القصيدة الاولى
حيل تعبتك يكلبي وياهم
راح اموتن من كثر فركاهم
عيني عله الباب // واترجه الاحباب
**************
بدمعي اخط كمت المسافه واذرع بشوكي الدرب
ذابت اشموع انتظاري وفرحتي انباكت غصب
يازمن ليش الاحبهم راحو الديرت غرب
هاجرو وبعدو عني وضلت ادموعي تصب
ليش المفارك اعز احبابه
تكثر اجروحه ويهيج اصوابه
عذبني الغياب // واترجه الاحباب
************
انه يا كلبي العليله الفرفحت مثل الحمام
جنت اعوفن حضن امي وبحضن زينب انام
فوك خدي انتفض دمعي اوسوت اشواكي اعتصام
وفاضت بروحي المشاعر واعجزت عن الكلام
هاي ما جانت يكلبي ابالي
ينذبح حلمي وتخيب آمالي
شيفيد العتاب // واترجه الاحباب
*************
اهلي عافوني وحيده وانطر اضعون السفر
جان كل ضني يجوني وللاسف محد حضر
فاركوني اعزاز كلبي وشاب راسي امن القهر
نار المصايب جوتني ودمعتي راحت هدر
وين ابوي الجان يتلكاني
ليش راح وانتضر خلاني
متصوبه اصواب // واترجه الاحباب
*************
افرشت سجادت صلاتي وحاله جانت حالتي
وندعيت الله بحنيني وكامت تصب دمعتي
جم حلم ميت لكيته اباب عتبت صفنتي
اشلون انام اليل مدري والله حيره حيرتي
جني بالدنيه فلا موجوده
العدها ابو ثاري صدك محسوده
ضل دمعي سجاب // واترجه الاحباب
**************
اصبحت دار اهلي وحشه وخيم اعليها الحزن
وضهري من كثر المصايب انحنه مثل الغصن
من مشو ماتت ضحكتي وما غمض لحضه الجفن
ليش المفارك حبيبه براحه يشعر من يون
انه من الدنيه خوفي اعليهم
بروحي لو بيدي يصح اشريهم
عافوني الاطياب // واترجه الاحباب
*************
اشتهي كلمت تعالو كمت من كد ما الح
غصت اعيوني بصورهم والجرح خلف جرح
شوغت المخنوك تكتل مثل طير بلا جنح
كون اشمهم هوه اعذيبي واشبك بشوكي الصبح
اهلي بديار الغرب خلوني
ليش كلولي نجي وما جوني
ولا ودو اكتاب // واترجه الاحباب
************
تمت
تحسين الخفاجي
جميع قصائد فاطمة العليلة عليها السلام هنا
القصيدة
الثانية
ياللّي ناوي عالرحيل .. تره أصبر مستحيل
تره أصبر مستحيل .. ياللّي ناوي عالرحيل
غيبتك بويه طويله
وفاطمه بنتك عليله
ياللّي ناوي عالرحيل
****************************
اعيوني تنظر .. عالمحامل .. صار واقـع يعنـي راح انـتم تبعدون
كل اخوْتي .. ركبتهم .. بويه فرحــانين احسهــم مـن يرِكبون
يا رقيه .. يا سكينه .. اتصيح يالله استعجلن خل تمشي الضعون
وآنه يمّك .. ما صحتلي .. وما گلتلي بويه گومي اويه اليروحون
گتلي ضلّي لا تجين .. تره باچر تنسبين
تره باچر تنسبين .. گتلي ضلّي لا تجين
بويه خذني وهمّي شيله
وفاطـمه بنتــك عليـله
ياللّي ناوي عالرحيل
****************************
ترضه انته .. أبقه وحدي .. اوياك اخذني ولا يضل بالك عليّه
بابا بابا .. يا حياتي .. شلون اضل وحدي منو اليـعتني بيّه
آنه اريدك .. تبقه يمّي .. اتخفـف آلامي لَمَـن تـلزم ايديّه
واذا ناوي .. عنّي ترحل .. عاد خلّي يمّي بـسّ اختي رقيّه
حتّه من نحلم نموت .. آنه ويّاها ابسكوت
آنه ويّاها ابسكوت .. حتّه من نحلم نموت
إلدّمع لَمـّن تسـيله
وفاطمه بنتك عليله
ياللّي ناوي عالرحيل
****************************
ابحيره أبقه .. لو عفتني .. تدري بَعدك والله ما يرحم زماني
اشراح اجاوب .. لليناشد .. اشلون اگلّه والدي راح ونساني
اوياك اخذني .. وما أگلّك .. بويه بالمحمل أريد آنه مكاني
لا تـبالي .. بويه أمشي .. على رجـليّه المهـم ويّاكم آني
بويه درب الطف بعيد .. وعالمشي اتعوّد أريد
عالمشي اتعوّد أريد .. بويه درب الطف بعيد
والسبي يصعب رحيله
وفاطمه بنتك عليله
ياللّي ناوي عالرحيل
****************************
بويه خذني .. اوياك اهاجر .. بهالسفر آنه أحس كل نايباتي
الطف أشوفه .. بي مِنايه .. الهاسبب ويّاك اريد آنه مماتي
عـالوطـيّه .. منّ اشـوفك .. امسلّبه اثيابك أغطّيك ابعباتي
واليذِبْحك .. بويه ريته .. اوياك يذبحني واخلّص من حياتي
عمري ريته لا يطول .. خل يسحكني الخيول
خل يسِحْگنّي الخيول .. عمري ريته لا يطول
العيشه بعدك مستحيله
وفاطـمه بنـتك عـليله
ياللّي ناوي عالرحيل
****************************
عمري ريته .. بويـه بعدك .. ينتهي هذا العمر لا ما أريده
أدعي ربـي .. يا إللـهي .. اخذ روحي ولا أضل آنه وحيده
اشگد احبّك .. وانته تدري .. شلون عنّي اتروح هالرحله البعيده
اشراح انادي .. بويه شحچي .. راح الوم ابگلبي واللّوم اشيفيده
بعد ماعوف الأنين .. ابگلبي تدري اشگد حنين
ابگلبي تدري اشگد حنين .. بعد ماعوف الأنين
تره ما أملك وسيله
وفاطمه بنتك عليله
ياللّي ناوي عالرحيل
-----------------------
تمت والحمد لله
حيدر تركي الكربلائي
القصيدة الثالثة
(بأمكانكم رفع الـ .. (آه) .. من المستهل)
حوار العليله وأم البنين ع
.
آه .. والــدي مـاگـالــچ يـــم الـبــنــين
آه .. يمـته يرجـع تـره أذانـي الحنـين
ذبـت مـثـل الـشـمع
وحرگ خدي الدمع
علــيــله .. علــيــله
____________________
الخاطر الله احچيلي . امـروتـچ گوليـلي
اعلـيه لتظمين كلشي
شفته لمن صاحلچ . شو بچيتي اشگالچ
ادري سره چان يفشي
امبـينه مامــرتاحـه . گاظـيتـها انـياحــه
مـن اهـد ماراد يمشي
خايـفه اتخبـريـني . حــتى مـاتـاذيــني
والدمع ميـأذي رمشي
آه .. من اسئلـچ ليش دمعاتـچ تزود
آه .. هــوه بـس لاگــالــچ لا مـايـعود
احـس ابهـالــوضـع
وحرگ خدي الدمع
علــيــله .. علــيــله
____________________
راسـي لمـن بـاسه . ردت ابوسه ابراسه
وخفت من دمعات العيون
ابخـده لا تــتبـده . ومثـلي تجــرح خده
اعلــيه لا واللــه مـــيهــون
انشده فكري وبالي . وماســئلت الغــالي
يــمـــته يـابـويــه تـــردون
اوياه حرت شتكلم . چان حيلي امهدم
من شفت مشدوده الظعون
آه .. من مشه حسيت عندي اچم سؤال
آه .. صحـت لـكـن مــاسـمع كـلمـة تـعال
ابدليــلي المنــگطع
وحرگ خدي الدمع
علــيــله .. علــيــله
____________________
لشـوكـت اتــنـطـر . وجاي احسه اتأخـر
انتي هم مثلي تحسين
بالله شنهو احساسچ . وشيدور ابراسچ
ابـيا أمـر هسه تفكرين
انـتانـي لـو منـتاني . سـالم ايـــرد ثــاني
شـنو رأيچ وشتگولين
گومي خن صَـليلـه . وبالــفــرج ندعــيله
انه أمـن وانتي تدعين
أه .. منه بلكت يستجاب الله الدعاء
أه .. ويـرد سالم والـدي مـن كـربلاء
الأمــل مـاينـگــطع
وحرگ خدي الدمع
علــيــله .. علــيــله
____________________
نار احسها ابعيني . وكل وكت تچويني
جاي اعيش انه المنيه
لــو رجـع يحـيّنـي . وعـافــيه ينـطـيني
وماتـضل كل علـه بـيه
الــجــَيته خلـيـنــه . نـنـتـظــر گـومـينـه
عـلــى درب الغـاظـريه
شو اشوفچ گاعده . ابجيته مامتواعده
گـولـي اوحـنـي عـليه
آه .. جاي احس عندچ خبر يمكـن اكيد
آه .. خـوفي لا والــدي محـزوز الــوريد
الگــلب شـو مقـتنع
وحرگ خدي الدمع
علــيــله .. علــيــله
____________________
اشلون اظل ابحيره . وانه طفله ازغيره
اعليه احس صعبه الليالي
ألتـهي بـجـروحـي . وبيش اَصبر روحي
وانـــه كلــشــي مابــقـالي
ابعــلــتي محــتاره . والـغــياب ونــــاره
هدلي حيلي وسگم حالي
باقــيه ذكــراهــم . مامــشت ويـــاهــم
ماتــفارگ لحـــظه بــــالي
آه .. راح اتاني وبلكـت الراحو يجون
آه .. گـبل ما مـن البچي تعمه العيون
ولـــو مــاكـو نــفــع
وحرگ خدي الدمع
علــيــله .. علــيــله
____________________
تمت والحمد لله
حيدر تركي الكربلائي
القصيدة الرابعة
بالدمع بالدمع بويه لا تخلوني
بالدمع بالدمع بويه تعمى عيوني
كلبي مايحمل هجر
بيه يبقى الهم يجر
يبقى ليلي بلا فجر
عايشه بأمالي
حمره بعيوني السمه
وأشعر بلايه حمه
والعليل يألمه
لو يفارك غالي
من بعدكم يا هلي
حزني ما ظن ينجلي
كل جرح يرجع إلي
ويلجم بدلالي
للسفر للسفر بويه فدوه خذوني
احسب أيام وأعد
يمته كل أهلي ترد
لعلك اشموع وورد
لو الي تردولي
ملت عيوني البجي
منهو يسمعلي حجي
ولا خبر منكم يجي
يا هلي تودولي
ذابت اشموع الصبر
ناري بالهم تستعر
أشيكضي ساعته العمر
وانتم تبعدولي
انهضم انهضم عنكم تبعدوني
روحي راحت راحله
تعلكت بالقافله
مشت ويه العائله
ترفرف على ظعونكم
داري وحشه بلا أهل
وإني مجتوفه بعلل
ريته وافاني الأجل
ولا أعيش بدونكم
أنظر الذاك المهد
كمت اصيحن يالولد
جنه ما يرجع بعد
تبقى بس اطيوفكم
ما أظن ما أظن بالسفر تنسوني
عيني مل منها الضوه
ما تمر نسمه هوى
انه والميت سوى
ما أحس بيامي
هم عليله وفاكده
والحزن بيه حده
هذا العليه سده
بازدياد الامي
أنظر بعيني صور
جن رمح شايل نحر
وحرم ما تندل مفر
ما عليها محامي
والخيم والخيم نارها بجفوني
صرت اشوفنه النهر
يمه مصيوب الكمر
صحته يا عمي بقهر
خيامكم حركوها
عمتي اشوفنها بعجل
تركض بلايه أمل
نادتك خويه الفحل
اعيالكم طشروها
أخ يا غيرة علي
وسفه زينب تنولي
صوتي ليكم يعتلي
صاحت وضروبها
والخدر والخدر من الخدر سلبوني
هذا حال مصيبتي
من بعد عين أخوتي
بيها صارت موتتي
من كثر اهاتي
بالكلب مات الصبر
يدوي بكتاره الجمر
تخيلت سوط الشمر
يضرب بعماتي
شاهدت راس وجسم
سحكته خيول وزلم
بيه كسرت جم عظم
ضاعفت وناتي
حسرتي حسرتي عنكم تخبروني
مهند الحسناوي
القصيدة
الخامسة
بس تعالو بلا طبيب العافيه ترجعلي واطيب لو اجيتو
شكد حلو ذاك الزمان حلوه لمتنه وامان يالمشيتو
* * *
ياعمر لحضاته عشناها سوه
رحتو عفتوني عليله بلادوه
بيتي اصبح بس ظلام مابي ضوه
اختنك بلا هوه ولاكلمه حلوه
ادري من صار الوداع كل حلم بانيته ضاع من رحلتو
شكد حلو ذاك الزمان حلوه لمتنه وامان يالمشيتو
* * *
هلله هلله من شملنه جان مجموع
جمعة احباب وتسولف اعله موضوع
ابيتي اشوفنكم جنت مثل الشموع
انطفيتو فجئه وفجئه سالت ادموع
صدمة صارت وانتظار وكلبي جمره وكلها نار يالهجرتو
راحت ايام الحنان حلوه لمتنه وامان يالمشيتو
* * *
راح اكولن كلمة وانتبهو عليه
كل مرض ايطيب لو مريتو بيه
الطبيب وصفلي شوفتكم اليه
كال شوفتهم تنقذج من منيه
يالمشيتو لكربلاء هيه شوفتكم دواء ماعرفتو
دمعي يجري بكل أذآن حلوه لمتنه وامان يالمشيتو
* * *
بويه يالتارس جنت بيتي سوالف
يلله ردلي ولاتكلي بنتي اسف
بالمنام كلبي حلم موزين شايف
وكلبي ظل اعليك ياروحي خايف
بالحلم شفت غبار شفت زينب يمها نار ويمها انتو
حلو كلشي وياكم جان حلوه لمتنه وامان يالمشيتو
* * *
مااظم اعليك واحجي الي بيه
ماكو راحه من رحت بس الاذيه
اكعد ابابي واظل اذكر رقيه
انه وياها جنت نلعب سويه
عمري كله ذكريات بين الفارك واللي مات وانتو متو
نلتقي بذيج الجنان حلوه لمتنه وامان يالمشيتو
* * *
اركض اعله الباب من واحد يدكه
بلكت الوالد رجع وبروحي اشبكه
السفر لوطال مر معناها فركه
بالسفر كلبي دخيلك لاتحركه
طفله كلبي موجبير حته يعقوب يصير ياللي غبتو
اغيابكم صار امتحان حلوه لمتنه وامان يالمشيتو
* * *
#لخادم_اهل_البيت
#عماد_الساعدي_العسكري
القصيدة السادسة
ءءءءءءءءءءءءءءء
اصب دمعة بأثر دمعة..صبح كل العمر جمعة
انتظاري وندبة اعتابي
ونين بسهلة اغيابي
ءءءءءءءءءءءءءءءءءءءءءءءءءءءءءءءء
ييوسف عمري تانيتك..وكع عمري بقرار البير
عميت ولا قميصك لاح..حلم واحتاجك التفسير
افزن من يطول الليل..قوافل بالبراري اتسير
شفت وياهم ارقية..تلوح من بعد ليه
شفت وجه الكمر خابي....
ءءءءءءءءءءءءءءءءءءءءءءءءءءءءءءءء
افز بالليل اشوفنك..جسد واتسائل اعله الراس
انام وترجع الاحلام..تشيل امعاتب العباس
افز من المنام اردود..شجن يتنازف الأحساس
انامن واصحه يالغالي..صدك مو بالحلم تالي
فكدت احلامي واحبابي....
ءءءءءءءءءءءءءءءءءءءءءءءءءءءءءءءء
عليلة وكلبي المعلعل..غريب امحير وملهوف
زرعت الامنيات اشواك..نثرت اعله الدروب الشوف
بكثر ما جنت اظنك جاي..تمرني من الخيال اطيوف
تنيتك والكلب ضامي..لهيب وساري بعظامي
وصل لانظارك اكتابي...
ءءءءءءءءءءءءءءءءءءءءءءءءءءءءءءءء
كعدت اباب المعاتب..اشوف بكل كتر بيبان
شفتهه امفتحة وتنعاك..صور من حركة الصيوان
قوافل تنظرلهه الشام..عليل وزينب ورضعان
تنيتك ترجع ابشارة..فجعني الناعي باخباره
اعثرت رجليه بثيابي.....
ءءءءءءءءءءءءءءءءءءءءءءءءءءءءءءءء
تنوح ام البنين اوياي..تجيني ويم بشير اتروح
انوح من الهظم والدار..تجاوبني بهظيمة ونوح
صدك طاح الكمر عالكاع؟..وابوي اعله الترب مذبوح
تلاكت زينب وهيه..يقيمن يمي لطمية
الأماني انذبحت ابابي...
*^*^*^*^*^*^*^*^*^*^*^*^*^*
سيدحيدرالعوادي
القصيدة السابعة
براء العبيدي:
فاركوني أهلي ويه اعمامي هم الفاركوني
أي نسوني ماكو بس دمعه ومناحه من نسوني
روحي يمكم
يمته اشمكم. فاركوني
______________________________
بس مصايب كلبي ذياب من جفاهم
روحي تلبد دمعي يولد من وراهم
يمته اشمهم انه بتهم ياهو أهم
كوشي ينقص حتا يرخص بس غلاهم
حالي صاير يبجي من يذكر هجركم حالي صاير
بلكي باجر يردد ويقنع سفركم بلكي باجر
وين ردكم
يمته اشمكم.فاركوني
___________________
اتمرني لحضه جنها سفره من هجركم
روحي تهوى منكم أروى من اشمكم
جني شمعه اضوي دمعه يم صوركم
الدنيه تعبر وإني اصبر يا سفركم
يله رجعو عمري مايحمل سفركم يله رجعو
وين انتو ليش ما جبتوني يمكم وين انتو
انه بتكم
يمته اشمكم.فاركوني
____________________
شوفوا حالي وي خيالي احجي دهري
عمري زهره يكضي جمره وين عمري
دهري مثلي يبجي لهلي ويه سهري
اكضي عبره ماكو فرحه وإني ادري
ليش اني ليش ماخذتوني يمكم ليش اني
شوفوا حالي يسهر وينحب عليكم شوفو حالي
مالي عنكم
يمته اشمكم.فاركوني
_____________________
مالي غيرك بويه وينك بويه فد ردو إليه
من مشيتو ولا اجيتو والله محد مر عليه
الشهكه تجرح الفركه تذبح وإني ما احمل أذيه
وين عمتي يمها اختي والله مشتاكه الرقيه
عيني تشكي دمعي اذاها عليكم عيني تشكي
وين امشي ماكو من يوصني يمكم وين امشي
اني منكم
يمته اشمكم.فاركوني
_____________________
منهو جايب منل حبايب الي فرحه
وبذكرهم بس صورهم عندي ذكره
جرحي يبجي مني يشكي فركه غبره
ويا جرحكم بس ذكركم ايمرني جمره
كله منكم جرحي وي دمعي يونن كله منكم
وبذكرهم اخفه عل باب وانطر وبذكركم
بس جرحكم
يمته اشمكم
______________________________
عن العليله
براء العبيدي
القصيدة الثامنة
براء العبيدي:
طول سفرهم..منهو اليردهم..اتخرو عليه اتخرو عليه
ابجي وانوحن..المن اروحن..اتخرو عليه اتخرو عليه
______________
ابجي من راحو عليهم شوكي ذياب
وكلبي من راحو رماني علا المصايب
هما من راحوا احسن دمعي شايب
ابكل صباحية انتضرهم للحبايب
انطر يجوني..بس لا نسوني..اتخرو عليه..اتخرو عليه
ابجي ابذكرهم..من وادعتهم..اتخرو عليه..اتخرو عليه
_________________
جنت انام ابحضن ابوي اغفه علا صدره
هسا انام علا التراب افراكه جمره
بويه مرني وشوف حالي ولو مره
انته من رحت النفس خانكته عبره
يابويه ردلي..ريحلي دهري..اتخرو عليه اتخرو عليه
ابجي ابجفاكم..شنهو الوراكم..اتخرو عليه اتخرو عليه
__________________
ردو إليه كافي بس ريحولي بالي
انتو من رحتو الكلب منكم شكالي
ايكلي فدوا حسي بيه وشوفي حالي
وإني اكله منهو حس من الغوالي
الحسره تكتل..كلبي اليراتل..اتخرو عليه اتخرو عليه
بلكت يجوني..بس لا نسوني..اتخرو عليه اتخرو عليه
__________________
كلبي يسۓني علا اختي ابكل مسيه
روحي مشتاكه الحنان اختي رقيه
بويه رد لي فدوى أحلفك بزجيه
امي مشتاكتلي ما سئلت عليه
منهو البكالي.انتو الغوالي.اتخرو عليه.اتخرو عليه
وبكل مسيه.ابجي الرقيه.اتخرو عليه.اتخرو عليه
_________________
أنه وم عباس ننحب عل غوالي
وليلنه ابدمعه يمر غير اليالي
جن خيام ونار يتروا علا بالي
بيها سكنه اصيح ياهو الي صفالي
هذا الاحسه.مسبيه هسه.اتخرو عليه.اتخرو عليه
أتمنى اشمهم.وندل دربهم.اتخرو عليه.اتخرو عليه
__________________
عن فاطمه العليله
#براء العبيدي
القصيدة
التاسعة
خادم الزهراء(ع)علي حسن المنصوري]
#وداعاً_يالعليلة
وداعاً يالعليلة وداعاً يالعليلة
يبوية وياكم إخذوني**تره الفرگة تأذيني
عليله وأكسر الخاطر **يبوية لا تخليني
-----------------------------------
هلي گاموا يودعوني& وعليّه يصعب جفاهم
واذا راحوا هلي عني& تروح الروح وياهم
العمر شيفيد لو راحوا& ولايسوه بليّاهم
عله الباب أبقى مهضومه&وتصب الدمع عيني
-----------------------------------
توضّت بالحزن روحي& ودمعي إعله الوجن صلّه
لأن محد أجه وگلي& جهزي للسفر يلّه
رقية راح أفارگها& وأفارگ حته عبدالله
المصايب لو مشوا عني& تصبحني وتمسيني
-----------------------------------
مشه ظعن الأهل عني& وأحسّه أبعد إعليه
وعنهم ما شلت عيني& ولهسه تأشر إيديه
راح أبقى أتانيهم& بلكت للظعن جيه
بقت بالبيت ذكرتهم& وصورهم تحاچيني
-----------------------------------
أسولف إلمن جروحي& وكل أهلي مشوا عني
تغمض جفوني عالدمعات& وأفز بحسرتي إووني
إعله باب الدار أتانيهم& والدمعات أذّني
أتاني رجعة الغياب& حته يگطع ونيني
-----------------------------------
أباوع للدرب هلبت& ظعن أحبابي يرجعلي
وأسئل كل شخص يجبل& ما شفت الأهل گلي
بيه حسين وبي عباس& تره معروف ظعن أهلي
الهجر أذاني ياهالناس& وأحسها ذبلت سنيني
-----------------------------------
شكثر أفرح اذا رجعوا& ودموعي راح أعوفنهن
وتِسَّلم روحي إعليهم& وخواتي أشبگنهن
وأشبگه حيل أبوي حسين& وچفوفه أبوسنهن
وأحسهم ما يردولي& ويظل النوح لحسيني
-----------------------------------
#علي_حسن_المنصوري
القصيدة
العاشرة
خادم الزهراء(ع)علي حسن المنصوري]
#عتاب_العليلة
عافوني أهلي لوحدي يالماعفتني
تمنيت أنه گبل السفر كون تركتني
ها يالمرض يالمن هلي إنته حرمتني
فارگونــــــــــــــي
####################
ها يامرض يالسهّرتني شگد ليالي
آنه زغيره وانته متحن اعله حالي
يلي إتركتني عليله وأبچي عله الغوالي
العمر مايسوه بعد والبيت خالي
جرح الاهل كلش صعب شيفيد اداوي
وخالي صفه البيت اللي چان بأهلي ضاوي
يالعاشرتني وبعشرتك عذبتني
فارگونــــــــــــــي
####################
وي جسمي صارت عشرتك كلش طويله
چا ماعفتني من نوه الغالي برحيله
هسه آنه أمشي إويه الظعن لوما عليله
ولاوحدي بالبيت وبقه دمعي مسيله
تفارگني ردتك من إجه محبوبي يمي
بس يا حسافه شاهدك اذّيت جسمي
ها يامرض عن الحبيب انته بعدتني
فارگونــــــــــــــي
####################
سار الظعن وأتطشرن كل ذكرياتي
وإنكسر گلبي من يأشرلّي خواتي
بچفوفهن سلمن عَلَيْ سلوة حياتي
وعالباب آنه وأمسح دموعي بعباتي
راحوا اعزازي وما رحت وسكنت ليلي
ها يامرض ومن الزغر هدّمت حيلي
ولحسين أصب دمعي بألم إنته ردتني
فارگونــــــــــــــي
####################
يلّي بقيت وتدري فارگني طبيبي
راحوا هلي ومن دنيتي انته نصيبي
يامرض اذكر چان يصلي هنا حبيبي
أنحب لچن ما يرجع حسين بنحيبي
إهنانه چان يصلي لو حلّت صلاته
وحسين چان يدلل شگد إبناته
ومن الحبيب ومن دلاله ضيعتني
فارگونــــــــــــوني
####################
چانت تنسيني الألم إختي رقيه
لو سولفت وياها من نگعد سويه
وعبدالله أحسن ضحكته عنّت عليه
وشكثر مشتاگة أشيلنّه بديــــــــه
البيت خالي يا مرض ويزيد همّي
مشتاگة أشوف الاكبر وعباس عمّي
لوّعني فگد أحبابي وإنته لوّعتني
فارگونــــــــــــوني
####################
يا مرض ريّحني وإخذ من عندي روحي
ولا أبقه أتعذب بعد ويزيد نوحي
إزغيره آنه وشيّبت بيه جروحي
يا وردة الهم بالحزن والنوح فوحي
يا مرض چنت أتصورك تتركني ارتاح
بس هس لا تتركني احس كل العمر راح
شلي بحياتي والمدامع مرمرتني
فارگونــــــــــــوني
####################
#علي_حسن_المنصوري
القصيدة
الحادية عشر
#جديد #محرم_الحرام
بس تعالو بلا طبيب العافيه ترجعلي واطيب لو اجيتو
شكد حلو ذاك الزمان حلوه لمتنه وامان يالمشيتو
* * *
ياعمر لحضاته عشناها سوه
رحتو عفتوني عليله بلادوه
بيتي اصبح بس ظلام مابي ضوه
اختنك بلا هوه ولاكلمه حلوه
ادري من صار الوداع كل حلم بانيته ضاع من رحلتو
شكد حلو ذاك الزمان حلوه لمتنه وامان يالمشيتو
* * *
هلله هلله من شملنه جان مجموع
جمعة احباب وتسولف اعله موضوع
ابيتي اشوفنكم جنت مثل الشموع
انطفيتو فجئه وفجئه سالت ادموع
صدمة صارت وانتظار وكلبي جمره وكلها نار يالهجرتو
راحت ايام الحنان حلوه لمتنه وامان يالمشيتو
* * *
راح اكولن كلمة وانتبهو عليه
كل مرض ايطيب لو مريتو بيه
الطبيب وصفلي شوفتكم اليه
كال شوفتهم تنقذج من منيه
يالمشيتو لكربلاء هيه شوفتكم دواء ماعرفتو
دمعي يجري بكل أذآن حلوه لمتنه وامان يالمشيتو
* * *
بويه يالتارس جنت بيتي سوالف
يلله ردلي ولاتكلي بنتي اسف
بالمنام كلبي حلم موزين شايف
وكلبي ظل اعليك ياروحي خايف
بالحلم شفت غبار شفت زينب يمها نار ويمها انتو
حلو كلشي وياكم جان حلوه لمتنه وامان يالمشيتو
* * *
مااظم اعليك واحجي الي بيه
ماكو راحه من رحت بس الاذيه
اكعد ابابي واظل اذكر رقيه
انه وياها جنت نلعب سويه
عمري كله ذكريات بين الفارك واللي مات وانتو متو
نلتقي بذيج الجنان حلوه لمتنه وامان يالمشيتو
* * *
اركض اعله الباب من واحد يدكه
بلكت الوالد رجع وبروحي اشبكه
السفر لوطال مر معناها فركه
بالسفر كلبي دخيلك لاتحركه
طفله كلبي موجبير حته يعقوب يصير ياللي غبتو
اغيابكم صار امتحان حلوه لمتنه وامان يالمشيتو
* * *
#لخادم_اهل_البيت
#عماد_الساعدي_العسكري
القصيدة
الثانية عشر
ليلة وحدة .. لوترد وأكعـــــــــد يبويه وياكم
ليلة وحدة .. حاولت بس ماكدرت أنساكم
بكل كتر صورة أشوف كبالي ... السهر أذاني وشــــل حالي
***********
من يجي الليـل الخلكَ تشـــعر براحـه
وأنه كلــبي يـهيـج من كثرت جراحـه
راح جف اليمســح الدمعـــة بسـماحة
ونور وجه يغمــر الليـــــل وصباحـه
وين نوره .. يزيح حزن الليل عن عيوني
وين نوره .. والله أيام البعـــد غيرت لوني
بنار مســــــــــتعرة بقه دلالي ... السهر أذاني وشــــل حالي
***********
أي أتانيهم وأظـــــل أربي لدربــهم
لان روحي مسودنه من كثر حبهم
نعجنت بطينتـهم وشربت عذبــهم
ما نسيت وحاشـــه ينســــاني كلبهم
همه روحي .. وكلشـــي بالدنيه أرخصه ليـهم
همه روحي .. عمري وردة أشتلها يم رجليهم
بيهم معلقه جميع أمالي ... السهر أذاني وشــــل حالي
***********
ما أمل لو تذبل مـن السهر عيني
أنتظـــــر بلكي خــــبر منــهم يجيني
صـدك أذاني البعـــد وأكــــثر ونيني
بين همي والصـــبر خلصت سنيني
والليالي .. زودت بغيابـهم نوحـــي وعذابي
والليالي .. راحت وماينفع الشكوى وعتابي
صور خواتي ماتفارق بالي ... السهر أذاني وشــــل حالي
***********
بالغرف أمشــي ودور أكضي يومي
همه نبض الكَلب يســرون بدمومي
عايشين بيقضـــتي وأحــــــلام نومي
مكدره من الألم أمسي ومن همومي
ويادمعتي ..أطيح نجمات الســـــــماء العالية
ويادمعتي ..لان لجل حسين طاحت غالية
تهوى ويانوحي وحزن موالي ... السهر أذاني وشــــل حالي
***********
ردت أنسه والصــــور كـدامي تفتر
ويبنات افكاري أعيش وياهن أكثر
هسه من أذكر حجيهن أمشي وأعثر
والكلب نصين من الفركَـــــه منطر
يا خواتي .. ما ذكرتني ورجعتن من سفرجن
ياخواتي .. عايشه بين الهموم أنه وصورجن
وياهن أذكر ليالينه ودلالي... السهر أذاني وشــــل حالي
***********
وين الأكـــبر وين عمي أبو فاضل
دمع عيني من مسيله دموم نازل
كلبي راح ويأهلي يمشي بالمحامـل
الجسم من المصايب والله ناحل
بس مدامع .. خلو بعيني الأحـــــبه من جفوني
بس مدامع .. أجري طول غيابهم وعمي عيوني
مانشف دمعي على الوجنات هالي... السهر أذاني وشــــل حالي
***********
شاعر أهل البيت
الشيخ عبد الحسين المنصوري
القصيدة الثالثة عشر
العليله عليها السلام
ضعن احبابي شيردة**** علي شوطالت المدة
هلي البعدو **** ولا نشدو
علي شوطالت المدة
*********************************
احس ما ترجع احبابي ولا حتة يذكروني
ولا طارش يجي منهم ينشف دمعت عيوني
ولا مكتوب ودولي وبالصاير يخبروني
بكَيت محيرة الوحدي وي حسباتي وضنوني
بعدهم حالي اتردة **** ضعن احبابي شيردة
هلي البعدو **** ولا نشدو
علي شوطالت المدة
***************************************
مكاتيب بدمع عيني اكتبتهة الاهلي بالغربة
اسطر بيهة لوعاتي واشرح حالتي الصعبة
بيابي عيوني يالغياب تظل اعلة الدرب تربة
أناشدهم بأسم طه وكتابة وآية ألقربة
جرحهم ياهو اليضمدة **** ضعن احبابي شيردة
هلي البعدو *** ولا نشدو
علي شوطالت المدة
**********************************
جبال من الصخر يحباب تهاون من كثر وّني
كَلبي والضلع والعين خاون حسرتي وحزني
من ساعة مشيتو النوم تكاون يهلي وي جفني
وعلوم ألمنية أشباح كل ساعه يراوني
شدة تعاكَب بشدة ***** ضعن أحبابي شيردة
هلي ألبعدو **** ولا نشدو
علي شو طالت ألمدة
************************************
تشتت فكري وبعيني صور ظلت تجي وتروح
أعاين صورة ألاكبر دمّة أعلة ألارض مسفوح
وشوفن عمي ألعباس على جرف ألنهر مطروح
وصد ألعمتي ألحرة ما بين ألخيام تنوح
صبري ألكل صبرعدة****ضعن أحبابي شيردة
هلي ألبعدو****ولا نشدو
علي شو طالت ألمدة
****************************************
صورة أبالي يابويه تتردد نهار وليل
تجود بنفسك اتخيل ومن جسمك دماك تسيل
وعلى صدرك ينور العين اشوفن ساحكَات ألخيل
كَطعت ألظن يبوية وجن اشوفنه لفاني ألويل
ألمصايب يمي متحشدة****ضعن أحبابي شيردة
هلي ألبعدو ****ولانشدو
علي شو طالت ألمدة
***********************
ألمقصر/ وسام حسين ألساعدي
القصيدة الرابعة عشر
السلام عليك يا يافاطمة العليله بنت الحسين عليه_السلام
امودعين وراشد يهلي ابظعنكـــم
بس علي لا ينگطع طارش خبركم
اگـعـد علــــه الباب اتانـــــــــــي
وبلچـــــن ايردكـم زمانـــــــــــي
آنه العليله آنه العليله
*****
من تولّــم ظعن اهلهـه و للسفر عزم رحيلـه
هدّت ابعبره ابصدرهـه عنــد الوداع العليله
يا هلـي موحش نهـاري من يساعدني اعله ليلـه
انتظـــرطارش خبركم خافـن السفره طويلــــه
علتي منّ افراگكم اهون عليّــــــه
ولا اشوف ابيوتكم وحشه وخليه
دهـــــري دولبنــي ودهانــــــــي
وبلچــــن ايردكــم زمانــــــــــي
آنه العليله آنه العليله
*****
غفره بعيونـي المنازل يا هـلـي موحـش وطـنكـم
وتبچــي لبچاي المدينـه چي خلت يحبابي منكـم
وآنــه من باچر غريبه لـمـن ايـعاود ظعـنـكـــــــم
وحيرتي يهلي اشأجاوب سايل الينشدنـي عنكم
ياهلي وين ابگصد هلسفرتردون
بلسلامه الأمل چم يوم تعودون
وآنـــــه برجاكــــــم ترانـــــــي
بلچن ايردكــــــــم زمانــــــــي
آنه العليله آنه العليله
*****
غَرب الحـادي ابمسيره بلفله ايناوب حنينــــه
گـامـت اتنــوح العليـه وبچت اعـيون الـمدينه
وگـلب ابواليـمه سمعــه ردعـليـهه من الظعينه
گـلهه يحـبيبــه ابونينچ بـويه گـلبي اتگطعينه
مسح دمعتهه وطلب منهه ابتسامه
اتبـــسمـــتله ونـــادته ارشد بسلامه
وانه ضل اعلـــــــه الأمانـــــــي
بلـــچن ايـــردكـــــم زمانـــــــي
آنه العليله آنه العليله
*****
من توادع منهه ابوهــه مـن سكوت اليل سـمعـت
ام البنين ابـحـديهـــــــه من سواد الوادي رجعت
تـعـثر ابمـمشـاهــه ردت وبأثر دمعتهـــــــه وگعت
وصلت الدار الـعـليــلــه ومن دمعهه الشيله نگعت
اتگلهه ابوچ احسين وصاني ابخدمتچ
يـــلعليـــه ودمعـــتي فـــدوه الدمعتچ
وحــــن وياچ ابــحنانــــي
بلـچـن ايــردكــم زمانــي
آنه العليله آنه العليله
*****
آنـه ضلـيـت الخدمتـچ يلعليلـــــه انـتـي أدره
امرابوچ اعليه واجـب لوفديت اوجودي لمره
ابخدمتچ خلاني وانتي امرچ اشما گلتي يجره
وآنه كل همچ يـهـمني للدروب اعيوني تـبـره
اربـــع اولادي وبـــعد لوعندي ابنين
والله لويروحون الف فدوه لحسين
لـــو يرد سالـــم كفانـــي
بلچن ايردكــم زمانــــي
آنه العليله آنه العليله
*****
چنـي نادتـــهه الـعـلـيه اشلون ابره ويهده حالي
حي عمامي الچان زاهر اصبح امن احبابي خالي
يمه من هل سفرخوفي مـا يـرد عّـــزي ودلالي
خوفي عماتي وخواتي ابضــعـن ابلاعين والي
يمه حس گلبي من ابوي ابهل العلامه
مـــن مســح راسي مثل مسح اليتامه
مــن سمــع صـحـــتي واجـــالــــــي
بـــلــچـــن ايــــردكــــم زمـــانــــــي
آنه العليله آنه العليله
*****
#الشاعر_الکبیر_عزیز_الفیصلي
#اللهم_عجل_لوليك_الفرج
القصيدة الخامسة عشر
العليلة –ع-الى اليسد كريم دانه الاعرجي
ما نسيتك عايش بوجدانــي
ما نسيتك ادري ما تنسأني
بويه شو طال السفر انتظر من خبر
ادري ما تنسأني
-------------------------------------
بويه خطيت عله كلبي ياحبيبي
اسمك احفرته بحسرتي وبلهيبي
گلت ياشمس الفرح والبسمه غيبي
لان بس انته الدوه لعلتي وطبيبي
يالعفتني انتضر بحساسي
يالعفتني بويه چنك ناسي
شو گي لغيابك كثر أنتضر منك خبر
ادري ما تنسأني
*****************************
يلي حضنك چان الي حب وحنان
يمك اشعــــــــر يبو رقيه بالامان
چنت بويه الهيبتي وخدري الضمان
گمت احس بخوف خلاني الزمان
گلبي خايف ماترد لديارك
گلبي خايــــــــــــف ماتجيني اخبارك
چمر وبگلبي استعر أنتضر من خبر
ادري ما تنسأني
بويه احسب ليله ليله مانمتهــــــــــــن
اليالي سيوف صارلي شفتهــــــــــن
اوجرن وياي يابويه صبرتهـــــــــــن
خاف يخلص صبري بالدمعه سهرتهن
ليلي دمعه بايته باجفاني
ليلي دمعه هالدهر خلاني
أرحم الگلب الصُبر انتضر منك خبر
مااضن تنساني
*******************
بويه وي الريح گمت ابعث سلامـــــي
الك والعمتي واخوتي وكل عمامــــــي
الماي مُر بريجي بويه وخاف ضامي
ياحلم ماينتهي بيقضه ومنامــــــــــــــــي
گمت اشوفك بالحلم يالغالي
گمت اشوفك تنشد عله احوالي
بويه لو حلمي اندثر انتضر منك خبر
أدري ماتنساني
***************************
بويه حتى الريح راح وما اجاني
ضّيعك يمكن يبويه ومالفانـــي
انت وين بياكتر حطك زمانــــــي
أنگطعت اخبارك وضل للموت اتاني
أنت وينك اسئل اعله مچانك
أنت وينك ياغريب اوطانك
بويه خوفي من القدر انتضر منك خبر
ادري ما تنساني
*******************************
بويه هي الطفله لو فگدت ابوهـــــــا
تعتقد تفرح لونهم واصلوهـــــــــــا
من بوا چيها تضنهم يسكتوهــــــــا
تسكت بيوم اليجـــــــي لمن يجوهـــا
انته روحي الروح هيه وجودك
انته روحي يالخذتهــــــا بزودك
أدري بدروبك خطر انتضر من خبر
ادري ما تنساني
القصيدة السادسة عشر
بويه من تمشي الضعينه -- أمشي وياها
لو مشت عمتي الحنينـه -- أمشي وياها
بويه لاتحتار بيه -- تگودني أختي رقيه
أمشــــــــــي وياهــــــــــا
**************************
السفــر ويـــاك يحلـــه وللعليـــــل يلــــــوك
وشوفـــن هلمحامل صارن اعلــه النـــــوك
أحــس بويــه العتــب برويحتي مخنـــــوك
شعاتب وانــــي اطلبــــك يلعزيز احگـــــوك
حگـــي من كـــل يـوم أشمـــك -- حگـــي ماعوفــــــه
كــــل فريضه وانــــي يمــــك -- حگــــي ماعوفـــــــه
الــك كـــــل صبــح ومسيـــــه -- تگودني اختي رقيه
أمشــــــــــــــي وياهـــــــــــا
********************************
أخذنـــــــي ويــــــاك بويـــــــــه ولا تهــــم بيـــــــــــه
ازحف لـــــو طحـــــــت خاننــــــــــي رجليــــــــــــــه
تحمّلنــــــي برواحـــــــــــــــك هينـــــــــه بلجيــــــــه
بعــــــــــون الله المـــرض مايبقــــــه تاليـــــــــــــــه
همي لتشيله برواحـــك _ لاتخلينــــــــــــي
هناك اضمدلك جراحك -- لاتخلينــــــــــــي
لو وصلنه الغاضريه -- تگودني أختي رقيه
أمشـــــــــــــــي وياهـــــــــــا
*************************
تمشـــــــــــي النوك بويه بهيده ممشاهــــــــــــــا
الحــــــــــــك بيها وامشـــي تشوفني وياهـــــــــا
أسبگهـــــــــــا وروح أبعيـــــــــد وتناهــــــــــــا
علتــــــي بهالحـــــدي يحسيـــــــن مشفاهــــــا
كـــل مرض ضعنــــك يزيلــــه -- انتــــه تشفينــــي
مـــاأضـــل يمـــك عليلــــــه -- أنتــــه تشفينـــــي
لاتخــــــاف أنت عليـــه -- تگودنـــي أختـــي رقيه
أمشـــــــــي وياهــــــــــا
*********************************
حنيــــــــن ادريك بويــــــه تخـــــــاف أتلــــــوّع
لان تــدري الطريـــــق بعيــــــــد وتصـــــــــدّع
تخاف من التعـــب مــــن محملــــي او گــــــــع
أذا گلهــــــن يصيــــرن بويـــــــه ماأرجــــــــع
حتى لو گربت منيتــــي -- أنـــــــــــــه مرتاحــــــــه
أكتب بخدك وصيتـــي -- أنـــــــــــه مرتاحــــــــــــه
كبل ماطيحن رميـــه -- تگودنــــي أختـــــي رقيـــــــه
أمشـــــــــــي وياهــــــــــــا
**************************************
أخذنـــي ويـــاك بويــــه أرتاـــــــح وتسلـــــــــــه
صعــــب فر گــــاك تدري وانـــــــه ماحملـــــــــه
هــــــم سامع طفـــــل يرتـــــاح عگـب اهلـــــــه
لـــــــو يبقــــــــه يـــــون والمدمع يهلــــــــــه
فرا گم يصعب عليــــه -- بويـــــه ماحملـــــــه
مثل لحضات المنيــــه -- بويـــــه ماحملـــــــــه
لاتهـــم يبن الزجيه -- تگودني أختي رقيــــه
أمشـــــــــــــي وياهـــــــــــا
************************
أشوفــــك ماخذ الاطفال كلهــــــا ويـــــــــــــاك
شنهـــــــــــي نيتك تبقـــــــه يبويـــــه هنــاك
تخلينــــــي وحيـــــده وعود اضــــل اتنــــــاك
انـــــه الـــي عشت عمري المضــــه بگربـــاك
مــــا اضل بلدار وحــــدي -- يعمـــــن عيونــــــي
لــــو ضعنكم كام يحـــدي -- يعمــــــن عيونـــــي
لاتخلينـــــــي باسيـــــه -- تگودنـــي اختـــي رقيـــه
أمشــــــــــــي وياهـــــــــــــا
*************************
الشاعـــــــر
كــــريم دانـــــــه الاعرجــــي
القصيدة السابعة عشر
عايشه والحزن غير حـالي ... هموم وجراح الزمن تبرالي
ذبل عيوني السهر ... عايشه بس عالصور
هموم وجراح الزمن تبرالي
************
والله لحظــات البعد تترك جرح
مســاهره ويا نجم ليلي للصبح
وين أدور عالصبر لا ما يصـح
حلمي طير وفجئة أشوفه منذبح
عود أتأمل خبر يلفيني .. من بعد هل الغيبة ويهديني
كلبي من همه نفطر ... عايشه بس عالصور
هموم وجراح الزمن تبرالي
************
نهر والله الدمع فــوكَ الخد جــره
هواي عبراتي بصــدري مكســره
وين الأكبر وين ســبع الكنطــــرة
مالفه المرسال أليه شــــــــــأخره
أنتظرهم والحزن يأذيني ... من أصد لصورهم تبجيني
ما رجع حته خبر ... عايشه بس عالصور
هموم وجراح الزمن تبرالي
************
الليل لو خـــــيم علــي أشــبع ألم
لن بعــدهم صعـب والحيـل نـهـدم
والله أحس هذا العمر مثل الـــعدم
بعد أبوي وعمـــــي شـــيال العلم
بدون خوان وخوات وحيدة .. مالي قوة والدروب بعيده
طول أهلي السفر ... عايشه بس عالصور
هموم وجراح الزمن تبرالي
************
عالدروب أنظر وأديـــــــــر عيوني
بلكت أحباب الـكلب يلفــــــــــــوني
من مشوا والله شكثر بجــــــــــوني
بهمي وبحـــالي المرض عافــــوني
خلوا بعيني الصور مرسومة .. ويا لوعات المرض وهمـومه
خاطري وكلبي أنكسر ... عايشه بس عالصور
هموم وجراح الزمن تبرالي
************
فاركَــوني وضلت دمـــــوع تصب
وأنه ما أحـمل سفر وأمــشي بدرب
بمفترق أربع طـــــــرق ظل الكَلب
أســـــــــــــأل البيه يمر من الغرب
بلكي أهلي بالدرب لاكيتهم .. جان عن هم الكلب حاجيتهم
حالتي همـــــوم وكدر ... عايشه بس عالصور
هموم وجراح الزمن تبرالي
************
فراق وهمــــوم الزمــــــــن تأذيني
عمت من كثر البواجـــــــــي عيني
أطشـــــــرت شيلمــــها بعد أسنيني
ورحي تاتهت بالدمــــــــع و ونيني
من بعدهم تيهيت أيامــي.. وأصبحت مثل السراب أحلامي
حالي طير بلا شجر ... عايشه بس عالصور
هموم وجراح الزمن تبرالي
************
شاعر أهل البيت
الشيخ عبد الحسين المنصوري
القصيدة الثامنة عشر
وياي طولـــتي الســهر ياليلة --- دمعتي نجم السمه تشــكيلة
بين دمعــي و الونــــــين --- كلبي مهمــــــــــــــوم وحزين
""""""""""""""""""""
وحشــــة يا ليل و تمر ساعة على ساعة
والحــزن مركب سره وشـــــايل شــراعة
شسوه بيه أنه الحزن لحظــــــــــة وداعة
توالمت ويســـــــهر ليلي بلا قنـــــــاعة
بالحلـــــــــم ردتـــــه يـمــــر --- نســـمع أخــــباره التســــــــر
طيف أتمنه يمر وأحجـيله --- وياي طولـــــتي السـهر ياليلة
""""""""""""""""""""
رحل بس الفجــــــوة خــــــــلاها جبـيرة
روحــــي طاحت بالحزن والــهم أســيرة
شخص أبو الســـــجاد مايحصــل نظيرة
راح بس خـــــله الكلب عايش بحــــيرة
شــــــــــــوفته عندي الدوه --- أهلـــــــــي أغله من الهـــوه
والله لو بيه زحف أمشيله --- وياي طولتـــــي السهر ياليلة
""""""""""""""""""""
كلت بلكت ترجــــع ويلتم شــــــــملنه
وينتهي هــذا الســـفر وتعـــود أهـلنه
ويا أهلــي جنت أحس العيشــــه جنة
بس ليالــي غيابهــــم صــــدك جونه
كـثرت الأمـــــــــي علــي --- وأهلــــي ما ردو ألـــــــــي
الليل نوحي هم حفظ ترتيله --- وياي طولتـــــي السهر ياليلة
""""""""""""""""""
مســاهرة وأتنطر وراحت عيونــــــي
لمته أحبــاب الكلب يتذكرونــــــــــــي
فارغ البيت من أشـوفه يجن جنونـــي
والله أموت من القهر لو ما يجـــونــي
عندي عافوهــا الصـــــور --- وليها مشــــــبوح النظـــــر
عيني دم المدمــــــع ألي تسيله --- وياي طولتــــي الســهر ياليلة
""""""""""""""""""""
أمنيه عندي الآهـل أحضه بشــــملهم
كبل موتــي وأختـــــم أيامي بوصلـهم
أجـــرع ألأم المرض بس مــــــا أملـهم
ولو أجو عن حالــــــــتي لا ما أكــلـهم
أخفي حتــه دمعـــــــــــتي --- أهلي كلشـــــي بدنيــــــتي
الشاف حالي من القهر يبجيله --- وياي طولتــــــي السهر ياليلة
""""""""""""""""""""
ما أنام وتســـعر بدلالـــي جمــــــــــرة
طول خلك الليل وعيونــــــي تنطــــره
كمت أحاجي الطــــير لو مر وأخـــبره
عن أبوي حســـين وبحــــــالي أذكره
أهواي ألـه مشـــــــــتاكَه --- تجــــوي نار أفراكَـــــــــــــه
بلكت الطير اليصل يحجيله --- وياي طولتــــــي السهر ياليلة
""""""""""""""""""""
شاعر أهل البيت
الشيخ عبد الحسين المنصوري
تمت قصائد مكتوبة لفاطمة العليلة ع
موقع المنبر الحسيني
مصدر القصائد موسسة منبريون
لاتنسو الفاتحة لروح مولاتي فاطمة العليلة ع
تعليقات
إرسال تعليق