مجموعة من القصائد المكتوبة لام البنين عليها السلام
(مقدمات)
القصيدة الاولى
اّنه والبنين **** نخدم الحسين
بيه رضه سيد نخدم الحسين
**************
حيدر اختار اللقب من احسن القاب
اربع شباب الخلفت تخدم بالاطياب
تربو بغيره وعزم من داحي الباب
للعقيله والحسن وحسين الاحباب
منهاج الولي * غيره ماالي
وصه بيه حامي الحميه نخدم الحسين
*************
اّنه غذيت الولد غيره اويــه ايمان
وابني عباس الشهم عنوانه وجدان
بعده عبدالله اجه وجعفر وعثمـــان
ادري وكت الموزمه ابطال شجعان
تربات الامير * اصحاب الضمير
نوفي للزهره الزجيه نخدم الحسين
**************
حيدر ايوصي الگمر بحسينه وصاه
گله انته واخوتك بـــــــالروح تفداه
ترفع انته رايته وتمشي اعله ممشاه
تبقه والاخـــــر نفـــس يوليدي وياه
وبهذا الخبر * محتوم القدر
بغيره والنفس الابيه ** نخدم الحسين
************
روحي وياهم مشت من سرت الضعون
ولدي خلوني ومشو بالضعن يحـــدون
همه فدوه والضــــعن لحسين يرحون
ردته بس يرجع ألي والباقي يمشون
عمري مايفيد * غيره مااريد
هاذي ياشيعه هويه * نخدم الحسين
*********
من وصل ناعي الطفوف ارض المدينه
گلي اشوفنج عله ولـــــــدج حزينـــه
گتله هونك يابشر الحــــــــسين وينه
ولدي كلهم الاربـــــــــعه فدوه الولينه
مخضب بالدمه * وتنوح السمه
اّنه واولادي ضحيه * نخدم الحسين
**********
ابو لقاء البهادلي
القصيدة الثانية
رابع إبعاشور هاليوم === للوفيـّه نذكـــر إهموم
ما نسينه === ما نسينه
ـــــــــــــــــــــــــــــــــــــــــــــــــ
للوفيـّه نذكر إهموم الليالي
بالمدينه من ﺑﮔت وإبغير والي
ودّعوها الأربعه أهل المعالي
والحبيب إحسين بيته ناح خالي
نادت إو دم تجري العيون === يابنينــــــــــــــي لاتقصرون
هاي إختكـُم لاتـُطب حوم === للوفيــّه نذكـــــــــر إهموم
ما نسينه === ما نسينه
ـــ
للوفيــّه إم البنين اﻠﺣﮓ يشيعه
عاهدت حيدر علي توفي إو تطيعه
رضعت الأولاد حـُب إبن الشفيعه
والحزن خيــّم عليها إمن الفجيعه
من تركها إحسين بالنوح === وإنملت آهــــــــات وإجروح
واﻠﮔلب مجروح ﻣﻠﭼـوم === للوفيــّه نذكـــــــــر إهموم
ما نسينه === ما نسينه
ـــ
للوفيـّه نذكر إنشارك حزنها
نذكر إوياها الذبيح إحسين إبنها
إنجرح من الدمع ينزف جفنها
ما بعد ﺗﮔـدر وﮔﻊ وإنهد ركنها
عالأرض ترسمها إﻠﮔبور === والبقيـــــــع إينادي منحور
هاي أم عبـّاس ياﮔـوم === للوفيــّه نذكـــــــــر إهموم
ما نسينه === ما نسينه
ــــ
للوفيـّه إدموع ما ينشف نهرها
للأبد ما ينتهي الطيبه كَدَرها
تنتظر إبن الحسن يبني أثرها
يطرد ألأرجاس عنها إو شر بَشَرها
ينصب المأتم أبو الثــــار === يم ﮔبرها إيغيض الأشرار
ما يظل ملعون مذموم === للوفيــّه نذكـــــــــر إهموم
ما نسينه === ما نسينه
ــــ
للوفيـّه إجروح نشفيها إبعهدنه
ما نعوف الداعشيـّه إبنص بلدنه
للجهاد إنسير والمهدي سندنه
ننتصر حيدر علي إبهذا وعدنه
والعزم من زود عبـّاس === وإبجهـــــاده نرفع الراس
نشكر أم عبــّاس للدوم === للوفيــّه نذكـــــــــر إهموم
ما نسينه === ما نسينه
ــــــــــــــــــــــــــــــــــــــــــ
مع تحيات شاعر اهل البيت / جابر النجفي
القصيدة الثالثة
يملك الموت جاوبني == ميت لوعدل ابني؟
(( مثل مابشرت يعكوب بشرني))
ـــــــــــــــــــــــــــ
لمن رحل عنهه وضاعت أخباره
وحست مايعــود احسين لدياره
رفعت لله أديهه بدمعه تتجاره
وملك الموت رادت منه ألابشاره
ملك الموت مر بيهه == وظل يبجي ويواسيهه
تكله ليش تبجي هيجت حزني
مثل مابشرت يعكوب بشرني
ــــــــــــــــــــــــــ
تكله لــيش غطــــــاك الحـــزن والهم
بحــــال أبني اظـنـــــــك يامــــلك تعلم
انــه الـــــوالده ومــن حـــكي أتـــألم
عله ابني شصار حته ودمعتك من دم
شفت وضعك مثل وضعي == دمعك صب قبل دمعي
عله احسين انه انشدك لاتخوفني
مثل مابشرت يعــــــكوب بشرني
ـــــــــــــــــــــــــ
عليك الله يملك المــوت حاجيني
انه الفاكده ومــعــذوره تدريني
خبر ماجاني منه وناري تجويني
عيني اتظل تراقب كل درب عيني
أم وعيني ماتغفه == وعذابي ونوحي شيوصفه
فاركت الصبر لمن رحل عني
مثل مابـشرت يعكوب بشرني
ــــــــــــــــــــــــــ
انه أدري النبي يعقـوب جاوبته
كتله عدل يوســــف يوم بشرته
انا يوسف الزهره الذي ضيعته
واعيوني انعمن من يوم فاركته
يمن يعكوب بشرته == تطفي ناري جا يمته
تدري لاخبر جاني ويصبرني
مثل مابشرت يعكوب بشرني
ـــــــــــــــــــــــــ
تسئله وعين ملك الموت دم تجري
بكــل دمـــعه يكلـــهه اتقبلي عذري
ماأدري اشكلــــج واللـــــه ماأدري
قبل هاليوم ريت انه خلص عمري
ابشرج رفعي عالي الراس == خلاهه جثث عباس
تكله احسين اريده لاتحيرني
مثل مابشرت يعكوب بشرني
ــــــــــــــــــــــــــــــ
ظل بس يبجي ملك الموت وتحير
كلمـــــه يريد بس يكول مايكدر
بس دمعاته ظلت تشرح المنظر
من أم البنين بدمعـــــــته اتعذر
تكله بعد لاتحجي == عليمن أدري دم تبجي
ليش بدمعه جيت وخيبت ظني
مثل مابشرت يعكوب بشرني
ــــــــــــــــــــــــــــــــــــــــــــــــ
جبار البطاط
القصيدة الرابعة
رغم حزن قلبها لفراق حبيبها الحسين "ع" , إلا إنها فخورة بما قدّمه العبّاس في نصرة أخيه ، و تعتبر مصرعه بين يدي إمام زمانه .. بشاره
________
سمعي يَـم عبَّاس جبنالچ بِشاره
ضحّه إبچ للحُسين للحسين ابكل جداره
_______
بُشره يا أم البنين .. إبنچ الأقسم يَمين
وفَّـه دينه من نزل ساحة قِـتـاله
و ابرغـم گطْـع اليمين .. أبو فاضل ما يلِين
شال سيفه او دمَّـر الجيش ابشماله
عينه تذبح , حتى لو طاحت يساره
سمعي يَـم عبَّاس جبنالچ بِشاره
_________
حتَّى من صابه السهم .. ما يهمَّه و الأهم
رايته ما طاحت ابطيحة ازنوده
شبَگ بيده عالعلَم .. واعتنه لصوب الخيَم
ايريد لسكينه يوصِّل ماي جُوده
يرضه يجري الدَّم او جوده ليْـتجـاره
سمعي يَـم عبَّاس جبنالچ بِشاره
____________
او بعَد يا أم البدر .. سمعي خل عينچ تگر
ريتچ اتشوفينه لمّن بالحرب غار
ابسيفه إبنچ من يكر .. تنرسم غزوة بدر
إلحُسين اهوَه النّبي او إبنچ علي صار
نزل للميدان شايل ذي الفِقـاره
سمعي يَـم عبَّاس جبنالچ بِشاره
________
أخو زينب من يطب .. للمعاره تنگلب
هَـد عليها او هـدَ عله العدوان سيفه
ذب جنحها اعله الگلب .. او صارت الرّايه گطب
و اهوه گام ايْحرِّك الحومه اعله كيفه
ابلا جهد عبّاس سيْطر عالمعاره
سمعي يَـم عبَّاس جبنالچ بِشاره
_______
أبو فاضل من سِره .. و الظعن من سيَّره
بيده چانت ناگة الحُرَّه العقيله
إخت سبْع الگنطره .. چانت ابعينه تره
و الخدر چان الگمر هوّه كفيله
زينب ايداريها كل ليله او نهاره
سمعي يَـم عبَّاس جبنالچ بِشاره
___________
يمِّ لبْـنين أبشري .. بالهُمام الحيدري
راح يرفع راسچ اگبال الزچيَّه
بالقيامه اتصوِّري .. فاطمه من تشتري
اچفوفه و اتطالبها عـد ربِّ البريَّه
ترفع اچفوف الكفيل اتريد ثاره
سمعي يَـم عبَّاس جبنالچ بِشاره
------------
ميرزا عادل أشكناني
القصيدة الخامسة
اقرا ايضاقصائد محرم مكتوبة - لطميات مكتوبة
اقرا ايضاقصائد حسينية مكتوبة لشهر محرم
قصيدة لام البنين ميمر
يـالفَـات مُهـجـة أمَّـك او مــارِدها ..
يا رُوح روحي العِدها و الماعِدها ..
يا رُوح رُوحي الـماخـذك منِّي البين
ضحّيت لك لِبِّ الحَشَه او ضيْ العين
او كل ظنّتي سالِم ترِد لي يحسين
او وحشة مَغيبك من تِردلي اتْرِدها ..
سالِم ترِد ظنّيت لمّن ظنّيت
يَـفْيَـاي خيمتنه او يَعامُود البيت
اِلْياحيف ما تنفع بعد و الياريت
و الآه و الأحّاه شيْـهـوِّدهـا ..
الأحّاه ما تبرد و لا الآه اتْهِيـد
او ميْـهِـيد ونِّ الصايْحه او صفْج الإيد
لطم الصدر للراح مِنّي شِـيـفِـيد
يالخِلِّتَـك خِلّه او بعـد شيْسِدها .. ؟
شيْسِدها خِلّة فرگِتك ما تِنسَـدْ
او يوم اللي طوَّح ظعنَك او بيك اَبعَـدْ
يحسين عيني ابيَّضْتِ او حيلي اِنْهَـد
و الرّوح ذابَت و البُعُـد ظـاهِدها ..
افراگك ظِهَدني و الحزِن شيِّبني
و اعْـليك ماتم بالگلب راح أبني
واصرخ وانادي او أنتِحب راح اِبني
بلچن أواسي أمَّـك أو أسعِدها ..
أسعِـدها بالوَنَّـه او أگول المذبوح
إن چان ما عنده عليهْ أمِّ اتنوح
آنه امَّه و اهـوَه اوحيِّدي او بعْد الرّوح
و اشلون تنعي اللي افگِدَت واحِدها ..
لـنعاهْ نعْيِ العاجِـر او جاها اِوْحِيد
اوتاليها حِفـرَت لِحْده ويْ فجْر العِيد
اشما حال حُوله اِعليهْ حسرتها اتزيد
حد ما دمِع عيناها يحفر خدها ..
يحسين شبّاني اربعه امن انعدّوْ
ما همني لـمن عالهجير اتوسدَوْ
الراحوْ من اولادي عسَن لا ردّوْ
لو راد للدار انته يا ماجدها ..
---
الميرزا عادل أشكناني
القصيدة السادسة
ام البنين..ام اللبنين
يانسل حره وطاهره..ام البنين الصابره
ام البنين..ام اللبنين
&&&
يانسل طيب الانســــــــــاب...ام البنـــــين ام الوفه
جاهدت وي اهل الشرف...وبيه الكرم احسن صفه
تعلمت وبيت الوصي...الدين واصله ومعرفه
عاشـــت بيت اهل العلم...وي الامـــــــام ومنصفه
اهات تخفي وظاهره...ودمعته ظلت عابره
ام البنين..ام اللبنين
&&&
ايام عاشت مؤلمـــه...تشكي الهظم لااجل الدين
مفجوعه بالصار وجره...وبس الدمع شك العين
تنادي وينـــــــك يولدي...ايا يولدي ايا حســـين
انه امك واشكي الهظم...وبيكم فجعني انه البين
يحسين انه محيره...وبهل المصاب اللي جره
ام البنين..ام اللبنين
&&&
المني فتت مهــــجتي...وانحل وركد حيلي
امصابك ويومك الي...يحرمني نومت ليلي
يحسين يبني وضنوتي...بعدك منو يتجيلي
ايام عشت محبـتك...وبالطيب من تحجيلي
ايام جدا قاهره...وعليك عيني مناطره
ام البنين..ام اللبنين
&&&
اعيوني تربي على الولد...وحسين نوره اكبالي
شلت يمــــــــــينك حرمله...سهمـــــك ذبح دلالي
ريت الســــــهم كونه الي...ولاابنـــي ظل ايعالي
من طاح من ظهر المهر...طاحت جميع اوصالي
اركان جانت عامره...بحسين هيه زاهره
ام البنين..ام اللبنين
&&&
راسك انت عالرمــح...ينظر ويشكي احوالي
حكي من الوم انه الدهر...جيفنه راح الغالي
يحسين انت منــــيتي...وانت الرجه وامالي
اعتاب اليه وي المهر...من رد اليـــه خالي
مكسور ردلي خاطره...يشكيلي حالت منظره
ام البنين..ام اللبنين
&&&
اهوال مرت يولـــــــدي...صارت عليه وتجره
بعيوني ما شفتك طحت...خنكتني والله العبره
جسمك ضل على الثــره...ومطــبر على الغبره
والخدر واطفال ونسه...للشـــــام راحو يسره
زينب وياهم سايره...باطفال هيه حايره
ام البنين..ام اللبنين
&&&
خادم اهل البيت
ابو علي السعيدي
القصيدة السابعة
ام البنين شريكة الفاجعه
هكذا استقبلت ناعي الطف
ياناعي المصاب
هون عل احباب
ابني رجعلي من السفر
لو باللحد غاب
--------------------
انطيت اربعه
وانه مقصره
لو عندي الف للطف يروحون
لحسين الضنه
يرخص هلعمر
اولادي الجفن وحسين العيون
لو سالم يرد
ما انصب عزه
افرح من كلب للزهره ممنون
محبوبي لو عاد
من هذ البعاد
لحزاني ما اترك اثر
وانصبله ال اعياد
--------------------
يربي اندعي
اريدن مايرد
واحد من بنيني وسالم يعود
يبيضون الوجه
بنيني بالحرب
حلم عمري واشوفن بالخيم جود
تمنيت القدر
واروح لكربله
لاجل حسين اقدم عين وزنود
لو بيدي الاقدار
ماهم بالاخطار
افدي حبيبي بهل العمر
وينور الدار
--------------------
كل عمري عشت
لحسين السبط
شمس واقماري من وجهه يضوون
كل صبح ومسه
يلبون العهد
بنيني من يمر لازم يدنكون
ام الاربعه
لو عندي بعد
اولاد وفده ال زينب يطيحون
بوجوه الاطفال
عاينت الاهوال
شفت السبي ودرب الخطر
تمشي عله ياحال!
--------------------
انا بهل الولد
يعقوب وهمت
من اشتم قميصه ترجع الروح
لو راجع الي
من طف كربله
ينشف دمع عيني وتبره الجروح
من يوم الرحل
ابني ومارجع
احسب عمري لوعه وفاجعه ونوح
ماتهده الجراح
من حمل وراح
عن دربه ما غاب النضر
بلكن ركب لاح
---------------
اتمنه الاجل
كل ساعة يجي
ياخذ مني روحي العالم الموت
شلي بدنيتي
ما عيش بعمر
اصبح من بعد اولادي تابوت
يا دار الاهل
ضلت خاليه
وحشه ودونهم ما ينسمع صوت
اندب يلحسين
ياضنوت العين
بضنوني لو منك خبر
اتبع صدا وين
لخادمكم الشاعر احمد عيسى البديري
07808368692
القصيدة الثامنة
الدنيه ليل ابلا صبح .. بفراگم
وانـه يومـيه انجـرح .. بفراگم
اتــمـوت ام الاربــعـه .. بفراگم
-----------------------------------------------
حالـي حـال ام الولدها فاگـده
والـده وتدرون گـلـب الــوالده
اندعي گظـيت عمـري ساجده
الظـعن يا الله ادعـي اتـعـاوده
ادموعي عالخد تنفضح .. بفراگم
وانـه يـــومـيه انجـــرح .. بفراگم
اتـمـــوت ام الاربـــعــــه .. بفراگم
-----------------------------------------------
لــشوكت امكـــم تظــــل اتـــاني
وعـن ذكــركـم مايمــل الــــساني
انبنه فوگ اخدودي بيت احزاني
تـــره دمـعــي الـــي جـــره اذاني
والله كل دمعه رمح .. بفراگم
وانـه يوميه انجـرح .. بفراگم
اتـمـوت ام الاربــعـه .. بفراگم
-----------------------------------------------
يالرحلــتو ابمحـنتي عـفـتوني
من بــعدكم مـا اريــد اعيــوني
صعبه اعيش ابغيركم تدروني
انــشاالله اتــردون ماتنـسوني
عيني احس بيها ملـح .. بفراگم
وانـه يومــيه انجــرح .. بفراگم
اتـمـوت ام الاربــــعــه .. بفراگم
-----------------------------------------------
هسه زينب كون اشوف اشحالها
ردت اناشدهــا امنـَصير اگـــبالها
خـــــاف قصــر بالضــعن كفــالها
ادري مايــحمـــل هـــظــم دلالها
صعبه لو صار الجرح .. بفراگم
وانـه يوميه انــجـرح .. بفراگم
اتـمـوت ام الاربــــعـه .. بفراگم
-----------------------------------------------
ليــش روحي ماطــفت نيرانها
خــاف زيــنب ابــتدة احــزانها
الخيمه بس لامحترگ صيونها
جاي اشـم من كربــله دخــانها
هالخبر بس لايصح .. بفراگم
وانـه يوميه انجـرح .. بفراگم
اتـمـوت ام الاربــعـه .. بفراگم
-----------------------------------------------
ابــو فاضل دوم اناشـد ويـنه
مـومــهم لــو تنــگطع چـفينه
خاف هوه قصر اويه حسينه
انه وصيــته يحـفظه ابعــينه
مــو مهــم لو ينذبح .. بفراگم
وانـه يوميه انجـرح .. بفراگم
اتـمـوت ام الاربــعـه .. بفراگم
-----------------------------------------------
اشكثر مشتاگه امكم وتدروها
والوصـيه كــون مـــاتنــسـوها
ابحيره زيــنب يــمه لتخـلوها
اوحيده لو ظلت تره يـسبوها
وبالحـزن راح اتـشح .. بفراگم
وانـه يوميه انجــرح .. بفراگم
اتـمـــوت ام الاربـعـه .. بفراگم
-----------------------------------------------
تمت والحمد لله
حيدر تركي الكربلائي'
القصيدة التاسعة
گمر چفك اشمه -- اندبك هايايمه
يايمه عيوني حراس -- ياعباس
**
انه ام البنين عتابي مجروح
عذبني البعد والفرگه والنوح
افراگك يبو فاضل حير الروح
اجيك المصرعك والدمع مسفوح
مثل ملزهره تحضر -- للطف ويه حيدر
تحرس رفعة الراس -- ياعباس
*
گمر باقي بضمير العاشگ اسنين
نذر زهرة سنينه فدوه لحسين
اشوفك اسد يرفض طبگة العين
كفيل ومن ظهر فخر الميامين
ماتغمض عيونك -- من ترحل ضعونك
حادي العتره نبراس -- ياعباس
*
مشيت انحر الصحره بلايه عنوان
وبدون ايعاز عقلي اتلگه الاحزان
شفت وسطة طفوفك مرمي قران
صريع بلايه ناصر دامي عطشان
ياوحشة صفنتي -- ياليلي وغربتي
العبره اتوصف الاحساس -- ياعباس
*
عفت شهگة اللهفه بذمة الليل
ويوديني الجدم للعلگمي ايميل
عتاب الدمعه تروي لمن اتسيل
عضيدك يمه بعدك سحگته الخيل
بمحطة ذكرياتك -- الوفه يترجم صفاتك
غيره وبيها تنقاس -- ياعباس
*
ابد ما ينذبح حلمي وحنيني
اجت تفديك يسراي ويميني
واجر سهم الغدر عذب سنيني
قبل ما طفه عينك طفه عيني
ياسلوة خواطر -- انه بليلك اناطر
سيف بوجه الارجاس -- ياعباس
*
الملم نايباتي واهجر النوم
واطشر فرح عمري بجمر الهموم
حليب امك يايمه ايحشمك اتكوم
تره زينب سبوهه عگبك الكوم
جرح رافگ حياتي -- لحد ساعة مماتي
حسره ابين الانفاس -- ياعباس
*
ترد الروح مسبيه وحزينه
لحد صوب المصايب بلمدينه
ينوح الناعي ما بطل ونينه
اواسي الحره بحسين وبنبنه
ما صيحن بنيني -- اصرخ ياحسيني
عصمه وقدوه للناس -- ياعباس
*
الحاج سامي الكعبي ..
القصيدة العاشرة
گلبي مملي بالجروح عني يوليدي لتروح
بغيبتك أمّك تنوح
****************
من رحت عني يعباس إشأتاني
وكل حياتي وياك راحت والاماني
يبني وغيابك كسر ظهري وعماني
وبس دمع عالخد رسم يبني زماني
بيدي ألطم على الراس يبني اصرخ يعباس
ياكتر يبني مذبوح بغيبتك أمّك تنوح
************
ما طفت من غيبتك لليوم ناري
والدمع من دم يضل يوليدي جاري
موحشه تبقى بغيابك يبني داري
ظلمة أصبح يبني كل ليلي ونهاري
لا گمر يرجع يعود لا ولد عندي موجود
بس حزن لأمّك يلوح بغيبتك أمّك تنوح
***************
من عگب يوليدي يوم الغاضرية
يسهر وياي الحزن وأصفگ بدية
راحت أولادي وتضل داري خلية
بس صور مرّت يبو فاضل عليه
صورة مرّت على البال أربعة عندي أبطال
والنظر ليهه مشبوح بغيبتك أمّك تنوح
***************
لو ردت للماي أشرب ما أشربه
أذكر چبود العطاشه وبيدي أذبّه
تضل حياتي من عگب عيناك صعبة
الفاگد إعزيز إشيهوّد يبني گلبه
يبني هاك العمر هاك للگبر إخذه وياك
عگبك إشتنفع الروح بغيبتك أمّك تنوح
***********
يبني لو واحد يدگ بيده إعله بابي
أصرخ وللباب أزحف من عذابي
هذا عباس السمع نوحي وعتابي
جاي بيده يداوي لجروحي ومصابي
بيده دگ إبني عالباب يدري ما أحمل غياب
والوفه ريحته تفوح بغيبتك أمّك تنوح
***********
وحدي أگعد لاچن إيعذّبني فكري
لو متت باچر منو يحفرلي گبري
من يغسّلني وعَلَيْ إدموعه تجري
ولكبرتي منهو يبني يصير ضخري
عاشت بروحي أفكار راحت من ايدي أقمار
وعالجفن دمعي مسفوح بغيبتك أمّك تنوح
*************
تدري ياعباس أمّك من فجعهه
وليش من دم يبني ضل يجري دمعهه
رادت وي حسين يتكسّر ضلعهه
ويشبه لوضع العقيلة هم وضعهه
أنسبي وأمشي للشام وأمتحن يبني بأيتام
والگلب يبقه مجروح بغيبتك أمّك تنوح
************
صالح الخفاجي
مجموعة من القصائد الحسينية المكتوبة لام البنين عليها السلام
 القصيدة الاولى اّنه والبنين **** نخدم الحسين بيه رضه سيد نخدم الحسين *******…){kind=link}
نريد بجيه
ردحذف