18 قصيدة مكتوبة لام البنين عليها السلام المجموعة الثانية
رئيسيات
القصيدة الاولى
بحر طويل :
__
هداك الله يهالناعي عليمن دارت الأقدار
او ياهو ابكربله مرمي او راسه اعله القنا يندار
ـــــــــــــــــــــــــــــــــــــــــــ
طرّت بالدمع لصفوف او گامت بيدها تومي
خبّرني ابعزيزي اللي من جفني سِلَب نومي
بعيد الشر عله اوليدي او گبل يومه عسى يومي
فالك مُرَد بالدلّال
او منّك ما قبلنه الفال
گلّي احسينّه ابيا حال
او يمته السافر امن الدار يعود اِلنا او يرد للدار
ـــــــــــــــــــــــــــــــــــــ
التِفَت عالوادم او ناده أظن هالحُرّه مذهونه
أگلها احسينكم ذبحوه , تگلّي احسينّه اشلونه
عرفها أم البنين او گام ينشّف دمعة اعيونه
او يگلها ايعظّم المعبود
أجرچ بالذي مفگود
أولادچ بعد متعود
گظوْ حگ الوفه او راحوْا فدوه لمهجة المختار
ــــــــــــــــــــــــــــــــــــــــــــ
و أخبرنّچ ببوفاضل كفّه ابكربله او وفّه
بس ما خاض المسنّات و امن الماي أخذ غُرفه
تذكر عطش چبْد احسين او ذب الماي من چفّه
او رجع لمخيّمه ابجوده
يروّي اسكينه مگصوده
لچنهم گطعوا ازنوده
او صابوا بالعمد راسه او جسمه اعله الأرض طشّار
ــــــــــــــــــــــــــــــــــــــــــــــــ
اِلتوَتْ و اخذَت نفَس و اردود حطّت ايدها اعله الراس
تگلّه يالشعبت الروح ياهو اسْأَلَك عن عبّاس ؟
فدوه لضنوة الزهره يروح ابني الگمر لا باس
خبّرني اعله نور العين
الجسم منّي الگلب نصّين
وين احسين وين احسين
ليش اويه الظعن مارد إذا عندك علم بالصار ؟
ــــــــــــــــــــــــــــــــــــــــــــــــــ
يگلها يالتنشديني سمعي اجواب هالنشده
احسين اعله الترب مطروح او ذاب امن الشمس خدّه
او عگب ما سلّبوا جسمه سِلبَوا إخته من بعده
ظلّت بعده ابحيره
ابحريم او عايله اچبيره
تطب من ديره لديره
مچتوفه او بديها الطوگ او تركب هزّل الأكوار
--
الميرزا عادل أشكناني
" قم المقدّسة "
القصيدة الثانية
بمجلسج يم البنين راح اسوي اقرايه
لازم انه اعله الحسين انعه وبجي اهوايه
تراني امن الزغر خادم تعرفيني
من هاي المجالس لا تحرميني
*****************
انه واكف للجرح وكفت ضمير
وثوبي الاسود ما انزعه اشما يصير
بالعزاء اتشرف اكعد عالحصير
انه خادم والخدمكم صار امير
انه عابس بالعشك والحسين اجنوني
الطم بحركه وادك وكلهم ايعرفوني
يا صومي وصلاتي وشمعه اسنيني
من هاي المجالس لا تحرميني
***********************
اليوم اريد احني الضهر واتعنه ليج
واقره اه يحسين وامصابه عليج
انتي دمعج مو الج وانه ادري بيج
وبالشدايد ما يحير اليعتنيج
انتي مدرسه الوفاء وكربله عنوانج
احجابج احجاب السماء والصبر قرانج
باجر بالحشر ياهو الينجيني
من هاي المجالس لا تحرميني
********************
القاري لو جاب اسمج انحل ونعصر
يالمعزتج عندي تدرين اشكثر
الزهره هم مثلي تدك اعله الصدر
اشلون وانه ادري بضلعها منكسر
الزهره متأكد تجي وتلطم اعله حسينها
تكعد وتشبع بجي وعالمجالس عينها
وموقف فاطمه كلش يأذيني
من هاي المجالس لا تحرميني
*******************
حرت اون اعليج لو ون عالسبي
عله زينب يبجي ضل حته النبي
اشلون صعدت عله التل الزينبي
اتصيح وين احزام ضهري ومعصبي
من غفت عين الكفيل بت علي هظموها
الحرم ضجت بالعويل والخيم حركوها
يالزهره اعله زينب من عمت عيني
من هاي المجالس لا تحرميني
********************
مجلسج كل الخلايق حضرته
وكل نبي ومرسل تجارت دمعته
يلطم العباس اجاج بشيبته
وزينب اخته بكفه الباب اتلكته
يا هله زينب تصيح بحامي خدري الغالي
خل الزمك لا تطيح يا بعد دلالي
يخويه وداعتك شوفتك تكفيني
من هاي المجالس لا تحرميني
*******************
المهدي اول واحد اهنانه تره
بكلبه للرادود يدعي لو قره
وكف يم المنبر ودمعه جره
وبالسره سجلنه كلنه بدفتره
المهدي يصفك بالجفوف والدمع يتجاره
وكاعد بعينه يشوف ويدري احنه انصاره
ما عوف اللطم مولاتي تدريني
من هاي المجالس لا تحرميني
*******************
تمت
تحسين الخفاجي
الناشر ملا_داود_الكربلائي
القصيدة الثالثة
انه حيل اتعذر من ام البنين // ماكو وصله قماش الم بيها الحسين
رايح اقره الفاتحه تسهيل امر
وابدي اسولف عالكطع راسه الشمر
***************
توه نام حسين مو واحد يكعده
جرح ابو اليمه كلف واشلون اظمده
ابساط مامش جوه جسم حسين امده
الرمل حار ويجوي خاف الرمل خده
الخيل شمسويه الله لا ينطيها // ليش محد كام صاح اعليها
رايح احسب جم ضلع بي منكسر
وابدي اسولف عالكطع راسه الشمر
***************
شفت طفله تعاتب بحلو المحاجي
وعالترب مطروح ابوها ودمه زاجي
جنه راح ايطك كلبها امن البواجي
ياهو منكم دنت نفسه اعله التراجي
اجفوف اديها ازغار مو مالت حبل // زحمه ترفع صوط وطكلك طفل
انه بمصيبة رقيه كلت امر
وابدي اسولف عالكطع راسه الشمر
**************
من رخصتك صحت يا بدر العشيره
الحرمه عند العرب من تنطك جبيره
اهنا يخو زينب خذو زينب اسيره
وكت يحدي بزينب الما عنده غيره
كوم عوف الماي ورجع للخيم // مو محل فركه يشيال العلم
اشلون انسه زينب وسبي الخدر
وابدي اسولف عالكطع راسه الشمر
***************
انه حيل اعتذر عن هاي القصيده
لاجن اشبيدي عله الحزو وريده
حسين محد شاف منكم اصبع ايده
ياهو اليدليني ونطيه اليريده
ياهو لابس محبسه روحوله // دوم ما لايك عليه كلوله
خل ينزعه ولا يضل بي يفتخر
وابدي اسولف عالكطع راسه الشمر
****************
انه كلش مستحي من امه الزجيه
خاف انهي المجلس وتزعل عليه
يا قصيده اتشوفني الزمها بديه
اتكلي حته لو كضت اقراها اليه
اتكلي ليش حسين محد شاله // ومن حرارة الشمس فياله
اشراح للزهره اقدم من عذر
وابدي اسولف عالكطع راسه الشمر
*************
جني شفت الحسن طب وشاحب اللون
وسلم اعله ام البنين وتجري العيون
كلها هذا الحسن يال عنه تنشدون
وكامو اعله حسين بالمجلس يلطمون
شفته طب للمجلس وحافي الجدم // وصاح اخوي اشلون واليته الزلم
مدري اعرج عالحسن ودمي الصدر
وابدي اسولف عالكطع راسه الشمر
**************
تمت
تحسين الخفاجي
الناشر #ملا_داود_الكربلائي
القصيدة الرابعة
يبني عُــمــرك قَــدّمـه
للـزچيّه فاطمــه
راسك چفّك و العين
إرخَصهِـن لجْل احسين
او فدوه لو سال الدِمه
للـزچيّه فاطمــه
ـــــــــــــــــــــــــ
يوليدي كلمن عنده همِّ ابدنياه
ايضحّي ابوجوده او لا يضحّـي ابمنواه
و إنته مُناك او غايتك لجلِ الله
اويه احسين يبني اتعيش و اتموت اوياه
اشما يگِلَّـك گِلّه تم
سَـمْعه بس كلمة نعم
إبگه اوْيه اعضيدك دوم
و إخدم أشرف مخدوم
و آنه أبگه خادمِه
للـزچيّه فاطمــه
ـــــــــــــــــــــــــ
أمَّه الزچيّه إلها حگ اعلينه
او ما نوْفي حگها مهما لو ضحّينه
او حيدر أبوه احفظلي عهده او دَينه
و إرخص الغالي يبني لجْل احسينه
آنه من يوم الزغـر
لجله ناذرتك نـذر
او ضمّيتــك للــزهـــراء
تـوفيهـا ابعاشــوراء
إسمك ابزود إنتِمه
للـزچيّه فاطمــه
ـــــــــــــــــــــــــ
احسين العشيره او خُولتك و اعمامك
او لو كلّمك يوليدي دنّگ هامك
او بالك تِـسِـبْـگه لو مشه گدَّامك
خلّي اعله أجدامه أثر أجدامك
إتْـبَـعه مثْل الفصيل
ميل ويَّا من يميل
و إمشي دوم ابمسراه
مثل الظـِّـل كون اوياه
احسين كون اتعظمَّـه
للـزچيّه فاطمــه
ـــــــــــــــــــــــــ
هذا العهد يوليدي بيني او بينك
والله تعالى أوجَدَك لحسينك
من تفدي لجله ابهامتك و ابعينك
بالمحشر أمّه اتطالب ابچفّينك
لو إديك اتگطّعن
تِـشْكُـرَك أم الحسن
يبني او أكثر شتريد
او ربّك رافعلك إيـد
او چف إديك ايسلّمه
للـزچيّه فاطمــه
ـــــــــــــــــــــــــ
او لو رايد اتوَفّي اويه أمك لعهود
ما أكتفي منك ابگطعة لزنود
كون ابجبينك يبني ذاك العامود
و ابعينك ايفوت السهم گبل الجُود
او لو صدگ تطلب رَضَاي
يبني لا تشرب الماي
يا عبّــاس اِلمــولاك
إبذِل روحك و ادماك
و إنوِي حُسْن الخاتمه
للـزچيّه فاطمــه
ـــــــــــــــــــــــــ
ميرزا عادل أشكناني
القصيدة الخامسة
عباس امنتخيل جسمك فوك التربان اول حسبه اتمر ابّالي جبدك عطشان
وتصيح ارويني ياشمعة عيني
---------------------------------------------------
سرحت عيني وكمت اتخيل عالشاطي امعفر وامكطع
اتأكدت ابهالموقف يبني لديارك وامك ما ترجع
شاطت روحي واكتم صوتي ادريبك لوصيحك تسمع
لو نخّيتك من الموت اتكوم ابلا جفين وتفزع
لو تفزع يوليدي اتقدم وانطيك اجفوف ولو ترجع انطيك اعيوني حته انته اتشوف
وانطيك ايديني ياشمعة عيني
---------------------------------------------------
كلما ريح اتحرك بابي يلجمني اغيابك يالغالي
كلما واحد نـاده الامـه يـا يمه ايـصوب دلالي
اتفاركني وما ترجع يبني ما مرت هالحسبه اببالي
والحسبات اتوالت بعدك ياحسبه الما شلت حالي
يوليدي اعيوني السهرانه مدمعها السال اتشوف البدر وترسم وجهك فوك العسال
يابدر اسنيني ياشمعة عيني
---------------------------------------------------
اشهك يوليدي وكل شهكه اينص صدري اتموت وما ترّد
واكعد ويّه اهمومي واكَلهن بلجن هذا اليوم اتعود
شتعود وآنه اللي اوليدي لليـوم انتظره وما عــوّد
وآنه اعرف بيه اعله الشاطي مذبوح بجروحه امدد
واجروح هواي اتخيلهن واصعب جرحين جرح اوداع الحره وثاني بوداع حسين
اجروحك تلفيني ياشمعة عيني
---------------------------------------------------
يبني وجم حاله اتخيلها ويا حاله الاكدر احملها
حالة زينب لمن سافت عالشاطي اتكور كافلها
لو حالة سكنه اللي طلعت عالهزّل مايل محملها
لو حالة عبدالله الشاهد من نحره ادماه وهمّ الها
عبدالله من اتصوب نبله وحس سيل ادماه ظن بيه الماي ويتكرب ويدنّي اشفاه
منظر ياذيني ياشمعة عيني
---------------------------------------------------
مابيني وبينك يوليدي جم موقف مر واتذكر
لمن طاح الوالد حيدر بالمحراب وراسه اتطبر
انته اللي جنت اتواسيني بغيابه يالجنك حيدر
ومن اغيابك مفجوعه يوليدي الحد يوم المحشر
يالبالحوم اتوصَف جفك جف الكرار جفينك لمن كطعوها مطلوبه ابثار
ثار الصفين ي ياشمعة عيني
---------------------------------------------------
خادم اهل البيت عليهم السلام عمار العيساوي
القصيدة السادسة
ام البنين اتگول
.
الوِداعك .. يُــمّـه بــداخْـلـي مـشـتــعــله نــيــران
الوِداعك ..چي گلبي احترگ صرْت احچي دُخّان
وراك امّ البـنـين
يـموّتها الحـنين
يَــيُـــمّــــه
--------------------------
تايْـــهــه ابكلمــة وداعــك ياهــو الِيــدلّيني
وأحــس ليـلة طـبُگ صارت بينك وما بيني
ابگلـبي چــن وجــّر مخيّــم منهو اليطفّيني
حسين احس دخّان هجرك شو بده يعميني
يَـيُمّه .. مــنّ اتروح يبــقه گلــبي مكسور
يَـيُمّه .. مثل گلب العقـيله ابعشره عاشور
البُعد لـمّن يحين
يمــوّتـها الحنين
يَــيُـــمّــــه
--------------------------
ابگلبي يايُمّه سوالف واستحي امن أحچيها
عــندي طــِلبه اتمــنّه مــنّك تـگدر اتسوّيها
ردِت قُطـــعه مــن ثِـــيابك عــندي اتخـلّيها
حــتّه من اشتاگ اشوفك يُمــّه أشتــم بيها
العِمامه .. لا مــاريدهـــا خــلّيها عـــندك
العِمامه .. بِدال الرمل حطـها جَوّه خدّك
المنيّه من تحين
يــمـوّتها الحنين
يَــيُـــمّــــه
--------------------------
من شفت ضعنك تحظّر گلبي حَس بفراگه
صرِت مثل الهـايمه اركض بـين ناگه وناگه
انته يمّي وجــاي أشـعـر يُمّــه الك مشتاگه
مــن تهاجر بـعــد أدري اويــاك مــا أتـلاگه
الونيني ..خدّي امن الدمع حسّيته محروگ
الونيني .. عـلى حالي يَـيــُمّه ونّــة الـنــوگ
واذا زاد الأنـين
يموّتها الحنين
يَــيُـــمّــــه
--------------------------
تـــره يــــا يـُمــّه وِداعـــك حايـره خـــلّاني
اتلعـثمت مَدري شگول اعلـيّه ضاع الساني
الضعن من حرّك جرحني هواي حيل اذّاني
چفّي حطـيته اعلـى گـلبي وأشّرت بالثاني
رحت وين .. يَـيُمـّه انچانّك صوتي سمعته
رحت وين .. احس ويّاك حتّه الهوه اخذته
ابغيابك عن يقين
يمــوّتها الحـنين
يَــيُـــمّــــه
--------------------------
انچانّك ناوي الرحيل وثوب هجرك لابس
الأربعه الويّاك فـدوه وهذا گلبي الخامس
بالحرب لو هُمّه طاحوا يـبقه يمّك حارس
اخذه يُمّه ما أريده عنــدي ماظل واهـس
حياتي .. ما احسِبها عندي والله يحسين
حياتي .. بدونك تره لا مـا تسوى فلسين
منو لمّك يعـين
يموّتها الحنين
يَــيُـــمّــــه
--------------------------
تمّت والحمد لله
حيدر تركي الكربلائي
القصيدة السابعة
روح يحسين .. ما أخــــــاف اعليك والعباس يمك
روح يحسين .. أربع أولادي انذرتهم فدوة لاسمك
أتوكل على الله إيحرسك الباري
كلمــــة گلتها والدمــع جـــاري
" روح يحسين "
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو تعرف احساسي من طلعت ضعونك سارحــــة بفكري أعيش اشلون دونك
آه لـــــــــــو مرّة تجي إعيوني بعيونك أحبس إدموعي أخــــــاف إيعذبونك
روح يحسين .. آنا عندي أسرار هالسفرة وخبرهه
روح يحسين .. كربلا اتنطرك وأعرفـــــك تنتظرهه
يا نـــــاري من اتروح يا ناري
كلمــــة گلتها والدمــع جـــاري
" روح يحسين "
**********************
حيدر اعلى السفرة هــاي شگد روالي چــــــــــان يحچي ودمعته بعينه تلالي
اطيوف هجرك چــــانت اتهاجم خيالي وهسه اشوفك للسفر گاصد يغـــــــالي
روح يحسين .. وآنا راح ابقى انتظر عيني اعلى بابي
روح يحسين .. خلهه تبـــدي بغيبتك قصّة عـــــــذابي
خليني أملّي بوجهك انظــــاري
كلمــــة گلتها والدمــع جـــاري
" روح يحسين "
**********************
چنت أشوف المرتضى ايوصي بعضيدك يبني يا عباس انـــا الهاليوم اريدك
اطني ايدك ، هـــاي بــــــاچر توگع ايدك راح يتـروّه النهــر من دم وريـدك
روح يحسين .. حيـــدر الكلّف بنيني ايحـــاوطـــونك
روح يحسين .. من زغرهم راضعين المــــوت دونك
هذي على الطف من علي اخباري
كلمــــة گلتها والدمــع جـــاري
" روح يحسين "
**********************
يالخذت روحي وصعب عالروح هجرك گلبي بـــــارد وابني عباس اعلى كترك
نحره يتقدم گبـــــل لا تنطي نحرك گتله لو تنظام زينب مــــــا اعذرك
روح يحسين .. لكن شبيدي اذا طايـــح تشوفه
روح يحسين .. والعذر لله اذا توگــــــع چفوفه
ساعتهه اريـــدك تقبل اعذاري
كلمــــة گلتها والدمــع جـــاري
" روح يحسين "
**********************
أختك الحرة علي يصعب هجرهــه والدك علمني شنهو الينتظرهه
باچـر من ايطيح عالشاطي گمرهه ريتني ويـــاكم وأشاركهه بأسرهه
روح يحسين .. بس أخذ دمعات عيني وياك أمانه
روح يحسين .. لزينب انطيهن اذا يوگــع لوانـه
كون وي ضعنك ناويه اسفاري
كلمــــة گلتها والدمــع جـــاري
" روح يحسين "
**********************
مثــل الاطفال اشبحت عيني وراكم روح والله ألي يصبرني بجفــــــاكم
عافني گليبي واظن ســـــافر معاكم ويلي ويلي شلون بأيامي بلاكم
روح يحسين .. باچر من يعود من الطف خبركم
روح يحسين .. راح يگـــــاني بمكاني وانتظركم
حد ما تعـــــاود باقيه اعباري
كلمــــة گلتها والدمــع جـــاري
" روح يحسين "
القصيدة الثامنة
انه حيل اتعذر من ام البنين // ماكو وصله قماش الم بيها الحسين
رايح اقره الفاتحه تسهيل امر
وابدي اسولف عالكطع راسه الشمر
***************
توه نام حسين مو واحد يكعده
جرح ابو اليمه كلف واشلون اظمده
ابساط مامش جوه جسم حسين امده
الرمل حار ويجوي خاف الرمل خده
الخيل شمسويه الله لا ينطيها // ليش محد كام صاح اعليها
رايح احسب جم ضلع بي منكسر
وابدي اسولف عالكطع راسه الشمر
***************
شفت طفله تعاتب بحلو المحاجي
وعالترب مطروح ابوها ودمه زاجي
جنه راح ايطك كلبها امن البواجي
ياهو منكم دنت نفسه اعله التراجي
اجفوف اديها ازغار مو مالت حبل // زحمه ترفع صوط وطكلك طفل
انه بمصيبة رقيه كلت امر
وابدي اسولف عالكطع راسه الشمر
**************
من رخصتك صحت يا بدر العشيره
الحرمه عند العرب من تنطك جبيره
اهنا يخو زينب خذو زينب اسيره
وكت يحدي بزينب الما عنده غيره
كوم عوف الماي ورجع للخيم // مو محل فركه يشيال العلم
اشلون انسه زينب وسبي الخدر
وابدي اسولف عالكطع راسه الشمر
***************
انه حيل اعتذر عن هاي القصيده
لاجن اشبيدي عله الحزو وريده
حسين محد شاف منكم اصبع ايده
ياهو اليدليني ونطيه اليريده
ياهو لابس محبسه روحوله // دوم ما لايك عليه كلوله
خل ينزعه ولا يضل بي يفتخر
وابدي اسولف عالكطع راسه الشمر
****************
انه كلش مستحي من امه الزجيه
خاف انهي المجلس وتزعل عليه
يا قصيده اتشوفني الزمها بديه
اتكلي حته لو كضت اقراها اليه
اتكلي ليش حسين محد شاله // ومن حرارة الشمس فياله
اشراح للزهره اقدم من عذر
وابدي اسولف عالكطع راسه الشمر
*************
جني شفت الحسن طب وشاحب اللون
وسلم اعله ام البنين وتجري العيون
كلها هذا الحسن يال عنه تنشدون
وكامو اعله حسين بالمجلس يلطمون
شفته طب للمجلس وحافي الجدم // وصاح اخوي اشلون واليته الزلم
مدري اعرج عالحسن ودمي الصدر
وابدي اسولف عالكطع راسه الشمر
**************
تمت
تحسين الخفاجي
الناشر #ملا_داود_الكربلائي
القصيدة التاسعة
براء العبيدي:
ضحيت ابعرش وربع كواكب
اريدنه الزلم تنصب مواكب
الغيمه ابعيدة عل عين
اتقلدك تبجي لحسين
______________________________
ضحيت أبولد بس الولد ما ودعوني
عرفوا ابجي من الفركه عرفو ما اجوني
من راحو ضلام البيت من راحو ولوني
ونعى حتا أجر الحسره ونعى مادروني
عل فركه الدمع ساكب عليه
وتون العلية عن رقيه
نكضي الفركه بونين
اتقلدك تبجي لحسين
_______________
كتلهى الدمع يعمي الدمع من علمتهى
كالت ابجي لختي هيى كالت وفهمتهى
ضلت تبجي عنهى هيا ضلت وحضنتهى
شوكت هل كلب هطفله شوكتني لهلهى
نزلت دمعي بحساس
كاسر ضهري عباس
جسمه ابلايه جفين
تمطر تبجي لحسين
__________________
من راح وهجر اذا الكلب عباس من راح
يبجي يداوي جرحي وجرحي يشرب حتا يرتاح
وإني بهل مصيبه ول مصيبه ابني من طاح
عمره ابعمر ورده اشون ورده ابتربه تنساح
ضحيته وفراكه ابكلبي لجمه
يرخص ابني لجله لبو اليمه
اضحي أولادي مرتين
اتقلدك تبجي لحسين
__________________
وحشه البيت مدري الوحشه تكرب مني جنه
اسولف وي خيالي الوحشة تبجي ياهو عنه
ادكلي انتي الطمي وإني الطم علا سكنه
ذكرت هل عليله ول عليله أزيد ونه
ذكرته وبجت هاي الحنينه
ضلت تنحب اصيح سكينه
فوك الهم صفى ثنين
اتقلدك تبجي لحسين
___________________
وصيت الكواكب عن اختهم بل وصيه
كتلهم اريد الزهره ما تزعل عليه
كلولي ومشو كلولي تئمرنى الزجيه
كتلهم بعد ولدي وبعد تربات اديه
تربات العرش ول ولي
انتو شهامت علي
ذاك الضحه عل دين
تقلدك تبجي لحسين
عن أم البنين
براء العبيدي
القصيدة العاشرة
لكربله من كتله أروح أوياك صد ليه بألم
بكلبه هيجت ألجروح وشفت بعيونه الخيم
يمه ابقي بالمدينه ــــــــــــــــ كلي ويصب دمع عينه
وشفت بعيونه الخيم
@@@@@@@@@@
كلت لوحـان الـوداع اشلون والمـوقـف صـعب
المهم يم احسين أخفي كل دمع عيني اليصب
حَسبت اوكــف قــــويه وكتلــــه اصــبر ياكلب
لجن بس اســـمعت صــوته تيهت مين الدرب
الجان لوماشوفه ساعه ماأعدهه امن العمر
هالأجت لحظة وداعه وريت ميته وبالكبر
فركتج تصعب علينه ـــــــــــــــــــــ كلي ويصب دمع عينه
@@@@@@@@@@
من تغير لونه وجهي عرف شنهو مطلبي
وقبل لاأقــــسم عليه وقبل لا ذب معصبي
كلي رجعـــي يمه خـالي لايظل بيت النبي
وانه ادري اعليه خاف ابكربله من السبي
يحجي وياي واشـــوف عالنهر مرمي العلم
وجني وياه بالطفــوف ومشهد الباب انرسم
لايعود الصار بينه ـــــــــــــــــــــــ كلي ويصب دمع عينه
@@@@@@@@@@@
جنت اكل لدموعي صبرن لومشه صبن دمه
لجن من ناده الــــوداع صحت وينج فـاطمه
انه مااكدر أودعه ادخــيل نزلي امن الســمه
صعب هالمــوقف عليه وانه عدكم خــادمه
كلمة اليمه بلسانه تختلف عن هالكلام
موش كلمن كال يمه مثل لوكال ألامام
مامثل عطفه وحنينه ـــــــــــــــــــــــ كلي ويصب دمع عينه
@@@@@@@@@@
شمـا أكله اويـــاك أخذني انظر بعينه صور
خلف باب الدار اسمع ضلعي يافضه انكسر
صوت زينب ليش اسمعه بكربله ويم النهر
نفس قصتهه الزجيـــه اشما أددقق بالنظر
أمشي وياه مايريد لكربله اعرفت السبب
بيهه بسمار ويزيد اهناك يجمع بالحطب
وحرمله السوط بيمينه ـــــــــــــــــ كلي ويصب دمع عينه
@@@@@@@@@@@
نفس قنفذ حرمله وصعبه اشـــاهد هاللعين
عله أمي يشيل سوطه بعيني اشوفه مرتين
انتي مثــــــل أمي ييمه نـــــاده ياأم البنين
بكربله صعبه اشوفج ويه زينب تنسبين
يحجي وانه بعينه اشوف راجع امن المشرعه
ينادي كطــــعوهه الـــــجفـوف آه يم الاربعه
صعبه ابنج تنظرينه ـــــــــــــــــــ كلي ويصب دمع عينه
وشفت بعيونه الخيم
@@@@
جبار البطاط
القصيدة الحاديه عشر
أنطر اخبار .. واتاني .. أنطر اخبار
عگبك اندار .. زماني .. عگبك اندار
دمعي من عيني يصُب
يا من افراگــــك صعُب
أنطر اخبار .. أنطر اخبار
1
آه يحسين الدمع مـن عيني جاري
ما أظـن والله عگبـــك تطفه ناري
خادِمه ابيتـك چنـــت هذا افتخاري
شلون يمه اتعوفني ابظيم انتظاري
چن جمر نار .. والمه .. چن جمر نار
شوگي لو ثار .. ييمه .. شوگي لو ثار
عيني دوم اعله الدرب
يا من افراگــــك صعب
أنطر اخبار .. أنطر اخبار
2
آه يحسيـن الگلـُــب دوهنلـــــي حالي
نبضه نبضه ايصيــــح لا ترحل يغالي
من شفت ضعنك مشه مدري شجرالي
طحت عالگاع وصِــــرت مشدوه بالي
حس بالمصاب .. دليلي .. حس بالمصاب
بست التراب .. يويلــــــي .. بست التراب
رايح الأرض الــغــُرب
يا من افراگــــك صعُب
أنطر اخبار .. أنطر اخبار
3
آآآه يوليـدي المدامــــــع هم شفتهـه
من جرت ساعــــــة وداعك عاينتهه
ذكريات اهـــــواي ويـــــاك اذكرتهه
هوايه لحظات ابوجـودك من عشتهه
يبني لحظات .. رهيبه .. يبني لحظات
والعذابات .. مصيبه .. والعذابات
تضرب ابچبدي ضرُب
يا من افراگــــك صعُب
أنطر اخبار أنطـر اخبار
4
يبني ظلمه الدنيــــــه صارت بالمدينه
والمعالم كلها بفـــــــــــــــراگك حزينه
كل أماكنها تنـــــــــــادي احسين وينه
وآنه صرت ابـــــــــدار أحزاني رهينه
راسي مو شاب .. يغالي .. راسي مو شاب
عيني عالباب .. يوالـــــــي .. عيني عالباب
فكري كل ساعـه تِطـُب
يا مـن افراگــــك صعُب
أنطر اخبار .. أنطر اخبار
5
يبني من گبر الزچيه اسمعــت ونه
شلون تگدر تبتعِـد يا ضنوه عنــّه
اسمع الزهره تِنادي وبيهـــه حَنـّه
راحل الصوب المنيه اوليدي چنه ؟
أمك اتصيح .. أمانــــــه .. أمك اتصيح
دمك ايسيح .. خيانــــــه .. دمك ايسيح
عيني دم تجري غصُب
يا مـن افراگــــك صعُب
أنطر اخبار .. أنطر اخبار
6
يبني يالغالـــــي الگلـــب يمَّـك سروره
والگلب لو حب بشــــر يهنه ابحظوره
تدري لنك سافـِــــــــــــرت أحتار حيره
للهظم والظيــــــــــــم راح ابگه أسيره
أبگه أتناك .. مُنايه .. أبگه اتناك
ولدي ويّاك .. حمايه .. ولدي ويّاك
ردلي يبني عـن قــُرُب
يا من افراگــــك صعب
أنطر اخبار .. أنطر اخبار
بقلم : زكي الياسري النجفي
القصيدة الثانية عشر
أم البنين بصوت نادت على الوفــــــاد--- خبروني عن حســــين طول علي البعاد
ما وصلت ألنـه أخبـار-------بكلبــــــــي لهيب النـار
******
بقت بالدار مهمــومــــة ---- وصبــرها كــام ياذيــــــها
تباري عيالـــــهم ظـلت ---- وعلــى الفركــــه تسليـها
وتكلهم هســــه يلفونـــه ---- وتتعثــــــــر محـاجيـــــها
تضم العبرة من تحجـي ---- والدمعــــــــة تواريــــــها
هسه تجي الأحباب وأحضى بجمعهم --- وبروحـــــــــي جنه اليوم يلتم شــملهم
ألبيــــهم زهيــــة الدار--------بكلبــــــــي لهيب النـار
******
كلبـــها كام يأذيــــــــــــها---- لمن طالت الغيبــــــــــة
ومنهــــم ما رجـــع طارش---- كلبــها أم الوفــه بريبــــه
تفكـــــــر ظلت بزينب ----وضعنهم ياهو أليجيبـــــــــــه
ياهــــو ليرجــــع وياهــا ---- وهيــــه بديـــــرة الغريبــة
يا هــو ليرد للـــدار ويرد ضعـــــــنها --- تنخــــه بعلي الكــــرار وتبث حزنها
نادت علـــــــي الكرار--------بكلبـــــــــي لهيب النـار
******
ولمن كوطــــر الناعـــي ---- شـايل بالســــواد أعــلام
ينـــــادي يا أهل يثرب ---- ذبحـوا منهــــج الأســــلام
حسين عللرمح راسـه ---- ترفعـــــــــه زمرة الظـــلام
وخذوها عياله مسبيـه ---- من الكوفة لبلاد الشـــــــــام
طب للمدينة أيصيح الناعي وينادي --- وأم البنين تصـيح ريض يحـادي
أحچيلي شنهـي لصار---------بكلبـــــــــي لهيب النـار
******
صــــاحت يا أبن حــــــذلم ---- أجيت اسـأل على أبني
حسين أحچيلي شخباره ---- والله فراكــــــــه شـــــيبني
وليدي بيا وضع عفتــــــه ---- أحچـــــــــي ولا تعذبني
كلـــــي شلونها أحوالـــــه ---- مانـــي البيــــــن تعبني
ليها أندهش مذهول من ناشــــدته ---- ورد يســــأل الجمـهور من هــــي لفته
أم أربـــــــــــــع الأقمار ---------- بكلبــــــــي لهيب النـار
******
جاوبها برفيـــــــع الصوت ---- وعبرتـــه خانكه الأنفاس
ثلث تنعـــام من ولـــــدج ---- ياحـرة والله رفعـــة راس
يشـــــــــاهد حالــها تغيـر ---- وضجت بــالنحيب الناس
من ســولف علـى الكافل ---- أبنها الضيغـــــــم العباس
ظلت تدك عالراس وتهل دمعـــها ---- تكَله فده لحســـين ولدي بجمعــــها
منها الدمع مـــــــدرار ---------- بكلبــــــــي لهيب النـار
******
طفح من الجفن دمعــــــة ---- مــن أردود حاچــــــــــته
ما ســـــألك علـــى ولدي ---- يا ناعـي كلبي فطــــــرته
عن حسـين أنشـــــــدنك ---- وعن أم الخـــــدر أخـــــته
يكـل ألــــها أنذبح بالطف ---- وضعنـــــه الكوم ســــلبته
بالغاضــريه الكــوم حزوا وريــده ----- وزينب مشت للشـام بحسرة وحيدة
تحدي لضعن الأشرار ---------- بكلبــــــــي لهيب النـار
*******************
شاعر أهل البيت
الشيخ عبد الحسين المنصوري
القصيدة الثالثة عشر
ودّعتني
ودّعتني .. وآنه ماحبّ الوداع وتدري بيّه
ودّعتني .. أســأل الله سالم ايـردّك علـيّه
تدري گلب امّ البنين
واشكثر شايل حنين
ودّعتني
-----------------------------------------
علـى افـراگك يمّـه تـدري والله ما بيّه صبر
للصـلاه لـو رحت انته ابقى احـسّب وانـتظر
آنه احـسّ الله خلـقني ولجلـك انطاني العمر
من تروح اتروح روحي وجسمي يسكن بالگبر
ودّعتني .. شـو احسّك يـمّه رايـح للمـنيّه
ودّعتني .. ويتّمـتني گبـل مَـتْـيَـتّم رقـيّه
واستمع صوت الأنين
واشكثر شـايل حنين
ودّعتني
-----------------------------------------
گلبي من كثر المحـنّه يندعي وشايل ايديْه
يالنويت اتـروح عـنّه هـم تـرد ثاني وتجيه
يمـّه التراب الـتدوسه اتعوّدت اسـجد عليه
تربه سوّيته لصلاتي واشـكثر معـتزّه بـيه
ودّعتني .. وراح اظل كل عمري اصلّي يمّه يمّه
ودّعتني .. حـتّه عطـرك لَمن اسجـد آنـه اشمّه
ويطبع اسمك بالجبين
واشـكثر شايل حنين
ودّعتني
-----------------------------------------
چـنِت منّ اتـنام يمّه عيـوني ما تـرضه تـنام
اگعــد اگــبالك أراقــب خايْـفه مـنّ الختام
جـاي يتنـفّــس أگـول الحــمدُ لله الإمــام
منّ اشوف انفاسك آني والله أشعر بالسلام
ودّعتني .. كلشي بيّه ايصيح لا ترحل يغالي
ودّعتني .. تـره ما ترحـمني يا يـمّه الليالي
آني أدري وعن يقين
واشكثر شايل حنين
ودّعتني-
----------------------------------------
كلشي بيّه الـباري خـالق والله لجلـك يالـحبيب
عيوني من أجلك خلقهن حتّه بيك اشعر قريب
بعـد عيـنك شـلّي بيهن وانته نــاوي عالمــغيب
اخـذ گلـبي اوياك منّـي اولا تظــل يمه غــريب
ودّعتني .. اوياك اخذ روحي واخذ أربع بنيني
ودّعتني .. المـهم سالـم تـرد انتـه وتجيــني
گلبي ينطُر لو سنين
واشكثر شايل حنين
ودّعتني
-----------------------------------------
يوم لو ماشوفك آني الدنيه احس ما بيها نور
مااوصّـفلك شعـوري انـته تـدري بالشعور
أگصـد البـيـتك أطـوفه واگعـد ابّـابـك أزور
وابـقى أدعـي يا إلهـي ربّي عجّـلله الظهور
ودّعتني .. راح اظل آنه انتظر ليلي ونهاري
ودّعتني .. وبـدعاء الـفرج أدعـي بانتظـاري
والفرج يمـته يحين
واشكثر شايل حنين
ودّعتني
-----------------------------------------
بخاطْري شي وارد اگلّك منّه خجلانه وعلي
اوياك خاف امقصره آني الذمّه ابـريها إلي
اتدللي يــمّ البنــين اتگـلّـي دوم اتــدللي
لا تـجامـلني أحلفك خـلّي همــّي ينجــلي
ودّعتني .. خــاف مــرّه قصـّرت ويّــاك آني
ودّعتني .. انطيني فرصه من ترد يا يمّه ثاني
مـنو دلاّلـي يعـين
واشكثر شايل حنين
ودّعتني
-----------------------------------------
تمّت والحمد لله
حيدر تركي الكربلائي
القصيدة الرابعة عشر
جرح واحد لجمني ومايصير اثنين
خبر ناعي المدينه وينعه ابني احسين
سكنت الحود --- اريده ايعود
خبر ناعي المدينه وينعه ابني احسين
*
شتلت الروح شجره وماتنحيت
تظل تنطر رجوعك ياضوه البيت
عله اعتاب القدر اقمار وديت
فداك اربع بنيني وكون وفيت
فديتك يامجد يامفخر الثايه
الك عباس انذر حامل الرايه
نذرت ازنود --- اريده ايعود
خبر ناعي المدينه وينعه ابني احسين
*
غريب الدار ضل موحش بلياك
تفجر كل ركن ينخاك يرجاك
الك رجعه وتعاود يطلب احماك
الوطن غربه برحيلك يرحل وياك
تخليني اعله ركبك يلنويت اتروح
مهب الشوك غرد ينتحب مجروح
القلب مشدود --- اريده ايعود
خبر ناعي المدينه وينعه ابني احسين
*
الدهر زلزل عصوره بجمرة البين
يون يصرخ يصيح الله يحسين
يامعجزة العجايب دربك امنين
يمن جرحك يرادف دمعة العين
طبع دمع اليفارك واجب انشوفه
حفر خد الوطيه ابدمعه مذروفه
الليالي شهود --- اريده ايعود
خبر ناعي المدينه وينعه ابني احسين
*
اعد جروح شوكي بهدوة الليل
طفح موج النوايب صهلت الخيل
فزعت بهالخبر والمدمع يسيل
غرق عقل الظنون وهدم الحيل
النفس جاشت غريبه الفركه مالومه
وتشتت سر قضيتي واحمل اهمومه
المنايه اوعود --- اريده ايعود
خبر ناعي المدينه وينعه ابني احسين
*
تجف جروح شمسي وشغلت البال
انه أم عباس همي أيهد الجبال
مضه سهم المنيه بصدري جتال
بنحيبك يبن حذلم عذب الحال
انذبح يحسين بإسمك لمن ايصيحك
ويذبل عودي يتنفس مهب ريحك
تهزني أعهود ... اريده ايعود
خبر ناعي المدينه وينعه ابني احسين
....
قضيتي احسين ضلت جرح الأيام
اوابد ما يضمد و لا يبره يلتام
الزمن موسهم صوب صوب اسهام
من اشوف الضعن رد ابحرم وأيتام
الدمع سال اعله روحك علقلب سلم
تظل جرحي الوحيد ولجلك اتألم
ترد اردود... اريده ايعود
خبرناعي المدينه وينعه ابني احسين
..... ..... ..... ..... ...... ....
الحاج سامي الكعبي
القصيدة الخامسة عشر
انه ام البنين الچانو يسموني
بالحزن لو اگضي عمري لا تلوموني
اربعه ويَ حسين **** طاحو على البين
بالحزن لو اگضي عمري لا تلوموني
(١)
بالموادع گعدت وياه أودع زهرة سنيني
گلتله المن تريد اتروح وبعد المن تخليني
يبو السجاد مانه أمك وخدمتك يا نضر عيني
تريد اشلون أضل هنا وحيده مفارگه حسيني
صحت بألم وبنوح **** المن تريد اتروح
بالحزن لو اگضي عمري لا تلوموني
(٢)
رحت يم زينب انه اشكي ومطر عيني يفيض أعتاب
يزينب مانه وصاني عليچ وگلي داحي الباب
لو رادت تروح ألطف تلاگي هناك أشد امصاب
تشوف حسين يتوذر وبدره على النهر لو غاب
گلبي ابفگدكم ذاب **** من رحتو يا لأحباب
بالحزن لو اگضي عمري لا تلوموني
(٣)
يبو فاضل أوصيكم أختكم لا تتركوهَ
عزيزه مخدره زينب أريدن كون تفدوهَ
ولو تدرون شنهي يصير بعد المن اخذتوهَ
ييمه ومن بعد عينك أخاف اعداك يولوهَ
لو يسروهَ هناك **** وصاحت يخويه انخاك
بالحزن لو اگضي عمري لا تلوموني
(٤)
رحل ضعن الهواشم عني وانه بليل
تنوح وتشتكي عيوني وعليهم دمعي ضل ايسيل
واجتني اخبار هدتني وصحت ياويلي آه يا ويل
علَ صدر حسين تتسابك يگلولي حوافر خيل
اوما بگت وليان **** طاحت عل تربان
بالحزن لو اگضي عمري لا تلوموني
(٥)
يگلولي بطريق الشام زينب أختك اخذوهَ
يعباس الوعد وينه صحت اشلون يسروهَ
وصحت يبني ابمضايفهم صدك يوليدي وَكفوهَ
وابن مرجانه واتباعه كامو ليه شتموهَ
وصاحت يبو النوماس **** ياخويه يا عباس
بالحزن لو اگضي عمري لا تلوموني
طارق ابو محمد السماوي
القصيدة السادسة عشر
يا رايحين الكربله هاكم اعيوني ما لحظه يلفيني الوسن من تتركوني
تلفيني الظنون لمن تروحون هاكم اعيوني
------------------------------------------------------------
من جهّز حسين الظعن ناوي عالطلعه
ام البنين الاربعه وكفت اتودعه
تدري الظعينه راحله ما بعد رجعه
واولادها ابهذا السفر كلها متكطعه
صاحت يناوين السفر ارد اناشدكم لو نفترض طال الهجر من يرد منكم
يمته تعودون لمن تروحون هاكم اعيوني
---------------------------------------------------------
صاحت يولدي الاربعه ارد اوصّيكم
دون الحسـيــن الكربله راح اوديــكم
عشكَ ام عشكَته وقررت لاجله افديكم
يــم فاطمه بـاجــر اريــد افتخر بيكم
يا جعفر افديها النفس دون ابو اليمه وعثمان كل دمك فده الكطره من دمه
لا لاتكصرون لمن تروحون هاكم اعيوني
----------------------------------------------------------
عبد الله يوليدي العمر زائل وفاني
وحسين واحد بالارض ما اله ثاني
لحسين ترخص مهجتك علي وصاني
و لحسين كل احـنــه فـده انـتـم وآني
عباس انته عزوتي وانته نوماسي لمن تضحي ابكربله يرتفع راسي
وانته فلا اتهون لمن تروحون هاكم اعيوني
-------------------------------------------------------
صاحت يعباس وبجت نزلت العبره
كال الها اعرف غايتج وادري ياحره
ترديني اضحي ابكربله لضنوة الزهره
كالتله قـدمـتـك فـده نـحـرك ابـنـحـره
يوليدي لو زاد الخطر قدّم اجفوفك ولو شفته يحتاج الامر لا تعز شوفك
ما تسوه العيون لمن تروحون هاكم اعيوني
-------------------------------------------------------
حب راسها ودك الصدر لمن اتبسّم
كَر عينها وسال العلم جفه الموزم
كال الها ابنج من علي جان يتعلم
لخلي وادي كربله يغركَ امن الدم
اطبكها يسره وميمنه وارجع اطويها اخبطها بجفوفي وارد بسيفي اصفيها
اتكله يغدرون لمن تروحون هاكم اعيوني
--------------------------------------------------------
يوليدي ادري لو رحت توفي بوعودك
وادري تجيب العلكمي وجاريّه ابجودك
وادريك وي سبط النبي تلزم اعهودك
وعالماي يم المشرعه ترخص ازنودك
اخوه انتوا كلكم فد صلب علي والدكم بس انتوا خدام ويظل حسين سيدكم
وكلكم تضحون لمن تروحون هاكم اعيوني
-------------------------------------------------------------
خادم اهل البيت عليهم السلام عمار العيساوي
القصيدة السابعة عشر
ندمانه كل عمري اظل ندمانه المفروض ويّه احبابي اسافر آنه
بعـد ويـن الگاهم
مو سهل فرگاهم
آنه امّ البنين
----------------------------
من حضّر حسين الظعن واعليه تصـدّ اعيوني
حسـّيت آنـه بالـحزن مـن صـاروا ايـودعوني
مَدري اظلّ ابحـيرتي مَـدري اگـول اخذوني
والنـاس مـن ذاك الوكـت امّ الحـزن يدعوني
للفرگه هاذي ماحسبْت احسابي من هاجروني الكربله احبابي
ما گِدَرْت انـساهم
مو سهل فرگاهم
آنه امّ البنين
----------------------------
بعـيوني محـبوسه صور ما تنمحي ذكراها
زينب مشت ويّه الضعن ما اگدر آنه اناسها
مـن ودِّعَتني امّ الخدر ما رحِت ليش اوياها
حتـى اذا راحت سـبي بالـدرب آنـه ارعاها
واجعلها زينب بت علي بعيوني والسوط لو ضربوها بي يعموني
وانسـبي ويّـاهم
مو سهل فرگاهم
آنه امّ البنين
----------------------------
اعله اولادي والله من مشو دلاّلي صاير جمره
بغــيابهم مـا فكّرِت بحسـين عگـلي وفــكره
عبّاس اخاف اويه اخوته يفشلوني ويّه الزهره
أتمـنه أوصل للگمر وبعـيني اصـدله ابنـظره
نظراتي يعلم ابو فاضل بيها اوصيّتي يتذكّرها اذا ناسيها
ابشوفتي ذكراهم
مو سهل فرگاهم
آنه امّ البنين
----------------------------
وصّـيت وِلْـدي الأربـعه لحـسينهم يــفدونه
وبالأخص عـبّاس الگمر وصّيته يفدي اعيونه
يحْـرَم عليـكم مرضـعي لــو وحـّده اتخلّونه
مشــكولــه ذمّتـكم إذا عـدلين وايمـسـّونه
ها ولدي لـَـتخلـّـون اخوكم وحده مَيتين كون ولا يطيح ابشدّه
كون هسّه اوياهم
مو سهل فرگاهم
آنه امّ البنين
----------------------------
شعـندي بقـيت ابديرتي ويّايه ما ظل والي
ما تسوه هالدنيه بعد من راح عـنّي الغالي
ويحسين وسفه مارحت ظلّيـت الوم ابحالي
لو رايحه اوياهم أنا مـشغول ما ظـل بالي
ابشوفته كل لحظه اكحْل اعيوني مثل امّه مشتاگه إله وتدروني
حسين ولدي اغلاهم
مو سـهل فثرگاهم
آنه امّ البنين
----------------------------
اهوايه انتظرْت وما إجوا منهم خبر ما جاني
درب الطـفوف ابيا كتر أرْد امـشي ليهم آني
ابهـجر الأحبّه امـجرّحه هــذا الزمـن خلاّني
لو رايحـه امّ الأربعه ما چـان هـسّه اتــعاني
كل عمري راح ابقى ألوم ابروحي ** ما تبره للتالي تظلّ اجروحي
دمعي ما وافاهم
مو سهل فرگاهم
آنه امّ البنين
----------------------------
تمّت والحمد لله
خادم الحسين حيدر تركي الكربلائي
القصيدة الثامنة عشر
ياام الصبر هذا العمر لجــــلج هديه
جي ويه النبي وحيدر علي جنتي وفيه
بالخدمه شرفنه حتى لو نزفنه لجلج هديه
********
نقسملج قسم اعظم قسم بيج افتـــخرنه
من صبرج على ظلم الوكت ينخط صبرنه
نكتبلج شعر باحله الجمل من دم حبرنه
تبقه امحبتج وسط الكلب لاخر عمرنه
انتي حاضره وحيدر علي ايسجل اليعزون
يسجل كل محب كلبه حزن ويهل العيون
بالهمه انعرفنه حتى لو نزفنه لجلج هديه
*********
نقسم بالنبي ودم الوصي مايــــوم نرتد
يظل هذا القسم لاخر نفس يالحُره يمتد
احنه بهالدرب ويه النهج كلنه انتوحد
الليله بمجلسج ندري حضر قائم مُحمد
حاضر بالحزن ويهل دمع ويشوف الانصار
يسجل بالسجل كلمن حضر ويواسي الاطهار
يعجز كل وصفنه حتى لو نزفنه لجلج هديه
********
عشتي اويه الوصي بطيبه وشرف لنج اصيله
وخلصتي العمر نوح وصبر ويه العقيله
وكلبج بالقهر ومن الهضم منهدم حيله
ومن كثر الحزن ويه الالم روحج عليله
تحضر مجلسج وتهل دمع فاطمه الزهره
وياهه اجينه بهالعزه نسجب العبره
طف حسين طفنه حتى لو نزفنه لجلج هديه
******
من راح الولي وبعده الحسن دمعاتج اتلوب
وتدرين الدمه وهذا الجره باللوح مكتوب
شما جار الزمن مهمه جره ودنياج مكلوب
من حب النبي وال النبي كلبج فلا ايتوب
انتي بالوفه يم الوفه صـــــــرتي علامه
علمتي البنين الاربعـــه غيره وشهامه
دربج وي دربنه حتى لو نزفنه لجلج هديه
*******
دومج صابره ومتحيره وملتزمه بالدين
كلهه تفتخر بيج ابفخر عترة الطيبين
ماهمج ابد اربع ولد فكرج بالحسين
تذكر هالمواقف بالوفه كل الموالين
انتي بالصبر ويه العزم صرتي مدارس
لجلج بالحزن شيعة علي اتقيم المجالس
مايوم احنه خفنه * * حتى لو نزفنه لجلج هديه
*******
الغيره ومرجله هذا الحجي اخر وصيه
وصيتي البنين اعله الهمم بالغاضريه
يضحون النفس ويه الدمه لابن الزجيه
ويمشونه بشرف وبكل فخر درب المنيه
هذا موقفج يالصابره تشهدله الاطفوف
ويشهدله العلم ويه النظر تشهدله الجفوف
ماننسه هدفنه حتى لو نزفنه لجلج هديه
************
ابو لقاء البهادلي
لي طلب عندك ياخادم الحسين ان تفضلت علي ولبيته وهو قراءة الفاتحة لام البنين عليها السلام بنية توفيقي لخدمة الحسين عليه السلام وشكرا من قلبي لكل من لبالي هذا الطلب
اترك تعليق بهذا الشكل (قصيدة مكتوبة لام البنين )لتساهم بنشر هذه القصائد
لطميات مكتوبه لام البنين مكتوبة
ردحذف