ الـرجـال
علـيـك ينتصـرون لا هـــذا مُحـــــال
إلا بشبـاﭺ الغــدر يـرمـونــك
ـــــــــــــــــــ
بـالغــدر ﮔـدروا علـيـك وﭼَـتفــــوك
تنـذنــح فـوﮒ القصـر مـا إنصفـوك
وتالي من إعــلا القصر مسلم رموك
وإنــتَ متهـاب القتـل يِّـدرونـك
ــــــــــــــــــــــ
وا ويـــلا وا مسلــمــا وا ويــــلا وا مسلــمــا
قد تحتاج المواضيع التاليه
القصيدة الثالثة
روحي إلك ملهوفه === ياغريب الكوفـــــه
ـــــــــــــــــــــــــــــــــــــــــــ
ياسفير إحسين راح الحاربك وأذنابه
وإرتقيت إنتَ المجد يامسلم إبأبوابه
يگصد الزاير إلك لو هم علاه إو صابه
ينكشف همـّه إو يرد يخبر عليك أحبابه
مرقدك مـَيـْعوفه === ياغريب الكوفـــــه
ـــــ
ياسفير إحسين بالكوفه تشع أنوارك
تگصد الناس المضيفك تفرح إبخطـّارك
تاخذ الحاجات منـّك ياشهم زوّارك
وين إبن إزياد يگعد ينظرلها الدارك
دارك الموصوفه === ياغريب الكوفـــــه
ــــ
ياسفير إحسين ما ظل أي أثر لعداءك
وإنتَ عاشت خالده نسمع صداها لاءك
من صحت لا ما أذل للشر بگت أضواءك
مثلك إبدرب المجد ساروا عــِلـَوْا أبناءك
ما تـُمرهم خوفه === ياغريب الكوفـــــه
ـــ
ياسفير إحسين دمعات الحزن نجريها
بنتك الطيبه حميده لازم إنواسيها
ياحبيب إحسين فگدك سيدي عاميها
غدرتك كوفان تايه بالدروب البيها
بالغدر معروفه === ياغريب الكوفـــــه
ـــــ
ياسفير إحسين بس طوعه شفتها إتوالي
نصرتك يبن المعالي حظها صار العالي
وإنتَ زودك من علي الكرار ذاك الوالي
ريت يمــّك وأنــْصــُرك وأحظه إبشهاده تالي
وأحظه بــَحـْسـَن شوفه === ياغريب الكوفـــــه
ــــــ
ياسفير إحسين يا أول شهيد إو ثاير
وحدك إبنص الغدر ياسيدي إبلا ناصر
ما خفتهم قاتلتهم بالمصيبه صابر
لكن الشر بالغدر والحيله صار الداير
غايته مكشوفه === ياغريب الكوفـــــه
ــــــــــــــــــــــــــــــــــــــــــــــــــ ــــــــــــــــــــــــــــــــــــــ
مع تحيات شاعر اهل البيت / جابر النجفي
القصيدة الرابعة
خادم اهل البيت عليهم السلام عمار العيساوي
مسلم تعنه ابلا وجل .......للكوفه وبهيبه وصل
كلهم يالموالين ....آنه سفير حسين
--------------------------------------------
ابزود وفخر للكوفه طب جمّعهم وبيهم خطب
للبيعه منهو اللي رغب آنــه سفير ابــن النبي
كـالوله نــنــطر جــيـتـه وكـلـنــه كتبنه البيعته
واقـبـلنـه حكـمــه ودولتـه حسين وسليل الطالبي
بات الامر عله هالوضع....... لاجنه اصبح منخدع
نكروا حكوك الدين ....آنه سفير حسين
------------------------------------------
عن مسلم الناس اجفلت وعالبيعه كلها انخلفت
نار المسه اضحت خفت والوحّده مـسـلـم بــكَــه
وحده بكّه ابديرة غرب ما يندل امنين الدرب
خايف عله حسين الكلب خاف المنيه اتسابكَه
تعبان والليل ادهمه ومستعره ناره من الضمه
وذبّل سواد العين آنه سفير حسين
--------------------------------------------
صد حرمه ناداها ابخجل من العطش كلبي ذبل
تــرويــه وتــكله العـجـل حرمه آنه يبني و وحّدي
كالتله ارحــــل لا تــظـل كلها غــريب ابــلا اهــل
كالتله والمــدمــع هــمـل جـــا ويــن اهلك يــولــدي
كال الها عمي حيدره صنديد فارس قسوره
اهلي تره الطيبين آنه سفير حسين
----------------------------------------------
كالتله هالليل انــتـشــر ابيتي تأمن امن الخطر
لا يسمع ابني بهالخبر ويــبـلـغ اجـنــود الكـفـر
من رد ابن طوعه وسمع مسلم وسط داره ! فِزع
كَبل الفجر يركض طلع وللطاغي وصّل هالامر
من الصبح جاب العده ومسلم حسامه ايجنده
ويذكّره ابصفين آنه سفير حسين
---------------------------------------------
لمّن فزع ذاك العدد وابّـباب طوعه من احتشد
مسلم طلع مثل الاسد يا رب ينادي ويا علي
كل ظربه يا حيدر هتف خله الاعادي ترتجف
سيفه اليمينه اصبح ولف وبسيفه كل هم ينجلي
مسلم سحك ذاك العدد سيفه مثل برق ورعد
ناده المفر لا وين آنه سفير حسين
--------------------------------------------
من عمه وارث يمنته وعزم الحسين ابيسرته
جنه الكفيل ابــهــمــتــه هد عالاعادي وما جفل
زلزال ظربة ساعده ما تكدر اتصده العده
ترمي سهام اهل الرده جيم حد الحده وصل
كال الهم السيف ابيَدي ما يوصل الحدي ردي
اضرب يسار ايمين آنه سفير حسين
-------------------------------------------
كمنوله اهل الحاطمه وبجثته جم سهم ارتمه
اهل الجهاله الاثــمــه التفوا عليه من كل كتر
بقصر الاماره من ورَد وصه لابن عمه يرد
وخان الوصيه ابن سعد والسر يكتمه ما كدر
من ابن مرجانه الامر يرموه من فوك القصر
القصيدة الخامسة
مسلم ابكل عزمه..چنه حيدر عمه
يحچي عنه خصمه.. سوّه العجايب
***
خلد ابصفحة وفائه. .كل معاني للشيم
وانطى معنى للتفاني. .وارتفع بسمه العلم
وزلزل الكوفه واهلها ..ابصوت يدوي للقمم
آنه ياللي تجهلوني. .مسلم وراعي ذمَم
سمعته المرتابه .. خافت امن اخطابه
چنه وسط الغابه .. سوّه العجايب
***
حيّته طوعه المصونه..تظل يامسلم فخر
كلها ازلام الرذيله.. كَسَرِت إلهم ظهر
ابسفيك اليگرب تشطره..ياخلف فارس مضر
واللي يتحدى تفركه.. بالجدم ماله مفر
من مثل صولاته.. ماهر ابلعباته
والعدو مافاته.. سوّه العجايب
***
كفو خلاها شتايت .. اجيوش اميه بالقتال
وخايب اللي يضد مسلم.. ماعرف شنهو النزال
نظره بس منه تِفتت..ألصخور اويه الجبال
چنه حيدر في حروبه..ويشبهه ابكل الفِعال
سيف لمن ساله ..دمر الخيّاله
والنعم بفعاله..سوّه العجايب
***
گِلَب عاليها وطيّه.. وانفجر نار الرعُب
وارسل اعليهم عذابه.. عن بعُد لاعن قُرُب
عميه صارت هالاعادي..ماتدل وين الدرُب
وانصبغ دمهم قذاره..والـ يفر يلگه الضرُب
أيده سبحانه. .يطمس ابعدوانه
اوماطفت نيرانه.. سوّه العجايب
***
ندعي ربنا ابجاه مسلم..يكفي عنا اهل الحقد
ويحفظ النا هالمجالس.. لنها عزنا والمجد
وبيها صارت تربيتنا.. بيد وحده نعتمد
اشما يفجرونا النواصب..بسم مهدينا نرد
في أمانة فاطم ..ومن دعاء القائم
هوّه دايم دايم..سوّه العجايب
***
عادل العبد الله
القصيدة السادسة
اعتنيت انه أبدمعتي الثم أعتابك
ثالــث باب للحاجه يظل بابــك
***
ثالث بـــاب انته الــدومه يتّوصّف
للويـاه زمــــانه بيوم مـــا انصـف
لبابـك سيدي المحتاج مـــد الچف
ثالث باب انته ابحسره أدگ بـابك
***
ثالــث بــاب اجيت أبحــسره أدگـنه
وچــف العــوز يمــك انــه أمــــدنه
ودمــع عيني بضريحـــك أرد اكتنه
وانتـــه الما تـــرد يــا مسلم أحبابك
***
طبعك مـــا تـــرد عنــاي للحضــره
جاب أهمومه كلهن وانته بيه أدره
مـــد اچفوفـــه ألك يمناه واليسره
يـــا مسلم تـــرده حاشـه طـــلابّك
***
طـّلابِـك تـــرده لا وحـــــگ حيــدر
يـــا بحــر المكارم كل وكت يــزخـر
يديــوان الكـــرم واليعتنــيه ينَســـر
اعتنيتك يـا بحــر ويفيــض خنيابك
***
بحر ويفيض جــودك للگصد حاير
يطوفان الحـــوائج مــــا تـرد زاير
يا أول فـــدائي المثلـه مــــا صاير
يسعر بالضماير سيدي مصــــابك
***
يسعــر بالضمـــاير والله لــــّوَعّهه
مّـــن اذكـــر حميده وسيل مدمعهه
طفلـــه ورادتك بس لــــو تودعهه
ما تدري دمـــاك الصارت اخضابك
***
انه ابدمعة حميده اقسم اظل خــادم
شما جـار الزمان شما صبــح ظالم
الك بالعشره يـــا مسلم أظـل باصم
أظل خـــادم ألك لا والله لتــــــرابك
****
الشاعر
موسى البديري
تم بعون الله مجموعة قصائد مكتوبة لمسلم بن عقيل عليه السلام
موقع المنبر الحسيني
مصدر القصائد مؤسسة منبريون
لاتنسو الفاتحة الى روح مولاي مسلم بن عقيل عليه السلام
كلمات دلالية
السلام على مسلم بن عقيل بن أبي طالب سفير الحسين عليه السلام غريب كوفان.
ردحذف