لــبـيــك .. لــبـيــك .. ابــا عــبــد الله
زله للأنصار 1438 او تقرء في اي ليله
.
لــبـيــك .. لــبـيــك .. ابــا عــبــد الله
لــبـيــك .. لــبـيــك .. ابــا عــبــد الله
_____________________
التلـبيه الصرخه الوحيده البـسمك انعـليها
نـرعب اگلـوب ال امـيـه والـدواعش بـيها
عالـسواتـر بالمـعارك احــنه مــن نحچــيها
اي وحــق سـتر العـقيله كــربـله انســويها
والــثــار .. والــثـــار .. ابــد مـاننـساه
لــبـيــك .. لــبـيــك .. ابــا عــبــد الله
_____________________
احـنه يحـسين ابخدمتـك وانـتـه الـمربـينه
والله ماجـايبـته امــه الـــراد يـنــدگ بــينه
عدنـه مـاضي بالحـروب ونفـخر ابمـاضينه
سيدي الـهدد ظـريحك خل يجـي ايلاگـينه
منـخاف .. منـخاف .. ابـــــــد لاوالـله
لــبـيــك .. لــبـيــك .. ابــا عــبــد الله
_____________________
ابكـل وكـت انصار عـندك سـيدي موجوده
والـي يـتجاوز حـدوه انعـلمه وين احدوده
للحـرب مـمدوده اديــنه وللــسلم ممــدوده
اي وحــق عــين الكــفيل ورايـؤته وزنـوده
والــــراد .. والــــراد .. حـرب حاربناه
لــبـيــك .. لــبـيــك .. ابــا عــبــد الله
_____________________
همــه گــالو انـتـو قلـه واحـنه حــيل اهوايه
كون بي غيره وحمـيه اليحچي هيچ احچايه
خـل يجـي باچـر يـشـاهد مــن تــرف الرايه
نفــرك اخـشـوم ال امــيه ابــكـثرة المـشايه
والـيــوم .. الـيــوم .. اجـه الراقــبناه
لــبـيــك .. لــبـيــك .. ابــا عــبــد الله
_____________________
الگــالو انــهـدم المراقد لـَمــن اسـمعـناهم
الدارهـم يحسين رحـنه وعــبـي لبـسناهم
احـنه ويـانه الكفيل وهـمـه ياهــو اوياهم
ابفـضل الله وابـو فاضل سيدي ارعـبناهم
واللـــــه .. واللـــــه .. لــواك ارفــعناه
لــبـيــك .. لــبـيــك .. ابــا عــبــد الله
_____________________
النـصرتك الله خلـقـنه ونفـخـر ابهـالنـصره
المـايـقدم عمـره لجـلك شـنو قـيـمة عـمره
مـوقـفك وانتـثه وحـيد ابكــربـلاء انـذكره
مـن بـقـيت ابـلايه نـاصـر والاعـادي كـثره
حاطـوك .. حاطـوك .. عــده واويـلاه
لــبـيــك .. لــبـيــك .. ابــا عــبــد الله
_____________________
احــنه لـــو ويـاك چـنـه العــده ميــبـعدونه
وصـدرك ابسـهـم المـثـلث والله ميصوبونه
والمخـيم يـبـو اليـمه اصـفوف نوگف دونه
وخـدر زينـب يخـو زينـب والله مايـصلونه
والـــدم .. والــــدم .. الــك قــدمــناه
لــبـيــك .. لــبـيــك .. ابــا عــبــد الله
_____________________
تمت والحمد لله في ١١ /٩/ ٢٠١٦
حيدر تركي الكربلائي
نزله على الانصار
كوموا يهل الغيره وي غريب الديره
حسين وحده بكربله وبس احنه الانصار
________________—
كوموا لحسين الغريب امشونه
وبعد بلكافل نمر خلونــــــــــه
رخصه نطلب بلجن يرخصونه
نريد ابو اليمه نقاتل دونــــــــه
احنه احنه انصاره احنه باول غاره
حسين وحده بكربله وبس احنه االانصار
______________________________
واكف يحشم غريب اوطانها
كوموا هدوا الخيل من اعنانها
كوموا كلبوا كربلاء بوديانها
كبل مايذبحون كل رضعانها
شنعتذر هلمره تدري بينه الزهره
حسين وحده بكربله وبس احنه االانصار
____________________________
كوموا خلنوصل لعد ام الخدر
نكله احنه احبابج واحنه الستر
نقسم بضلع امج الي المنكسر
مايصل يازينب خيامج شمر
سيوف سليناها ارواحنه وبعناها
حسين وحده بكربله وبس احنه االانصار
____________________________
كوموا شدوا الحيل شدوها الحزم
خلوا غيرتكم على اجتاف العزم
كوموا للحومه نطبها يازلـــم
من اهل كوفان كوموا ننتقم
اليوم كلمن زوده والركاب شهوده
حسين وحده بكربله وبس احنه االانصار
___________________________
كوموا ومشونه لحبيب القائد
الرايه زمها وخلنروح انجاهد
كوموا شدوا الساعد اعله الساعد
مانريد اليبقه بلطف كاعد
هذا يوم المرجله والنصر بارض العلا
حسين وحده بكربله وبس احنه االانصار
_______________________________
كوموا خلندك الحديد عله الحديد
غيمه صيروا وساعقه وبرق ورعيد
كوموا خلوا اعلومكم توصل يزيـــــــد
روسهم دزوها للشام البريــــــــــــــد
والبريد اعلومكم يانشامه ويومكم
حسين وحده بكربله وبس احنه االانصار
_________________________
السيد كريم دانه الاعرجي
احنه الك انصار... يبن حامي الجار
نزله للانصار 👇🏻
احنه الك انصار 00 يبن حامي الجار
اليوم عفناهه الديار وجينه 00 يبن ابو الحملات زامط بينه
ارخصنه نبرز خل نثبت احدودهه
وكبل هاشم ما يهد هادودهه
زفنه عالحومه تريد اجنودهــــــه
تنتظرنه امنثرات اجعودهـه
زفنه للميدان 00 زفة العرسان
ابفيض جريان الدمه اتحنينه
يبن ابو الحملات زامط بينه
ارخصنه كلبك خل نزيح اهمومه
كبل لاعبــــاس يرعــــــد يومـه
وندري قانون الكمر بالحومـــــه
ألرحمه والتعداد بيه معدومــــه
المعرگه لعباس ،، هوّه ابو النوماس
لزوم يرخصنه ونقبل ايمينه
يبن ابو الحملات زامط بينه
الحومه بالدم نكتب اعله اترابهه
فدوه كلنه لزينب ولاحجابهه
والخيـــم محد يــــدوس اعتابهه
الا انصارك تطيح اركابـــهه
ننطي دم انحور 00 لاجلك ابعاشور
چنّه ماكو وبسمك اتعلّينه
يبن ابو الحملات زامط بينه
الكاع ترتج للملاعب من نهـــد
ونحصد الجيمان بالحومه حصد
من نهد انخلي واحدهــــم يـود
امّه ماتـــت مـــن كبـــل لا ينولد
الحومه بيهه اسباع 00 ما تظمهم كاع
ابزودك احنه نفتخر تدرينه
يبن ابو الحملات زامط بينه
خل نخلي الكاع حمره من الدمه
وتظل تمطر موت بالحومه السمه
ولو تكطعنه يبن حامي الحمــــه
فدوه بس لكماط محسن فاطمـــــه
مانساوي تراب 00 جدم داحي الباب
وما نساوي اتراب جدم اسكينه
يبن ابو الحملات زامط بينه
خيول اميه اليوم نلوي اعنانهه
وحدر حافرهه نحــــط فرسانهـه
انكطع ابصل السيوف ابدانهـــه
ايحير يجمع ياجســـــــــم دفانهه
لو دخلنه الويد 00 عدنه جنه العيد
اشتثكل من هموم ذبهه اعلينه
يبن ابو الحملات زامط بينه
أحمد الهلباوي
فاطمه ویانه
نزله لیلت السادسه
فاطمه ویانه
علی یرعانه
احنه النصار
،،،،،،،،،،،،،،،،،،،،،،،،،،،،،
وگفه عداهل المراجل والمجدترتیله
احنه انصارابوالیمه وبینه ایشدحیله
مانعوف احسین حاشه وبدمه انضحیله
یبقه کعبة عشگ النه ولازم انوفیله
حسین مولانه
علی یرعانه
احنه النصار
،،،،،،،،،،،،،،،،،،،،،،،،،،،،،،،،،
صاح عابس جننتنی یاابن حامی الحمه
والیحب لازم یضحی ابدمعه ضل ایکلمه
درع ثوبه وضل یکبرمن دخل للملحمه
ومن وگع بلحومه عابس یمه حضرت فاطمه
وارتفع شانه
علی یرعانه
احنه النصار
،،،،،،،،،،،،،،،،،،،،،،،،،،،،،،
جون بلثایه تحزم وگفته معلومه
طلب رخصه من حبیبه وراح سجل یومه
ضلت اتفرالعساکرمن دخل للحومه
استشهدابعزه وکرامه والشرف مختومه
باقی عنوانه
علی یرعانه
احنه النصار
،،،،،،،،،،،،،،،،،،،،،،،،،،،،،،
هدحبیب ابن مظاهروالمجدحیاله
شیخ النصارابوگفته بچه الخیاله
ضل یکربیهم ابسیفه خاب التعناله
خلصت اسنینه وحیاته بلفخرهنیاله
ینطق السانه
علی یرعانه
احنه النصار
،،،،،،،،،،،،،،،،،،،،،،،،،،،،،،،
رایة الانصارضلت بلحرب مرفوعه
ثوره بلتاریخ ضلت بلگلب مطبوعه
صرخة الحجاج بیهه وللابدمسموعه
اذن ابسوح الحرایب ماتغیرنوعه
ثبت ایمانه
علی یرعانه
احنه النصار
،،،،،،،،،،،،،،،،،،،،،،،،،،،،،،
خادم الزهراس علی السیلاوی
هللّه هللّه بيهم هللّه هللّه بيهم
❤️ياصاحب الزمان❤️:
#نزلة_للأنصار ع
هللّه هللّه بيهم هللّه هللّه بيهم
من حبيب بن مظاهر
يالانصار بيوم عاشر
ـــــــــــــــــــــــــــــــــــــــــــــــــــــــــــــــ
شيخ الانصار بعزيمه كال خلّص الانتظار
وصاح راؤونه المراجل هللّه هللّه يالانصار
اليوم كون الدينه تكتب من دمانه الانتصار
وكون بأرض الغاضريه عكس يفتر المدار
وصاح أفدوها المناحر
يالانصار بيوم عاشر
ــــــــــــــــــــــــــــــــــــــــــــــــــــــــــــــــــــ
أدري بيكم يانشامه حسينكم تفدونه
الحمل وشما ثكل أهله همّه اليشيلونه
يلّه راؤونه المراجل والقتل وفنونه
وكربله خَلّو رملها يصير أحمر لونه
ندِّموا هاي العساكر
يالانصار بيوم عاشر
ـــــــــــــــــــــــــــــــــــــــــــــــــــــــــــــــــــــ
يلّه يرجال الحميّه اليوم يوم الهمّه
أحنه جِدّام الهواشم كون دمنه أنقدّمه
للحسين أنطينه جلمه ومانعوف الجلمه
لأجلك أحنه للمنيّه أنصار يابو اليمّه
ماتهمنه هالمخاطر
يالانصار بيوم عاشر
ـــــــــــــــــــــــــــــــــــــــــــــــــــــــــــــــــــــ
ياحسين أنحبك أحنه ومانكول التوبه
واليحب لازم يضحّي كلشي لمحبوبه
هاي الارواح إبخدمتك سيّدي منصوبه
يالحروفك من زغرنه عالكلب مكتوبه
عشك وبأصدق مشاعر
يالانصار بيوم عاشر
ـــــــــــــــــــــــــــــــــــــــــــــــــــــــــــــــــــــ
ياعلي صيحوا وإنزلوا أرواحكم تفدوها
والطفوف اليوم أرضها بالجثث زرعوها
وإعله راس رجال اميه بالعزم كلبوها
وبعزمكم كون زينب تفتخر خلّوها
أحنه للغالي نناصر
يالانصار بيوم عاشر
ـــــــــــــــــــــــــــــــــــــــــــــــــــــــــــــــ
#علي_حسن_المنصوري
لبيك لبيك حبيبي ياحسين لبيك لبيك نداءُ العاشقين
بسم الله الرحمن الرحيم
***************************
لبيك لبيك حبيبي ياحسين لبيك لبيك نداءُ العاشقين
*****************************
انصارابواليمـــــــه تنادي بكـــــربلاء
لبيك يابــــــن فاطــمه خـــــــيرالنساء
يحسين خطــــــــينه عهـــــدنه بالدماء
للموت ويــــــاك ونردد هــــالنـــــداء
لبيك لبيك جئنامقاتلين لبيك لبيك نداءُ العاشقين
********************************
جينه يبـــــــــــواليـــمه نقاتل بالطفوف
سلينه لجل التضحيه ارمـــاح وسيوف
واحدنه صــارت همته اتعـــادل ألوف
أرخصنه وبعيـنك يبو الأكـــبرتشوف
لبيك لبيك ولتشهدِ السنين لبيك لبيك نداءُ العاشقين
********************************
ذبينه لامـــــات الحرايـــب والدروع
أريد نتلـــــگه العواســــل بالضـلوع
تعرفنه نأبه الضيم والذله والـخـنـوع
والي يكر من عدنه مايعرف رجوع
لبيك لبيك في الحربِ لانلين لبيك لبيك نداءُ العاشقين
*****************************
هذه زهير وعابس وهــذه حبــــيب
وياك كل انموت اجيــنه يــاغريب
مانگدر انشوفنك بدمـــك خضيب
فوگ الثرى متوسد وخـدك تريب
لبيك لبيك خطُ عالجبين لبيك لبيك نداءُ العاشقين
*****************************
ارخصنه من قبل الهواشم للقتال
انصارك وللموت شدينه الرحال
انريد نضرب للوفه اروع مثال
وخلنكتب ابدمنه ابميادين النزال
لبيك لبيك بكم لنا يقين لبيك لبيك نداءُ العاشقين
عفنه الأهل لجلك وهاجرنه الوطن
وياك موعد عدنه وبهـــــذه الزمن
اوهاي منايانه عل الــموعد لـــفن
وندري تراب الطــف يصرن الكفن
لبيك لبيك جئناك ناصرين لبيك لبيك نداءُ العاشقين
********************************
تمت بعون الله وتوفيقه والحمدلله رب العالمين
وصلى الله على محمدٍوآله الطاهرين
حيدركريم جارالله الكربلائي
نبقى الانصار بفخر . حد ظهور المنتظر . يبواليمة
نبقى الانصار بفخر . حد ظهور المنتظر . يبواليمة
،،،،،،،،،،،،،،،،،،،،،،١
نبقى انصارك يغالي . نبقى حد يوم الحشر
مانعوفك يبو الأكبر . انته مفتاح النصر
خلنه نتگطع بحبك . فدوه الك كل العمر
صرنه نتمنه الشهادة . صرنه نسحگ عالجمر
البايعك يعني انتصر . حدظهور المنتظر . يبواليمة
،،،،،،،،،،،،،٢
مثل جون ومثل عابس . دوم ترجع كربله
من حبيب ابن مظاهر - تبقى هاي القافله
ذوله انصار العقيدة . علمونه المرجله
مانخاف من المصاعب . احنه اهل المعظله
حب الحسين استقر . حد ظهور المنتظر . يبواليمة
،،،،،،،،،،،،،،،٣
من برير اصل البطوله . بالشدايد ماخظع
وصولت الحر الرياحي . بيهه كل واحد سمع
ونافع الضحه بوريده . وللظلم لا ماركع
لحد يوم المهدي ثوره . المهدي نفرح لوطلع
اسم الحسين انتشر . حد ظهور المنتظر . يبواليمة
،،،،،،،،،،،،،،،،،،،٤
ربنه طول الزمن خله – انصار الك يبن الولي
غصبن اعله احفاد اميه . دوم نصرخ ياعلي
راية العباس عدنه . وكل مصيبة تنجلي
ابو صالح لو لزمهه . على العالم تعتلي
نسحگ دروب الخطر . حد ظهور المنتظر . يبواليمة
،،،،،،،،،،،،،،،،،،،،٥
مايهمنه الحاربونه . احنه انصار الشهم
حسين علمنه الشجاعة . وصرنه بالحومه زلم
دوم منتصرين نبقى . احنه ابد ننهزم
حسين حبه بدمنه يجري . ونشتعل غيره وعزم
نراواي للعالم صور . حد ظهور المنتظر . يبواليمة
،،،،،،،،،،،،،،،
الخادم \ حيدرموسى الرميثي
سجلنه بدفتر خدامك
سجلنه بدفتر خدامك
**1********************
خدامك والله ونتشرف
يالوالي وعايش بينه الطف
وعين العباس وجرح الجف
تسكن بالدلال الامك
***2**********************
بغيرك ما تنفع دنيتنه
لنك دمعتنه وجنتنه
انت اطروحتنه وفكرتنه
نحسب كل ايام ايامك
*3*********************
يحسين بحبك نادينه
وبكطع المنحر ضحينه
ما عفناك وما ذلينه
تسعر بينه اتضل خيامك
4**********************
بالدم عاهدنه اوقعنه
ثورتنه اترجم واقعنه
قدمنه الروح ومابعنه
بنهجك مانترك احكامك
******5******************
مانترك حبك والزهره
جدامك يانورالعتره
نقسم بالعباس نحره
ماننسه اجروحك وأيتامك
&&&&&&تمت بعون الله&&&&&&&&&
الخادم حيدرالخفاجي الرميثي
من حبيــب الغانمه === سولفت بيها السمه
من حبيــب الغانمه === سولفت بيها السمه
ــ
قايد الأنصار غانـــــم == واجه إبزوده الصوارم
ينصر إو يفدي الهواشم == ينتخي بالموزمــــــــــــــه
ـــ
عابس إو جون إبعزيمه == مسحــــــــــوا آلام العليمه
عدهم الأبـــرار شيمه == من علي حامي الحمه
ــــ
من زهير الحوم نازف == مــن إباءه الكون خايف
ما يهمـــّه الموت هاتف == والله ميهمني الظمــــــــــه
ــــ
ولبرير الحوم غيـــّم == صايل إو هيهات يهتم
بالجنان إيصير يعلـم == من يحل سيل الدمه
ـــ
خافت إمن الحر أميـــّه == من نصـــر إبن الزچيه
ما يخاف إمن المنيـــّه == روحــــــــه للحب باسمه
ـــ
وإلــوَهـــَب أمـــــّه تهلهل == بالجنــــــان إيريد ينــــــزل
موت أحمر بيهم إيحل == صــــوّب الگوم العمـــــــه
ــــ
ذوله أنصار العقيــــده == كل شهم روحه سعيده
بس رضا الباري يريده == دربـــــــــــه بالعز راسمه
ــــ
ليتنا نمشي إبأثرهـم == خالد إو زاهي سفرهم
للمجد إنطوا عمرهم == والرجـــــس راح إنرمه
ـــــ
إحنه أنصارك يوالي == يا أبــو اليمه يغالي
نرتقي إبدرب المعالي == والليالــــــــــــــي مظلمه
ـــــ
إحنه أنصارك يغايب == لازم إندوس النواصــب
سيدي إنريدك يصاحب == زمـــــــرة الشر غاشمه
ــــتــــــــــــــ
مع تحيات شاعر اهل البيت // جابر النجفي
نحلف احنه براسك أي وحگ عباسك
نحلف احنه براسك أي وحگ عباسك
**********
ندي ابن مرجانه فاسد مانهاب جنوده
شحده يگرب للمخيم لو يصل لحدوده
عدنه غيره حيدريه وغيرتك موجوده
اسمك اصبح للغياره ياحُسين انشوده
كلنه نصبح ساسك أي وحگ عباسك
***********
هاذي انصارك نشامه عترتك تحميهه
كلشي بالدنيه نملكه بحبك نضحيهه
نسحگ خشوم اليضدك والنفس نهديهه
كل نحر عدنه رخيصه والدمه نفديهه
بغيره نحمي ناسك أي وحگ عباسك
************
مانهاب جيوش اميه زين تعلم بينه
هالعمر ما يسوه دونك ماتفيد اسنينه
بأسمك اندوس المنيه بحبك انجنينه
نخلي حتى الموت يفزع لو سوه هبينه
انصير الك انفاسك أي وحگ عباسك
***********
ازهير وي جون اويه عابس للحرب عنايه
والحبيب ابنه مُظاهر بيده رافع رايه
مسلم ونافع تنادي انصر كلنه دمايه
احنه سبعين انتفاده وانت صرت الغايه
كل عزم من باسك أي وحگ عباسك
**************
الليله كل احنه نضحي كلشي لجل عيونك
فنّه جيش ابن الدعيه لو يصل لضعونك
حتى لو كلنه انتگطع مانخيب ظنونك
لو نفس بس واحد ايظل شنهي نفعه بدونك
احساسه من احساسك أي وحگ عباسك
**************
انته قراّن العقيده وللشريعه صوره
نصبح لضعنك حمايه واحنه نسند سوره
الليله بالهمه نخلي هالقزم مذعوره
تبقه باذن الله تلالي رايتك منصوره
تزهي من نوماسك أي وحگ عباسك
***************
نرسم بدمنه الملاحم بيهه سر افكارك
تمشي الاسنين وتعدي تنختم بانوارك
اتسلم اعلينه بدمعهه من تجي زوارك
شيعتك وبكل محرم تحيي ذكر انصارك
يضوي بيه نبراسك أي وحگ عباسك
***************
ابو لقاء البهادلي
نحنُ جندُ الله للطفِ أتينا ...... يا حسين
نحنُ جندُ الله للطفِ أتينا ...... يا حسين
نفتدي الارواحَ في حب حسينا ...... يا حسين
وا حسينا ..... وا حسينا ..... واحسينا
(١)
هيه چلمه وبالگلب يكبر صداههَ ..... يا حسين
منهو أنصاري واجينه احنه فداههَ ..... يا حسين
جينه نفديك ابدمه ...... اي وحگ رب السمه
تفَدّي دونك سيدي وهذا مناههَ ...... يا حسين
وا حسينا ..... وا حسينا ..... واحسينا
(٢)
كَليوثِ الغابِ ساروا للحتوفِ ..... يا حسين
لا يهابونَ أبد ضَربَ السيوفِ ..... يا حسين
اقبلوا صَوبَ الوغى ..... هكذا في كربلا
ونَشيدَ العشقِ في ارض الطفوفِ ..... يا حسين
وا حسينا ..... وا حسينا ..... واحسينا
(٣)
والله حبك سيدي كلنه ملكنه ..... يا حسين
بغير بدر حسين ما يسوه فلكنه ..... يا حسين
حبه باقي من الأزل ...... وهذا عابس بالمثل
وبطريقك سيدي كلنه سلكنه ..... يا حسين
وا حسينا ..... وا حسينا ..... واحسينا
(٤)
يذكرُ التاريخَ في وقعِ الرماحي ..... يا حسين
كيف أمضى ينشد الحر الرياحي ..... يا حسين
لِبنُ بنتِ المصطفى ..... امضي للموتِ فدى
أنتَ ذخري يومَ حشرٍ وفلاحي ..... يا حسين
وا حسينا ..... وا حسينا ..... واحسينا
(٥)
كل محب ليكم يبو السجاد ثائر ..... يا حسين
وراية الأنصار بيد ابنَ مضاهر ..... يا حسين
مسلم اوجون او زهير ..... هم وهب ويا برير
كله لبت سيدي وطلعت تناصر ..... يا حسين
وا حسينا ..... وا حسينا ..... واحسينا
بقلم
طارق السماوي
كوموا يهل الغيره وي غريب الديره
كوموا يهل الغيره وي غريب الديره
حسين وحده بكربله وبس احنه الانصار
____________--
كوموا لحسين الغريب امشونه
وبعد بلكافل نمر خلونــــــــــه
رخصه نطلب بلجن يرخصونه
نريد ابو اليمه نقاتل دونــــــــه
احنه احنه انصاره احنه باول غاره
حسين وحده بكربله وبس احنه االانصار
__________________________
واكف يحشم غريب اوطانها
كوموا هدوا الخيل من اعنانها
كوموا كلبوا كربلاء بوديانها
كبل مايذبحون كل رضعانها
شنعتذر هلمره تدري بينه الزهره
حسين وحده بكربله وبس احنه االانصار
________________________
كوموا خلنوصل لعد ام الخدر
نكله احنه احبابج واحنه الستر
نقسم بضلع امج الي المنكسر
مايصل يازينب خيامج شمر
سيوف سليناها ارواحنه وبعناها
حسين وحده بكربله وبس احنه االانصار
________________________
كوموا شدوا الحيل شدوها الحزم
خلوا غيرتكم على اجتاف العزم
كوموا للحومه نطبها يازلـــم
من اهل كوفان كوموا ننتقم
اليوم كلمن زوده والركاب شهوده
حسين وحده بكربله وبس احنه االانصار
_______________________
كوموا ومشونه لحبيب القائد
الرايه زمها وخلنروح انجاهد
كوموا شدوا الساعد اعله الساعد
مانريد اليبقه بلطف كاعد
هذا يوم المرجله والنصر بارض العلا
حسين وحده بكربله وبس احنه االانصار
___________________________
كوموا خلندك الحديد عله الحديد
غيمه صيروا وساعقه وبرق ورعيد
كوموا خلوا اعلومكم توصل يزيـــــــد
روسهم دزوها للشام البريــــــــــــــد
والبريد اعلومكم يانشامه ويومكم
حسين وحده بكربله وبس احنه االانصار
_____________________
السيد كريم دانه الاعرجي
تعليقات
إرسال تعليق