لطميات مكتوبة للنساء اكثر من 100 فزاعيه مكتوبة لجميع المناسبات وايام محرم الحرام ,قصائد نسائية مكتوبة

قصائد مكتوبة للامام العباس عليه السلام 

مجموعة كبيرة من القصائد الحسينية المكتوبة للامام العباس عليه السلام 

القصيدة 1

جیتك وعفت اليتامه ... شعندي غيرك غالي 

ردت اشبكك يابو فاضل.. بس رمحهم عالي

ــــــــــــــــــــــــــــــــــــــــــ

من شفتك ومات النفس.جيت اركض وملهوفه

هوه الكلب من يحترك .. جا كلي ياهو يشوفه 

شافوك الزغار وبجوا... والجرح شنهو يروفه 

سئلوني والمدمع نزل .. جاعمه وين جفوفه

 حيروني يابو فاضل ..ردت منك عونه 

من يكلولي يعمه ..  كلها.  دم.  عيونه 

ــــــــــــــــــــــــــــــــــــــــــ

ابيناتهم شفتك شمس.. والضوه منك طالع 

من دورت روحي شفت منعدي مدري شضايع

بس علرمح يابا الفضل جنك منارت جامع  

ماشابعه منك يخيي... والرمح منك شابع

من عفتني وشعفتني .. خويه عندي حجايه 

والله مشتاقتلك اني ... يا كفيلي هوايه 

ــــــــــــــــــــــــــــــــــــــــــ

من طاحت الخيمه الجمر.. يتناثر ويه اطفالي 

وطشرن عفت علي  .. النسوان فكدت والي 

راحن سبي الماينسبن.. ويتختلن بخيالي 

حاجيتهن هسه يجي .. العباس يتعنالي 

كسرت الخاطر جبيره .. وانته عندك خاطر 

بيك ترجع للمخيم .. لو بكلبك حافر

ــــــــــــــــــــــــــــــــــــــــــ

فوكانه رمحك يلعذب.. ودموعنه شكد طاحن 

بلبر خواتك كوطرن .. من الضرب يتباچن

ركضن ركض يتعثرن.. عافني صوبك راحن 

رادن يخويه من التعب .. يم الرمح يرتاچن

يلحنين الماكو منك .. كسر خاطر بيهن 

حاره شمس الضهاري .. انطبعت اعله عبيهن

ــــــــــــــــــــــــــــــــــــــــــ

ها  يلعزيز  المنچتل.. من الشمس ردت افياي

 تقبلها اروح ويلغرب وتتباوع الناس هواي 

حاجيني اروحلك نذر .. ويروحلك فدوه الماي 

لو يمك ابقه وانذبح .. لو ترجع تكوم وياي 

ادري ماترضاهه انته .. اختك يضربوها 

ويا ذباحك هضيمه .. بلحبل يسبوها 

 . علي مخيلف

القصيدة 2

خويه وينك ، ، خويه وينك ، ، 

- - خل اسولفلك بعد - -

_________________

خل ترد عينـك حنينه وسالمـــــه

بالي يمــك مـــن امس ما نايمـــه

مو على الماي اعله طولك صايمه  

امدوهنـه ويا گاعــده ويا گايمــه

-ورگبتك بيضه وتغير لونهــــه

- بالرمح يا وسفه ويخربونهـــه

-- ماكله ارسومه الشمس وجه الگمر

-- من الصبح لليل نايــم ع النهـــــر 

خويه وينك ، ، خويه وينك ، ، 

- - خل اسولفلك بعد - -

_______________ 

واگفه بــصـف اليتامـــه الخايفــه

الـرمـح شابـگ راسـك وما عايفـه

بشيلتي امسح على زنودك نازفه

كلهه هينه وسـهـم عينــك سالفـه

 

- خدودك اشچم شامه چانت بيهه 

- هسه دم وتـراب غطـه اعليهـــه

-- الشمر يركض شبخ جسمك من عبر 

-- راح للخيمـه ، وجــرح فگــدك كــبر 

 خويه وينك ، ، خويه وينك ، ، 

- - خل اسولفلك بعد - -

_______________

خــل اسولــفــلك شصــاير بينــه 

الگـاع تچوي وفرهــدت رجلينــه   

چــفــك البـي مـحبسك چـا وينه 

الچان يمسح فوگ راس سكينــه

  

- بنيتــك شــمـا تلـبد يلحگـونهــه

- تلتـفت چــي خايفــه يطگونهـه

-- فوگ صـدرك سيفه سولف بالنحــر 

-- ومن گلب جسمك جرح صدرك كبر 

خويه وينك ، ، خويه وينك ، ، 

- - خل اسولفلك بعد - -

______________

الچانت تنام اعله صدرك دافيــه 

خويه عگبـك ركضــوها وحافيه 

والعبـــايـه ام الستـر ما طافـيـه 

الضيم ماخذ چم گمر چم عافيه

 

- والعليل الحيله يم عوچيتــه 

- فوگ متنه سياط مو خاچيته

-- منين ما مــال الرمح نركـض سوه

-- وشـيبـك المهيـوب يلعـب بالهــوه

خويه وينك ، ، خويه وينك ، ، 

- - خل اسولفلك بعد - -

_________________

تدوهنـت لـمن لـگيـت امتونــي 

هدلت ، ولون العـبـايه بلــونــي 

وفـوگ راسـك والرمـح طگوني 

اصفن وبالسـوط ويندهـونــي

    

- شگد سوالف كون ما نحچيهـه

- راح اسولفهــه بدمع وابچيهــه 

-- والمصايب ترســن عيـون السمــه 

-- دوست ضلوع وحرگ خيمه ودمه 

خويه وينك ، ، خويه وينك ، ، 

- - خل اسولفلك بعد - -

- علي مهدي المالكي ،

القصيدة3

يعباس انكسر ظهري

يعباس الدمع يجري 

يعباس انهدم عمري     أنا حسينك 

ــــــــــــــــــــــــــــــــــــــــــ

يخويه امن اسمعت صوتك دم ينزف اجه ليه 

حسيت ابسهم عينك    نضر عيني طفه ضيه

يحسين اسمعت احضر    

گمت مرتين اتعثر    يخويه 

مره اتعثرت لمن شفت زينب بلا كافل 

ومره اتعثر بروحي  خذت روحي يبو فاضل 

بيك العدد والعده    

ودرب المشرعه اشبعده   يخويه 

أحس بيه اشبعد دربك 

أحس بيه انكسر گلبك 

احس بيه صعب امري  أنا حسينك

ــــــــــــــــــــــــــــــــــــــــــ

اجيتك والخيم ماظل واحد بيها يحميها 

بس عبدالله رايد ماي يبو فاضل يون بيها 

وروحه امعلگه ابجودك   

 شگله طاحن ازنودك    يخويه

اذا اعيونه ابيضت امتاني    عمه امن النهر يرجع 

اذا ماارجع انه اوياك    روحه امن الضمى تطلع

اروحن مارحت حيره    

ورضيعي جبدته اصغيره    يخويه

 

بلياك تريد امشي    

بلياك انتهى كلشي

بلياك منوا إلخدري  انا حسينك

ــــــــــــــــــــــــــــــــــــــــــ

شفت تتصارع اويه الموت    بجروحك تتانيني

اعليك امن المهر للگاع   طحت لو طاحت اسنيني 

شگلك ياجرح ماذيك     

وكل هاي السهام إلبيك   يخويه

أطلع ياسهم ينزف  أخليها السهام اتموت 

اعوفك خايف امن الخيل على جسمك يخويه اتفوت

انشد وين چفينك    

لو انشد على عينك    يخويه

بلسهام انمله جسمك   

بلسهام خلص دمك

بلسهام شجر مدري  انا حسينك

ــــــــــــــــــــــــــــــــــــــــــ

يانفسي ونفس وياي لاتگطع  نفس روحي 

ابجي لچن امن اضماي يابس ماطلع نوحي

 

اريد اعليك وناتي   

العطش ماخله دمعاتي    يخويه

زينب تنتظر جيتي  وانت اوياي يعضيدي 

اشلون ارجع بلا عباس  بس دم عينك ابإيدي 

شگول وتنتظر زينب   

وراسي  إلحالتك شيب يخويه 

أردن للخيم وحدي    

أردن حيل ماعندي 

أردن حسرتي ابصدري  انا حسينك

ــــــــــــــــــــــــــــــــــــــــــ

وصلت الخيم والاطفال كلها امتانيه إلجيتك 

إلخبر موتك يبو النوماس اخاف اتموت خويه اختك

 

زينب شرد أگللها    

بلا چفين كافلها    يخويه

وزينب روحها بروحك اخوها انت وابن إلها 

أخوج إلراح لو ابنج  يبو فاضل شگللها 

امن أطيح عمد خيمتنا    

أخاف اتموت زينبنا    يخويه

 

الاخو راح وبقى وني    

الاخو راح ابظهر محني 

الاخو راح وصعب امري  انا حسينك

ــــــــــــــــــــــــــــــــــــــــــ

الحرم من اوصلت يمهن    ماعرفني من شكلي 

احس موفاگد العباس   احس فاگد جميع اهلي 

احسن عيني تتگطع    

العطش ماخله ابد مدمع   يخويه

 شيعوض الاخو المثلك    وانه ابعازة الخوه 

احط إعله الخيم حارس   عقب عباس ياهوه

 

ظل عبدالله شيسكته   

وانت اعليك عودته     يخويه

عفتني اويه الحرم هايه    

عفتني وانت لي الرايه 

عفتني ابعازتك تدري    انا حسينك

الخادم 

كريم التميمي

القصيدة4

تعبانه وضم من ناضرك تعــبي   

هـا عــــباس جلمه وتاكل بكلبي

اليتركها غـريبه أخته  

لا عــباس  مــو  أنته

ـــــــــــــــــــــــــــــــــــ

يبعد سنيـن زيـنب والشمس والـفي فدوه تــــروحلك خــــويه الخـــيم  والمي

عليك بروح حيدر  لا تـطــفي  الضي  

عيونك تسوه روحي وتسوه  ملك  الري

بعد طولي تعال أشتمك أكربلي   

أنه بلا أهل عــــباس أنته أهلي

اليغيب الكـمر شفته   

لا عـــــباس مو أنته

ـــــــــــــــــــــــــــــــــــ

يل مغــــطي الخــــيام بخـــيط جفـيته    

أنـــــته أول  كـــفــــيل  أتـــحزم  بنيته

مثــــل  الـــماي  وبصيـــــنيه  خليته    

خدري  ومن تعــــوفه   كول   بديته

عطري الناس بس تعوفني تخنكه    

بكلبي وداعتك يتيتم الملكه

غيرك ماحفض بخته    

لا عــــباس  مو أنته 

ـــــــــــــــــــــــــــــــــــ

أيتلفت فوك وجناتي الدمع شفــته   

أيسولفـلك عذابي  أسمعها  سالفته        

موش الماي صرت أنته العطش أنته  

جي  يسوه  العـتب  عباس  عاتبته

أنا بياوكت أوكف عله التله    

يعــباس التعوفه يموت أحسله 

ذبحتني تره السكته   

لا  عـــباس مو أنته

ـــــــــــــــــــــــــــــــــــ

غـير أنته أكتبت عالخيم ستر أختي    

وغـيرك  مارضيـت  يقود  قافلتي 

باجر  لا  تـــكلي  ليــش  شيبتي   

أشيب من  تروح  وتنحجي  قصتي

شيسون بوجهي الخيل والذاري   

ياوسفـــه اليذبحك يدخل الداري 

جرح الكلب سولفـته   

لا عـــباس مو أنته

ـــــــــــــــــــــــــــــــــــ

الناكه العاليه صعـــدتها مو سهله    

ومن أبجي الشمر بدموعي  يتسله

أطب  للشام  ويــــن  الشام  أندله    

أخ   وأخ  والله  تمـــــــوت  الذله

خويه العاليه من تنهضم تنصه    

وأنه الشمات يدور علي فرصه

خدري يروح لوعفته    

لا عــــــباس  مو أنته

الخادم عبد الجليل المالكي

القصيدة 5

غريبة .. زينب يا غريبة

غريبة .. زينب يا غريبة

_^

عباس الاجيت وياك غثاني صدك فرگاك

يبو عيون اليحبها الليل .. اختك تاهت ابلياك

ارجع يل خنگت الضيم .. ترجع هيبتي بممشاك

انت الماي واحنة الطوس ..ما يعطش ترة البحماك

غريبة .. زينب يا غريبة

غريبة .. زينب يا غريبة

___

اضب اعصابتي اعله الراس . وايفلها الهظم عباس 

عيني الجنت تارسها.. عگبك بالدمع تنجاس

يجرني الضيم يم الليل ... ومراكض علينة الناس

يواهس گلبي المتانيك .. اَخذني بصفنته الوهواس

غريبة .. زينب يا غريبة

غريبة .. زينب يا غريبة

بنات ابيوت عدك هاي .. زحمة يطيح راعيهن

نخيتك والنخاوي هواي .. اذبهن لو اخليهن

فدوة اندارلك عباس .. اگعد خل اوديهن

اجرهن يمي راحن غاد .. تَشوّر باليغث بيهن

غريبة .. زينب يا غريبة

غريبة .. زينب يا غريبة

___

يعباس الخدر ما طاح .. بس راعي الخدر طايح

عگب ذاك الهدوء البيك .. نگعْت بهوسة الصايح

عمة شوفي واحس ظليت .. الجاي اعله الخيم رايح

الما لايح اخيالك دوم .. هسه بريشتك لايح

غريبة .. زينب يا غريبة

غريبة .. زينب يا غريبة

_

يخال ابني السهر كتّال .. يكتل هيبة عيوني

الهظم واللچمة عدهم ايد .. يجيبوني ويردوني

يلما غاث خلگي بيوم .. اگبالك شو يغثوني

يعباس الحچي المضموم .. ترة الكتلوك شتموني

غريبة .. زينب يا غريبة

غريبة .. زينب يا غريبة

__

اجيك استورحنك ماي .. بس اتعطّش الهيمة

عطاشة وادري لو انخاك .. يمنه اتحّول الغيمة

تلفلف رمشي ع الدمعات .. وبثوبي رسم ضيمة

جر حسين گلبي وياه .. من جر خشبة الخيمة

غريبة .. زينب يا غريبة

غريبة .. زينب يا غريبة

___

علي هادي الخزعلي

القصيدة 6

جـان جيش بأكمله   --  راح  راح

 أغلـه زلمه  بكربله  –   راح  راح 

  ماتـت  الخـوه عــــداه    

ساعه وستـــشهد وراه

ــــــــــــــــــــــــــــــــــــــــ

تـره  اليلـزم صفاحه يوجـعـه صوابه    

أشتم أفـــراك أخــيه من  وره  نكابه

تــشوفه  الزلم  مفرد  محد  يــهابه    

تـذب  بصدره  نار  ويعـــله  عطابه

حزام ضهري ومسندي  --  طاح طاح

صرت أمشي بمفــردي  --   طاح طاح

شيـب لحيــتي  بجــــفاه

ساعه وستـــشهد وراه

ــــــــــــــــــــــــــــــــــــــــ

العمر ستين عام وصرت أحــس ميه   

مشيت وبس مشـــيت بكامه محنيه

شويه الصوت يضعف من وره شويه   

صحت  عباس بس  عالصوت  مابيه

نفسي ماأحسه هــوه  --   نار  نار

فكــــــــد  شيال  ألوه  --   نار  نار   

هلالي مدفون  بضـواه

ساعه وستشهد  وراه 

ــــــــــــــــــــــــــــــــــــــــ

عضيدي وأدري وين مجانه من نزفه   

وصلته وبس  ملامـح  وجه  مختلفه

شفت راسه وعــمــود وماشفت  جفه    

طحت  ولكيت  روحي  طايح  بصفه

كـتـله شنهي اليوجعك   --  صاح  صاح

صاح ساعة  مصرعك  --  صاح  صاح

بللت ثغـــري  بدمــاه  

ساعه وستشهد  وراه

ــــــــــــــــــــــــــــــــــــــــ

قـــريت بدمه كاتب عالـــترب  جمله    

الميت  دون  أخــيه  موتـــته  سهله

صحت عباس أكعـد هالحجي  كمله    

فـتح  عينه وسمعته يصيح  لا  خله

أخـذ عــذري  للخــيم  --  روح روح

ماي  ماتروي الحـرم  --  روح  روح

مات أبو الغيره بضـماه

ساعه  وستشهد  وراه

ــــــــــــــــــــــــــــــــــــــــ

صعب موقفنه شفته بس ردت حسمه    

أذا  جمعـت  جسمه شلـون  ألم  دمه 

العلم  شفته  يتــقـــرب  رايد  يشمه    

دفعـت  العـلم  بيدي  وأكعـــدت  يمه

يشيب فراك الأخـــو  --   أخ   أخ

يضحك بحيله  العدو  --  أخ    أخ

ضهري ما واحد حماه 

ساعه وستشهد  وراه 

 الخادم عبد الجليل المالكي

القصيدة 7

مقدمة للعباس س

.

.

.

أنته  يالكلك  حنان         شلون أضل بلايه امان

يابو فاضل

 

’’’’’’’’’’’’’’’’’’’’’’’’’’’’’’’’’’’’’’’’’

يابس عله شافي ألحچي وگمت إني اسولف كوه

امعـــودنــي يالكلـــك وفــه تمطـر عــليه امـــروه 

شايلني بعيــونـــك دهـــر وتگلـــي هــيچ الخــوه

زحــمه اصــيحن والعدو ايگــلي الكفــل مـــاهوه 

والشماته ابكـل مــكان        شلون اضل بلايه  امان  

يابو فاضل 

’’’’’’’’’’’’’’’’’’’’’’’’’’’’’’’’’’’’’’’’’’’’’’’’’

مشدودة روحي برايتك يابو الفضل تدريني 

اني اسميك الضوه وانــت الهــوه أتسمــيني 

محروگه گبل امخـيمي وبس انته التطفيني 

لتگلــي رايح للــنهـر طــاري النهــر يسبــيني 

قاسي تدريبه الزمان        شلون اضل بلايه امان 

يابو فاضل 

’’’’’’’’’’’’’’’’’’’’’’’’’’’’’’’’’’’’’’’’’’’’’’’’’’

لمن جبتني امـن الـوطن فـوگايه محمل غيره 

وطول الدرب يا ابا الفضل ماطببتني ابديره 

خايف خـيالي ينلـمح وعـندك يخويه اچبيره 

لـكن اذا عـني رحـت صـدگـني اروح ايسيره  

والصخر من صيحي لان     شلونا ضل بلايه امان 

يابو فاضل 

’’’’’’’’’’’’’’’’’’’’’’’’’’’’’’’’’’’’’’’’’’’’’’’’

إي يا گمــر ليــلي الــذي دومـك تشــع گدامي 

معودني اشوفنك ضوه مومال اشوفك دامي

دلالي منــك مرتوي امــن اتروح يـبقه ضامي

ضل يمي يا فـَي الخــيم عـن لا تـوج اخيامي 

خويه يالحچيك أذان      شلون اضل بلايه امان 

يابو فاضل 

’’’’’’’’’’’’’’’’’’’’’’’’’’’’’’’’’’’’’’’

سامحني ودريبك تره بهذا الحچــي تتعذب

عيون العساكر شابحه وچــن يالاخو تتقرب 

بس ما تطـيح عـله النـهر اخـتك تره تتسلب 

الما شافو اخيالي گـبل يشوفون كلهم زينب 

مو سهل  هالامتحان      شلونا ضل بلايه امان 

يابو فاضل

 

’’’’’’’’’’’’’’’’’’’’’’’’’’’’’’’’’’’’’’’’’’

اتَرس ردت يا كافلــي مــنك يخـويــه اعيوني 

باجر اذا اصد عالرمح بسوط العدة يضربوني 

عباس اخويه لو صحت ايفزن يخــويه متوني 

لهذا الــسبب عوف الــنهر ولو عفته مايسبوني 

ولهجر لو گتلي حان        شلونا ضل بلايه امان 

يابو فاضل 

....................................

تمت 1442

حيدر تركي الكربلائي

القصيدة 8

انته يا اول گمر .. ماله من ضي الشمس 

من ضوه افعاله يشع 

ياهدوء لكل گلب .. تارس الدنيه همس 

و بالضماير تنسمع  

يابو فاضل 

يابو فاضل 

ــــــــــــــــــــــــــــــــــــــــــ

طاحن اچفوفك حظاره وخضرن ثورة عشگ 

ومن بياض السانك انته اعرفنه يا لون الصدگ 

ابطولك افتخرن مناير يل شبع طولك سحگ

ياحزن هزني وغلاتك ما شفت غيرك طبگ 

يل كبر بيك الوفه .. من زغر بيك النهر

واشتها ابروحك نعش 

شاف بعيونك وطن .. غافل النبله وعبر  

واعله زيبگهن فرش 

يابو فاضل 

يابو فاضل 

ــــــــــــــــــــــــــــــــــــــــــ

ضنوت اجروحك مواقف بيها تاريخ المجد 

من چفيت الماي بيدك لاخر اجيال الحشد 

 دمك اوتاد الرساله شما تهب ريح الحقد 

كلشي يعتگ لو تعده وانته جرحك يستجد 

انته عنوان النده .. من يشح طاري الورد

يلگه بفيايك ستر 

يلتلم شمل الذهب .. لمني بحساسك برد 

بلكي اخف نار الغدر  

يابو فاضل 

يابو فاضل 

ــــــــــــــــــــــــــــــــــــــــــ

غافي صبر الله بلهاتك يا ضمه اگبالك وگف 

ونبع من افطور شفتك ثوره وايمان وشرف 

گربتنه لكلشي منك .. بيك واحدنه انعرف 

بينّه وبين الله فجوه وصارت اعيونك طرف 

يل حروفك زمزمي .. وين ما كتبك حزن

الگه جرحك ينقري

من حريرك نستحي .. كلشي بلدنيه خشن 

يابو الحساس الطري 

يابو فاضل 

يابو فاضل 

ــــــــــــــــــــــــــــــــــــــــــ

طاحو اگبالك سوالف طيحة الگطره بهدم 

من تجاعيد الگناطر لملمو طاري الزلم 

 اتخثّر الدم ابخزرتك يل لضى اعيونك يسم 

بين سيفك والمنايه شعره من خيط النجم 

يا سليل المرجله .. كلشي بعيونك حله 

حته نظرات الغضب 

بيك شد روحه العزم .. من هويت بكربله 

ومن قوانينك شرب

يابو فاضل 

يابو فاضل 

ــــــــــــــــــــــــــــــــــــــــــ

من بخت معراج طه ع النجم راسك شمخ

رغم كلشي البيك عالي وكلشي لحسينك رضخ

تستحي من اخيال زينب ماعلي جدمك شبخ 

يا حلم يوسف ولكن ماكو من عندك نسَخ

خالقك للطف ذخر .. ياهو غيرك للخدر 

وياهو لحسينك سند 

يوسف شما عاينك .. بهدعشهم ينقهر 

واعله چفينك سجد 

ــــــــــــــــــــــــــــــــــــــــــ

يا ملذت الخوف منك .. چمّل الوادم حسِن 

شما قريناك اعله دهله .. يم زلالك تستجن

كلشي يم بابك تهيّل  حته عطاب الحزِن 

يابزر حيدر شوصفك .. ماكو لوصافك وزن 

عجزن چفوف الهوى .. يرسمن اخيالك عطر 

حته لو بآخر وجع 

شما يشح بينه القلم .. عالمك يصطع شعر 

من ضوه افعالك يشع 

يابو فاضل 

يابو فاضل 

الخادم حسين السلمي

القصيدة 9 

مولاي يآبو فاضل 

**

اهد روحي ،، ابثرى احساسك

الهوى فاهي ،، بلا انفاسك 

يبو الغيره ،، حلم عمري

و حزن فكري ،، ابجرح راسك

بفعالك أتأثرت يا دين الشمع 

وَتمازج بجروحك و أتحول دمع

وَتناثر يم عتبتك و اسجدلك خضوع

يخضع كلشي ابحظرتك يل عطفك نبع

مولاي .. مالي غيرك

ينشاف .. بيّه خيرك 

بسماك ،، ابقى ارفرف و ابقى عايش آنه طيرك

عطشان .. گلبي للحُب

و دموع .. عيني تطلب 

وياك ،، يبدي نوحي و افني ذاتي ودمعتي اتصب

•••

رُبه اگليبي ،، حدر فيك 

وبديت افهم ،، معانيك

يمعشوگي ،، احسك ضي

يشع بيه ،، ابطواريك

يم نورك ماكو گمر بس انته الگمر

بنوارك و افعالك اشعر جرحي انغمر

مسدودة ابواب الخلگ وابوابك أمان

واليدخل بذنوبه الك من كلشي طهر

بحذاك .. گلبي صافي 

ابچيك .. من اوافي

والگاك ،، بيه تهتم و بمرض روحي تشافي

ذبلان .. يم ورودك

عطشان .. وشط صمودك

و بغير ،، شخصك اهلك و انهجر لو ما وجودك

•••

يتنهيدة ،، وجع حُبي

و يشوغاته ،، و يفي دربي

يَ سر ليلي  ،، فقط انته 

 و بعد واحد ،، سكن گلبي

يا مالك رقي ويل مهيمن عالضوه

يا قرءان امن الوفه وبيك القل هوه

متفضل عالعالم و افضالك دموع

يل فضلك ما ينعد گد عمر الهوه

سلطان .. عالغياره

مهيوب .. چن مناره 

علاك ،، ربك و صرت اعظم انسان ابوفائك

منهاج .. للرجوله 

ثورات .. بالبطوله

خطيت ،، درب الاصلاح ابچفوفك وبدمائك

•••

ابكلام الحب ،، اريد انقش

واضل ابچي ،، ودموعي اتطش

يكون اسمك ،، انقشنه

وسط عيني ،، و لا ارمش

اتوسل بدموعي الك واحچيلك ترف

و استجدي من عظمتك ذره من الشرف

حط بيه حُب و بچي وجروح الطفوف 

يآبو الغيرة ومنك اطلب غيره و لطف

عنوان .. للشجاعه

انخاك .. وكلي طاعه

تسليم ،، امري بيدك و بمصابك تعله ونتي

بجروح .. گلبي ساكن 

موجود .. بيه لاكن

انساك ،، بس اردلك من جديد و تبدي قصتي

#الخادم_علي_خيري_العبادي

القصيدة 10

نزال 

أسمي الفارس ألانزع… انى بيناتهم أشجع

اليگابل سيفي شايل راس

                             لصحابة جسد يرجع

----------------------------------

انى الاوحد… اقيم الحد 

اذا لاكتني ذيج الخيل    اخلهة اعلى الزلم تصعد 

ولا ارتد… عزم يشتد

احمر صار لون السيف    م̷ـــِْن  دم  الرگب  ﯛرد

اخلي القادة كلهة اتعض بصابعهة

بخزرة  عيني  للأصلاب  ارجعهة

الكاع امن الدمة هاليوم اشبعهة

اشتلهة جثث والروس ازرعهة

يحيدر خلفت حيدر… لبو فاضل منو اليگدر

الما راكع فرض لله 

                      اذا شاف الكمر يركع 

-----------------------------------

الشبل حيدر… منو اليگدر 

سبحة الًيَوُمًِ اسوي الروس  واني ابكيفي اتخير

انى الاكبر… أسد بالبر 

مابين السمة والكاع   انى الواكف على المعبر 

ارواح  الكفر  عباس  يقبضهة

سيفي ماكو ركبة الًيَوُمًِ يرفضهة

الزلم لاخر الكاع الة اركضهة

مرض مالة علاج اني امرضهة

اني الناهي والأمر… درس بيه يرسب الشاطر

الما سامع بسم عباس

                    انطي فرصة خل يسمع

------------------------------------

غضب نازل… انى القائل

اليكدر يلوي جف الموت   مايكدر لبو فاضل 

سئل سائل… منو يقاتل

حيدر ه̷̷ـَْـُذآ للطف جاي سيفة شكد بشر شايل

جحافل جيشهم عباس شردهة 

وصار بجعب رجلة الروس يمردهة 

بيدة ايحودهة وكام الهوى يردهة

الجهنم وجبة وحدة راح اصعدهة

ملاݘ الارض واكثر… الشمس من راسي تاخذ حر

جهنم لون رادت ناس

                        اخليهة شبع  تشبع 

-------------------------------------

انى القاهر… انى الحاضر 

اسلطن من اطب للجيش  اصيد الحيد والماذر

زلم ساطر… خشم كاسر

مترهي اني بالميدان   اسيطر عالهوى العابر

اسد عين الشمس والحومة اخرسهة

جهنم  مــن  جثثهم  رايح  اترسهة

اطب  ابمشتهاتي  وروحي اونسهة

بحفور  النــمــل  عدواني  احبسهة

ريشة ابراسي وتبختر… سيفي عالرگب يفتر

اجيهم ريح م̷ـــِْن كل صوب

                        ابكل المعركة اتوزع

-----------------------------------

انى الواعد… ولا واحد 

يسلم م̷ـــِْن اهد واغتاض المهرة اطيح الشارد

نهر رايد... ولو زايد 

ابعيني امن اخزر الشلال اخليه عالجبل جامد

ابكيفي اترس جربتي وراح ابديهة

الشريعة للخيم مجتوفة اوديهة

اكض الغيمة بيدي ابجربتي اجفيهة

اروي اعيالي والخيل ارجع اسكيهة

الرايد خطوة يتقدم… أوديه گوة لجهنم

الزلم والخيل طگت خيل

                      فصلهم واصل امربع

-------------------------------------

حسين حمدان الدلفي

القصيدة 11

((((القنر ورجولته العضيمه ))))

ناموس العرش يل ماوجدلك حد 

حسبوك انته جيش وتيهو بالعد 

      اسمك للذبح باب

      چفك قالع ارگاب

قمر قمر ... مولاي ابو فاضل 

...............................

وصلو للرجوله ومانعديت 

الرجوله بحضرتك عباس بتّ بيت

انته اعله الزلم كلش تماديت 

بحيث من الزنود چفوف ذبيت 

يزماط الهواشم واليجي ينرد

حسبوك انته جيش وتيهو بالعد 

  چبير وبالوصف شاب 

  چفك قالع أرگاب

..............................

وصلو للجمال وحارت الناس 

ماصار الجمالك حتى مقياس 

الجمال اسمه قديم وهسه عباس 

ابوك يبرگعك ممنوع تنجاس 

التراب يطگ عنب من شوفتك ورد 

حسبوك انته جيش وتيهو بالعد 

      اگبالك اي رمز ذاب 

      چفك قالع ارگاب 

..............................

وصلو للوفه وذبوها الاقلام 

وتاريخ الوفه كاتبته الاخيام 

من بَيَتّ بصدره ونامت اسهام 

من گللهه هوني وخط الاحكام 

قميصك من كفاك من الوفه منقد 

حسبوك انته جيش وتيهو بالعد

       الوفه صلالك وتاب 

       چفك قالع ارگاب 

...........................

وصلو للخَويه وصلو شلون 

انطيني اليوم واحد منطي العيون 

ياهو الطول عمره يگول ممنون 

بس عباس من إيكلم ام عون 

اخو ونعم الاخو ياجمرة الموگد 

حسبوك انته جيش وتيهو بالعد 

       الكون بصفك ارتاب 

       چفك قالع ارگاب  

..........................

وصلو للحميه والعطر مر 

الازرگ من يمر عليك يحتر 

غيور بغيرتك چويت الاشتر 

رغم عمرك صرت قائد معسكر 

بحرب النهروان الجيش مالهَ احد 

حسبوك انته جيش وتيهو بالعد 

     نار البيك عطاب  

     چفك قالع ارگاب 

     عبد زينب

محمد الابراهيمي

القصيدة 12

أسمي الفارس ألانزع… انى بيناتهم أشجع

اليگابل سيفي شايل راس

                             لصحابة جسد يرجع

----------------------------------

انى الاوحد… اقيم الحد 

اذا لاكتني ذيج الخيل    اخلهة اعلى الزلم تصعد 

ولا ارتد… عزم يشتد

احمر صار لون السيف    م̷ـــِْن  دم  الرگب  ﯛرد

اخلي القادة كلهة اتعض بصابعهة

بخزرة  عيني  للأصلاب  ارجعهة

الكاع امن الدمة هاليوم اشبعهة

اشتلهة جثث والروس ازرعهة

يحيدر خلفت حيدر… لبو فاضل منو اليگدر

الما راكع فرض لله 

                      اذا شاف الكمر يركع 

-----------------------------------

الشبل حيدر… منو اليگدر 

سبحة الًيَوُمًِ اسوي الروس  واني ابكيفي اتخير

انى الاكبر… أسد بالبر 

مابين السمة والكاع   انى الواكف على المعبر 

ارواح  الكفر  عباس  يقبضهة

سيفي ماكو ركبة الًيَوُمًِ يرفضهة

الزلم لاخر الكاع الة اركضهة

مرض مالة علاج اني امرضهة

اني الناهي والأمر… درس بيه يرسب الشاطر

الما سامع بسم عباس

                    انطي فرصة خل يسمع

------------------------------------

غضب نازل… انى القائل

اليكدر يلوي جف الموت   مايكدر لبو فاضل 

سئل سائل… منو يقاتل

حيدر ه̷̷ـَْـُذآ للطف جاي سيفة شكد بشر شايل

جحافل جيشهم عباس شردهة 

وصار بجعب رجلة الروس يمردهة 

بيدة ايحودهة وكام الهوى يردهة

الجهنم وجبة وحدة راح اصعدهة

ملاݘ الارض واكثر… الشمس من راسي تاخذ حر

جهنم لون رادت ناس

                        اخليهة شبع  تشبع 

-------------------------------------

انى القاهر… انى الحاضر 

اسلطن من اطب للجيش  اصيد الحيد والماذر

زلم ساطر… خشم كاسر

مترهي اني بالميدان   اسيطر عالهوى العابر

اسد عين الشمس والحومة اخرسهة

جهنم  مــن  جثثهم  رايح  اترسهة

اطب  ابمشتهاتي  وروحي اونسهة

بحفور  النــمــل  عدواني  احبسهة

ريشة ابراسي وتبختر… سيفي عالرگب يفتر

اجيهم ريح م̷ـــِْن كل صوب

                        ابكل المعركة اتوزع

-----------------------------------

انى الواعد… ولا واحد 

يسلم م̷ـــِْن اهد واغتاض المهرة اطيح الشارد

نهر رايد... ولو زايد 

ابعيني امن اخزر الشلال اخليه عالجبل جامد

ابكيفي اترس جربتي وراح ابديهة

الشريعة للخيم مجتوفة اوديهة

اكض الغيمة بيدي ابجربتي اجفيهة

اروي اعيالي والخيل ارجع اسكيهة

الرايد خطوة يتقدم… أوديه گوة لجهنم

الزلم والخيل طگت خيل

                      فصلهم واصل امربع

-------------------------------------

حسين حمدان الدلفي

القصيدة13

ليلة مولاي العباس عليه السلام

رنة نواقيس الحذر 

 من النجم طالع گمر

حيّ على ذِل النهر .. گمر گمر

========

بسم رب الخيّم بسمل .. فر مهرة ولوه الجامة

طلع يضوي بحيث اتشوف،، بيضة انگلبت الشامة

بعدة ايودع وما جاي ... وتوة امرتب اللامة

اخر واحد امن الجيش .. رعشن ايدة واجدامة

إمعدل او يمشي نسق 

يمشي ويرتل بالفلق

من الحسد مو من خطر .. گمر گمر

===========

اقصد بالنجم يا ناس .. كل خيمة امن المخيّم

وطلع منهن گمر بي ماي،،على ارياگ العطش غيّم

فارس حيدري وفرّاس .. ابشيلة امة يتحزّم

بترانيمه الحروبية .. گام ابزودة يترنّم

بالراية ايدة امبخرة 

 كظاها كظة گنطرة

والراية خاچية ظهر .. گمر گمر

=============

ابثنيّات العطش والموت… طلعت سكنة بالجربة

زمزم ليش ماموجود ... وخيمة زينب الكعبة

النهر متروس كلة اثگال .. وروس بروس مترتبة

حنطة لو ترش عالروس .. ما طاحت ولا حبة

شافاهم وهز رگبته 

 بس راد يسحب جربته

شردوا رعب سطر سطر .. گمر گمر

===============

سيد شارته اتشوّر .... وابو فاضل عبد صالح

الطايح من خزرته ايگول،طلعت امن الحرب رابح

چفتهم چفتت الكردوس ،،من يچفت عله الطايح 

العرف والمو عرف صاحوا .. توجع ضربة المالح

والوگفوا ابجيّتْ البطل 

بيهم انحسبوا عالنخل

جردهم احساس البشر .. گمر گمر

=============

ارتجل والحومة صنتت صوت، وبس البيرغ ايكبّر

سد الطف ابو فاضل .... وابن امة البعد يعبر

اليريد ايعرف بُعد الگوم .. يظل سنتين بس يشبر

جهامة وبخت هيبه وحيد ... زلمة امعتبر اتعتبُر

اختاض السبع گص الرگب

سيفة الهوة وهمة الگصب

داعيله گلب امة العبر .. گمر گمر

============

گطع حتى الضوة اعليهم.... مو بس گاطع ارگبهم

من گد الرجيف الجيش .. نسوا حتى اسم ربهم

يفل گام ابگفة انگابة ... بزغ وجهه ويشع طبهم

شَطُب حرف الخطأ عباس .. حالف الة يشطبهم

وكّر عله القادة الصگر

والحرب مجموعة شعر

وعباس چان اسبك شطَر .. گمر گمر

=============

علي هادي الخزعلي

القصيدة 14

صفن حتى الهوة            وترفرف رايتك 

يفــارس نينوى              دخيل اعمامتك 

....................………………… ..

طب مثل طبة عراضه وبيرغة يطخ بالنجم 

سمعتة المهره يهوس دبجت فوك الزلم

 

شد على إعداك. ....علي وياك.... يسبع الحومة

 بسرعة الريح...... اجه يصيح..... على الملزومة 

قائد الجيش.... شرد ليش.... يذب هدومة 

كبل ليذب ثوبة      الكمر درعم صوبة 

واعتلة صوته ودوى    غضب ياشارتك 

..............

صنتة صارت من جفتهم وانخرس ذاك الجمع 

خلة صوت الابرة بيهه من تكع هم تنسمع

 

طير الروس.... ركب دوس.... تباهة ابسيفك 

ما يلحكون..... يشردون..... صدر تكليفك 

الكَابلك كون ...... ولا اتهون...... تذبحة ابكيفك 

الكمر منطي حجاية            ماتطيح الراية 

كطع خيط الضوة         وتضوي شيبتك

...............……………… .

الشمر نادة يا ابو فاضل من يزامط خالة 

وابو فاضل بيده كظه وجرة من عكَالة

يسطر الكوم...... والعلوم.... عجب سواهه 

يردم الخيل...... مثل سيل.....اجة وطباهه 

بيدة صمصام.... والزلام... غنم خلاهه 

طب خبط صافيهم      هاون يدك بيهم 

اليصد وجهه انجوة       تنومس وكفتك

...............

وصل نص الجيش باوع ما سلم واحد وراه 

مو فقط يذبح زلمهم يذبح البزرة ابكفاه

 

يرعد الحيد.... والبعيد..... يخزرة ابعينة

مطرت اركَاب..... والحزاب.... تحب جفينة

ازمة انحور..... والنحور.... تكَلة شبينة

 

يصلب الخيالة       ركَب حط بسلالة

 

الرمح بيدة التوة      وتسولف صولتك 

.......………………………… 

دخل وابطال المعارك من دخل شردهه 

بجعب رجله الروس كلهه لو نزل يمردهة 

ظب الحزام...... والجدام.... تخط من طولة 

هد عالحيود .... والجنود...... بقت مذهولة 

واليلاكَيك..... يهم بيك..... شنو يكَلولة 

واليصد بعيونه     سمع طك سنونة

 

تطيحهم سوى       العساكر غايتك 

..................………………  

تمت 

✍️الخادم… حسين حمدان الدلفي

القصيدة 15

(((شجاعة ورجولةّ ابي الفضل) ))

طلع وانتـرست الدنـيا بساتـين

حي الله ابو فاضل نخوةّ حسين

_________________

راكب عالمهر مدري بسفينه

هذا شراع لو رايه بيمينه

ماجت واطبگ الطف بالمدينه 

الهوه والگاع مدري الناس ميتين 

حي الله ابو فاضل نخوة حسين 

_________________

تهب الريح مدري مهرته تهب

تنگب والگمر ياناس محرِب

ضل يشيل بيده الخيل ويذب

حاصرهم ودگ سور وحياطين

حي الله ابو فاضل نخوة حسين

__________________

عنوان البطوله والرجوله

هوهَ الراح موهمه الأجوله

شو گدامه ركضو شنهي ذوله

الفوارس گامت تنادي الدرب وين

حي الله ابو فاضل نخوة حسين

________________

الهوه ضل ينبعث من ريشةّ الطاس

الريشه تميل مدري يميل عباس

بجربته ضل يعبي النهر والناس

مو بس نهر واحد جاب نهرين 

حي الله ابو فاضل نخوة حسين 

__________________

نوبه يصفهم ويحسبهم انوب

على صفحه يروح الثوبه مذبوب

الماتايب گبل ميفيد ويتوب

قيامه وضل يحاسب بالقوانين

حي الله ابو فاضل نخوة حسين 

_____________

موبس موت شايل قمةّ الموت 

ومن يحجي تخضر الگاع ياقوت

كلها مدنگه ياهو اليگدر يفوت 

سلطان وطلع من السلاطين 

حي الله ابو فاضل نخوة حسين 

_____________

مبهوره السمه من يصدر احكام

يحكمه اعدام كلمن شاف الخيام

النخل خايف ودنگ من الاعدام

حرب راضعته يمكن أم البنين 

حي الله ابو فاضل نخوة حسين 

_______________

           عبد زينب

 محمد الابراهيمي

القصيدة 16

ميمر كربلائي ..

يالكاسِر اضلوع الگاع ... يا فارِس الحـَربيّـــه

_____________

يمدوزِن الگـاع اعله ضـَربَة سيفَك

يرتــاح عــــزرائيــــل لو مَر طيفَك

الحومَه سِـبحه وانته فُرها بكيفك

رگاب الزلِم تركَـع لو ... غوجَك جِدَحْ ماضـيه

_____________

ماي الحـَميم و طُفَح بيهم روجَك

من غِيرتَك تغرَگ الحومه بموجَك

مات المُعـسكر بس تِحرَك غوجَك

و بين شَرَد بين الصار ... يحفُر گــبر راعـيّه

____________

لو أَبـرَهه و بقــــوتَه و بفـــــيلَــه

شيصير بي من سِيفَك وســجّيلَه

الرِسَـــنْ غَيمه و المـعارَه اكْحيلَه

هَجــــماتَك ابفَنْ الموت ... جـَــــويـةٍ بـــــريّه

___________

ياكوســـَجْ الطَــــر الزلِـــمْ يمـــهَنـدَمْ

والگــابلَك وَســـط المـــــعارِك ينـدَم

موسىٰ وعَصا سيفَه وفِتَح بحر الدم

كل المحــاوِر سَديت ... شَــــرقيةٍ غـــــربيّه

___________

لَمهُم و ضَمْ الجيش حَدر اگرابَه

سَـيطر وخزراته أَســـد بالــغابَه

گالو علي لـ الغاضريّه شجـــابَه

طَر گَبره وبذو الفـقّار ... خلّه الرِگَب مدميّه

__________

ظـاهِر ابمنــظَر منَـــظره يا مَظهَــر

دَرعَم ابزوده وكِشخ كَشخَة حيـدر

انرَجَت الحومه من دِخَلهــــا الأكبر

يقبُض بخزره الأرواح ... ضرباته عبّاســيّه

__________

شَد واَنْشَد ابشِـــــدِته مَنـــــشود الموت

صَوَّتْ بــصوتَه وخورَس وماظل صوت

اليتــــقدَم اويا خَل يحَـــضِّر تــــــابوت

اليتحارش برمش حسين...رُگبته اتصير الـدِيّه

الشاعر حاتم صبري الكاظمي

القصيدة 17

شور 

((حيرةّ الحسين بمصرع ابي الفضل) )

وي كل حسره شيبه تصير

لحــد مــارمشــي شـيـبـته

صُوَرك عالشريعه هواي

اباوع والدمع سكته

هيه المشكله ياناس

من أرجع شكل لخته

مشه الغالي... مشه الوالي.... مشه البس هوهَ يبرالي

شنو احچيله... ويرد حيله.... ماترهم واتچيله

گطيعه چفوفه ياخويه گطيعه

غده مَطَشر ابصف الشريعه

وأخر چلمه من عرفاني حسين

بچه وبهداي گلالي الوديعه

خل تعذرني اختنه        المنيه حاوطتنه

_____________

أدور بالگمر مذهول

ردت بس بوسه ابوسنه

دم وترب والطعنات

وسهام العده حَنه

أردن للمخيم بيّ

اشگ صدري واضمنه

أنه بحيره... بتصويره....وعَليه ضلمت الديره

دمع هامل... يبو فاضل..... گوم وياي يلكافل

گوم وياي وبغيرك ولوني

گوم وياي خويه مو أجوني

وحيد ومالي بالعربان نخوه

يخَوي استوحدوني وحاصروني

عگب طولك لفتنه        المنيه حاوطتنه

______________

بنص درب الخيم ونيت 

وَنَت حاير وفاگد

أردن للخيم وشلون

أگلهم ضل بلا ساعد

أگلهم مارجع خجلان 

وهوه شلون متواعد

 

أضل انعه.... مثل شمعه... وأزيد النار بالدمعه

  شگللها...  على خلها...... بعد خطوات واوصلها

لاگتني ودمعتي تسولفلها

عله العباس گامت تشرحلها

فهمت دمعتي من مسرعه اطيح

يعني الچان ضلها راح ضلها

 

الدنيا وضيعتنه........ المنيه حاوطتنه

______________

تلاگينه مثل جرحين 

جرح ويباصر الثاني

صده دمعتها من اطيح

چنها تگول ماجاني

تعاتب چنها ملك الموت

تعال الحگني شمتاني

تعال الحگ... يموت الحَگ... گبل لاخيلهم تسحگ

على صدره... وعلى نحره... مابياش عالنضره

بعدني اسمع سوالفها الأليمه

وبعدهي جروحها تصرخ هضيمه

وبعدها تسولف وياي اعله حالي 

دمعها يطيح خيمه ونار خيمه

السكته شيبتنه        المنيه حاوطيتنه

_____________

بس گلتلها زينب وين 

درعي ولامةّ متوني

گلتلي اروح وياك

وخليهم يذبحوني

شسوي بعمري وبلياك

والمن تنضر عيوني

انه اتصور..... أضل منحر.... شگلها وتدري بالمنضر 

الضهر حدب...الگلب شيب... أحفضي العيله يازينب

بجينه ثنينه وشبگت عليه 

تشم بنحري وتبوس بإديه

وتگلي بغيرك الهزله عزائي

وراح تشوفني امشي سبيه

الغربه طشرتنه       المنيه حاوطتنه

______________

عبد زينب 

محمد الابراهيمي

القصيدة 18

شور 

#قصيدة_شور_سماعي 

#خطاب_زينب_للعباس ع 

خويه ركضه ومستحه اكبال الغريب 

ضاب حبلي وسنسلتنه اچبيره ، ، 

امشي واعثر وانا حرمه شي عجيب

ديره تاخذنه وتذبنه بديره ، ، 

شمالني چا بالعبايه اسحگ واطيح 

وفوگ متني السوط ياخذ خيره 

 

- وينك == وينك 

گوم سوي برايتك عكازه 

- وينك == وينك

بهيچ موقف گلبي راد اعزازه 

_________________________

اشمر ايدك عالخيم خل استراح ، ، 

وخل نظل ادعيلك وتدعيلي ، 

انشحط صوتي من الصياح اعله البنات 

وحده ضاعت وحده طاحت ويلي 

انا اگلك گوم وانت تگلي اموت 

وظالين اشكيلك وتشكيلي ، ، 

- خويه == خويه

ضاع رباط الحچي وتفسيره 

- خويه == خويه 

احجار تمطر فوگ راسي الديره 

_________________________

گوم يا فَي الگصب خل اغفه بيك ، 

الشمس ما ترحم سواد احجابي 

طاحن الچلمات من فوگ اللسان 

اعتاب بيه وثگل وزن اعتابي ، 

ويني اوين السبي وركض الدروب 

ابيتي كون ومحد يدگ بابي ، 

- بيتي == بيتي

والله مشتاگه لگعدتي ابيتي 

- بيتي == بيتي 

هسه تايه اولي وتاليتي ، ،  

_________________________

طيح ماي وخل ازيح العطش بيك

نشف ريج الدنيا مو بس ريجي ، ، 

ينزل السوط بتعب ويشل گفاي 

ياهو ليفك ضيج سكنه وضيجي

انا كلساع انحني وبسمك أگوم ، 

ورجوني وفرحوا بترويجي ، 

- باچر == باچر 

نروح يم حيدر انسولف باچر 

- باچر == باچر 

انت سهمك والحسين الحافر ، 

______

علي مهدي المالكي

القصيدة 19

شور ليلة السابع 

سلطان وگمر ... والبيرغ سمه

گاظي بريشته ... اشرس ملحمه

ابيوم الگنطرة ... صايح يا علي

وبطف كربلة … ادخيلچ فاطمه

فرّاس .. بزر حيدرة

عباس ..خلس گنطرة

لعسكر ..امية اجه

مشاه .. مشي المسطرة

بيا علي طباهم .. بس ردم خلاهم

صنم مايتحركون .. عالنهر سواهم

يا ابالفضل ياسيدي

يا باالفضل ياسيدي

===============

من غيم الحروب .. شارب موهبه

صگارة اسود .. رفة شاربه

غثوا رايته .. وچنهم ما دروا 

زينب والخيم .. دينه ومذهبه

والماي .. نُقَص ما نقص 

عندة .. غيوم الگصص

چانت .. فرصهم شرِد

ماكو .. بعد اي فرص

الزلم كلها بعيدة .... وظل يهز بأيدة

الاسد يظبطها ويفوت .. حركات الصيدة

ياابا الفضل ياسيدي

يا ابا الفضل ياسيدي

================

تمثال الشيّم .. بعيونه انّصب

فلاح وصعد .. لرگاب الرطب

بالمذبح يصير .. (اسبعهم) صفر

المنجل بالحصاد .. تاج اعله الگصب

عطشان..وعطشهم طغَة

ويشوف…زلم فارغَة 

توكف .. إلكل اصطفاف

لو شال .. طرف بيرغة

طينة الصلصالة .. الزلم لَينة اگبالة

للنجف نص الجيوش ... ركضاها اصلالة

يا ابالفضل ياسيدي

يا ابا الفضل ياسيدي

=============

صاحتلة السيوف .. يا اترف شرس

امن السابع تره .. خالسهم خلس

يمشرد السباع .. حي الله الكلف 

حدرك موتّوا .. يا اصعب سلس

ياحيد .. يلون الغضب

يانار .. فتت ع الحطب

جواك .. نزل چم سبع

عالخيل .. بقت بس رگب

بالدرب كل شارد .... يلگة منك واحد

زلمة حار وابن ابوك .. ما تطگة البارد

يا ابا الفضل ياسيدي

يا ابا الفضل ياسيدي

===============

صولاتك صوّر .. لا ما ينسّن

يمذّهب هلا .. يربات الحسن

عباس الخيام ... كوكب بس جديد

وخوذه النجمه ذيچ .. واهلالك رسن

شجعان ... دخيلك نخت

عباس .... يغيمة بخت

چفك .... ثلث من علي

بيها … السمة اتحركّت

يالكفيل احچاية .. عله القادة اهواية

زايدة وكلش چثير … ذبذبات الراية 

يا ابالفضل ياسيدي

يا اباالفضل ياسيدي

================

گطعولك چفوف .. وگاطعهم نسل

والروس الكبار .... طاحن للرجل

انت ابن الامير ... يا كشخة صگر

النافخ ريشته .... خليته يذل

عباس .. يهيبة وبطل 

نوماس .. عليهم وصل

وسفة .. يطيحك غدر

كلة .. الذنب بالنخل

ماكو عطوة وطايحة .. الگابلاك اتسامحة

حتى يعبر ما يموت .. اله يقرة الفاتحة

يا ابا الفضل ياسيدي

يا ابا الفضل ياسيدي

=================

علي هادي الخزعلي

القصيدة 20

خطاب زينب للعباس ع 

قريت بوجهك احزانك وجع مكتوب 

دمك تارس التاريخ موش الثوب ، 

وتصح مره متاع الاخ للمتعوب ، ،

نتلاگه بتعب يسوه ورفيف گلوب ،  

-- يحزني الحده مو يمك ، ، ، 

-- الدمع متبدي فوگ اسمك ،  

-- وحلمي يسولف بحلمك ، ، 

على متون الهوه == رسمتك يا ضوه ، 

خذاني شچم حزن == يا شيخ اللوه ، ،

_________________

يرب السالفه التنگط حچي ورباط

حويت الغيره والناس الهه بس نگاط

رمش عينك أمان اعله الخيم وگماط

شحلاتك يابو فاظل من يصير ازماط

يروحي العايشه بضلك

اسولف بيــــك ما ملك

چــذب ماواحد بحلك

على عيونك رسم == أثر جربه وخـيم

صفنت اشگد عليك == ولا مرهن سهم

_________________

يبس عرگ الخيم والنار شدت حيل 

وطلع وجه الغروب وبده يبان الليل ، 

الخيل استفحلت داست بصدر الهيل ، ، 

ورسمت خارطة جرحي بركضها الخيل 

-- السهم صحوة ضمير الدم

-- شرب لونك ورد يحلم ، ، 

-- يمذبوح وفلا تسلم ، ، 

على المامش صحت == ترد خويه ردت 

گبالك ردت اموت == وعلى جسمك طحت

_________________

نسيم انفاسك اشگد بي امان اشتم

نضرتك چــــانت اتعادل الف زمزم

هضمت العطش وفراگك فلا يهضم

تعال الليل يشلع گـــلبي لو خيّم

مطر فرگـاك تفسيره

طحت وتبللت حيره

تشح اخلافك الغيره

اذا نيتك سفر == وراك اطش نهر

ولاتغفالي عين== اذا ماكو گمر

_________________

#مشتركة 

- شاكر الصيمري ✍️

- علي مهدي المالكي ✍️

القصيدة 21

شور ليلة السابع

امير وراية .. ترف بمتونك

احب اعيوني .. التحب اعيونك

يعباس انته .. چبير وهيبة

خضار الجنه .. خذه من لونك

كافلي اوكليمي

اَنتَ في الصميمي

حُبُكَ القديمي .. يعتقُ هَيهات

قدوةُ الغَيارة 

مَلجئ الحَيارة

شُدني في المَنارة.. عشُ حمامات

ما اكلفك وانت گدها وانت راعي الكلفة

هوه ابو الفزعة الچبيرة يفزع ابلا حِلفة

=================

الگلب مجروحك .. ويريد اضمادة

وعلاجه الدمعة .. اعله خدر السادة

طلب بس عندي .. واريد احچيلك

واعرفك تطي .. الطلب وازيادة

طَلَبي فجيعُ

رُبما وضيعُ

اِسْقنِي دموعُ .. مِنْ تلكَ الاجْواءْ

حُزني كربلائي

عطشي بكائي

مَنْبعي عزائي .. لا لَمْ يكُنْ مَاءْ

يا بوفاضل تدري بيه عايش اعله ادموعي

عايشة اعله الله وعليكم تدري هاي اضلوعي

================

دخيل اچفوفك .. يراعي الراية

اريدن اسمي .. شهيد اقراية

يتيمة دموعي .. وابوها اعيونك

واريدن منك .. بچي ومشاية

كَمَدِي حَلِيفي 

جُرحي في النزيفي

يبصرُ الكفيفي .. مِن حُرقةِ الاه

فُضّةُ الضريحُ

بَلسمُ الجريحُ

صُوتُكَ الذبيحُ .. إنّا سمعناه

اثلث چفوف اتمد اليه وحرت من عديتها

چفك الثالث الراية بكثر ما كظيتها

============

عشگتك صدفة .. سواد وكعبة

يحبك گلبي .. يكون تهذبة

يهلبت گلبي .. بفعل ايجابي

يوخر بلكت .. سهام الجربة

عُطْرُكَ العبيري

عطَّرَ زفيري

ب سمُكَ الحريري .. جِسْ قلبي عباس

منشأي رهينُ

فيكَ يا امينُ

انتَ والحسينُ .. ... شريانُ احساس

خيط رحمة حبكم انتم بي اخيط اعيوبي

داخل اعليكم دخيل وشارد امن ذنوبي

==============

دخيل بجودك .. هذاك ومايك

عله كل شايخ .. يفارض رايك

شموس اذنوبي .. تسومر گلبي

اخذ يالكافل .. ادي لفيايك

ليسَ لكْ شبيهُ

جأتُكَ وجيهُ

مَنْظري كريهُ .. كخشبِ تابوت

جأتُكَ ضَبابُ

صادأُ الخطابُ

لمعةَ القبابُ .. خرزاتُ ياقوت

حاجة عندي اگبالك انه وانت هسه اگبالي

بهيئة امعگل اجيتك حتى اذب اعگالي

============

علي هادي الخزعلي

القصيدة 22

لا قمر اله ابـــو فاظل

لا شهم اله اخو زينب

توه صار وجابته زيــــــــنب لبوه

چان يزهي بمنضره

فتح عينه والگمر حـل بي خسوف

والشمس ردت وره

أذن ابراسه علي وســـــــــلم عليه

اتواعدو عالگنطره

حطله وي اگماطه من زينب حرز

راد چفه يشمره

طلع

يشع

ابو فاظل

بالأصل ميته الزلم من ضـهر ابوه

چان بعده بس وصـف

بيوم گـــــــالو عد علي صاير ولد

ماكو شارب مـــا رجف

علي چان ابمشيته ايبين ثگـــيل

شايل اعله امتونه طف

ايده حطها ابأيد زينب بالـــمـهد

هذا الچ زيــــنب وقف

حضر

كمر

ابو فاظل

كلهم ايلعبــــــــــــون چانو بالزغر

وهوه من زغره رجل

حگـــــــهه من تتلوه بي ام البنين

المثله هوه ينحمل

سوه مشهد والعــــــدو صفگ اله

ركضاهم تك رجل

اتشمر ابحافرها جــــــدامه المهر

دنگـــــتله لو زعل

يهد

رعد

ابو فاظل

صيف چانت كربله وبس هوه غيم

والخيم شبـعت مطر

مو چـــــبير الماي بس شافه قليل

مايسد عيــــنه النهر

صاگر السبعين ماواحـــــد يحوس

عركه ويطبها الگـمر

الله سوه العركه بـــــــس ابكربلاء

كون بيده چــا عبر

عبر

نهر

ابو فاظل

حجب كلشي بكربله عن الــخيم

ونگــطع حته الهوه

كلهم ايشوفونه مــــو واحد عدد

بعينه زغرت نينوه

حار كله امن الرمــش حد الجدم

والنخل يمه استوه

راية العباس ما لفـــــــــتهه ريح

وچــفه ماهد اللوه

حرب

رعب

ابو فاظل

كربله بيهه گـــــــــمر سلم ضواه

وبو فاظل ضل يشع

ليلهم ما غمــــــضو عاشو رعب

بالحلم شـــافو طلع

چــــن تشابيه الزلم ماهم صدگ

صوتهم ماينســمع

ابو فاظل عـــــمره ماباوع وراه

بضهره مايلبس درع

حمل

نزل

ابو فاظل

*شاكر الصيمري*

القصيدة 23

طور نسائي

اگعد عباس غارو عالمــــــــخيم

اگعد يبن ابوي انچـــــــان ماتدري

هدت خيلهم وستـــوحدت خدري

ماتسمع صــــحت عباس ياذخري

طاحت خيمتي ونار الجمر حدري

(عباس الگوم حرگوها الصواوين) 

بين النار والدخــــــــــــــان عاليهه

مايدري ابو فاضــل زينب اشبيهه

راح امشي ابعــباتي ويمه اطفيهه

وسكينه ارد اگـــــــله لحگ اعليهه

(ركضت ويلاه والعسكر وراها) 

ماضل صوت بيه ماصحت حيهم

يافـــــــــــــزاع يفزع للحرم منهم

ذيچ اتصيح بويه وهـــاي تدفعهم

شيوديني صــــــوب الماي وندهم

(مو وكت النوم يخواني انولينه) 

گمت اركض وطيـــح الوكت خلاني

وين انطي الوجـه وحترگ صيواني

من شفت الحـــــــوافر گلبي چواني

هاي الخيل هــيه السحگت اخواني

(مالچ ياخيل وتسحگين اخوتي) 

راح اركب هـــــــزلهم وانه مكفوله

مو علـــــــــوية چني ابعينهم ذوله

گلوله ابو فاضــــــــــــل عني گلوله

من تالي بحبــــــل شدوني معقوله

(يادرب الشام راح امشيه غريبه) 

#شاكر الصيمري*

القصيدة 24

فزاعيه ورباط اهوازي،،،لون جديد لم يكتب

شد نگابهه المهيوب.   اليوم يزلزل الحومه

كاشخ يرعب عگاله.    اليوم يزلزل الحومه

عده طلابه وي خاله.   اليوم يزلزل الحومه

زلمه اليوگف گباله .   اليوم يزلزل الحوم

وبحيلة الرايـه معـليهـه

طخت بل غيم مخليهه

والـروس بچفه مبديهه

علاها علاها،،والرايه الكافل علاها

                                                         """""""""""

شيخ الطايفه العباس.   وده للعده گوامه

العطوه بس سواد الليل.     وده للعده گوامه

ترجف منه حته الخيل.       وده للعده گوامه

هاشم جنه حيل بحيل.       وده للعده گوامه

ماتانه وهد لمن صاحت

الزرگه اهون لمن طاحت

براك الشط تلبد راحت

حناها حناها. والخظره بدمهم حناها

                                                      """"""""""""""

                       

حدب هاون العباس.   جاب الزلم دگاها

كفخهه بيمنته الكافل.     جاب الزلم دگاها

البدوي معدل المايل.       جاب الزلم دگاها

شردت لو سلف شايل.      جاب الزلم دگاها

هجت كل شيوخ الديره

تشرد ماتشرد هم حيره

صاد العسكر صيد الطيره

دگاها،،،دگاها،،،وي هيل الگمگم دگاها

                                                     """""""""""""""

ظلمة ورعدت ويه الروج.   جنه مغيم عليهه

اليتنفس تلوحـه النار.    جنه مغيم عليهه

ورطه وگلنه نطلب ثار.    جنه مغيم عليهه

دخيلك يابو راس الحار.    جنه مغيم عليهه

عجت وبحيله ملاكيهه

بل جربه الروس معبيهه

وگبال الخيمه مبديهه

بداها، ،بداها يم عتبت زينب بداها

                                                          """"""""""""

شبت ناره  ياستار.    گد ماحط زلم بيهه

معزب سرفن الجفين.    گد ما حط زلم بيهه

لو خمدت يفر العين.     گد ما حط زلم بيهه

تگوه وعلي گلهه حسين.  گد ما حط زلم بيهه

حط دلاله وبده الشاره

هنياك يل تصبح جاره

تشبع گهوه بشوفت ناره

چواها،، چواها. النار الشبت چواها

(حسين الگرغولي)

القصيدة 25

نعي 

لٱ تبطي الخيم تستاحش ابدونك

يموت الما مجرب فركة اعيونك

عِنـ.̷̷ـديّ اطفال م̷ـــِْن اتغيب كل شوية يردونك

خاف اتروح ويموتون حسرة وماي

امبلل ريجهم طاريك م̷ـــِْن كد ما يلفظونك

عطشانين بس ينسون حتة الماي 

أإأذأإأ كدامهم عباس يلكونك

يخظر لونهم لمن يشوفونك

أإأذأإأ بيناتهم تكعد شرط سنتين

ميشربون ماي انتة اليشربونك

يبيرغ م̷ـــِْن تطيح وياك راح ايطيح

المخيم ويتفرهد كلشي ابظعونك

جربة اعيونك وماتخلص م̷ـــِْن الماي

اذآ عوف النهر واغرف امن اجفونك

مشة وظل يلتفت صار الموادع شوف

شحلات الراية م̷ـــِْن تتوسط امتونك

ماصحت ابكفاك..  ابكلبي صار (السان) 

الله وياك صاح وفزز اضنونك

سمعتة وجاوبت هية الكلوب اكلوب

تفهم بالحجي وتفتهم مضمونك

خادمكم… حسين حمدان الدلفي

القصيدة 26

نعي ليلة السابع من محرم 

العباس عليه السلام 

******

يعباس يعباس   ورم كلبي بفراكك يعباس

يا طيب الاحساس يا طيب الاحساس  مو وكتك رحت يا طيب الاحساس

للماي للماي  لو بيدي فلا وديك للماي

وياي وياي  اشلون انطاك كلبك تكطع وياي

اخوها اخوها   الله ايعينها الفكدت اخوها

عذبوها عذبوها   زينب يبو فاضل عذبوها

حدر الصفاح حدر لصفاح   يخويه اليوجعني حدر الصفاح

مرتاح مرتاح  هنياله الينام الليل مرتاح

الما عدها خوان الما عدها خوان ياهو ايهابها الما عدها خوان

جا وين الحنان جا وين الحنان   مو كلبي انشلع جا وين الحنان

يسيرون يسيرون  يمحلات الحبايب من يسيرون

ينشدون ينشدون  اعليه بكل وكت جانو ينشدون

يحسين فدوه  يحسين فدوه  لطيح العمد يحسين فدوه

ايام حلوه ايام حلوه  انه وعباس عشنه ايام حلوه

حرامات حرامات  العزيز ايموت يبن امي حرامات

غريبات غريبات   راح انصير من بعده غريبات

الكفلني الكفلني  وديني صحت يم الكلفني

ايشوف وني  ايشوف وني  خل يكعد يخويه ايشوف وني

بصف الجفوف بصف الحفوف   اريد اشبع بواجي بصف الجفوف

كلبي ملهوف كلبي ملهوف  عله العباس كلش كلبي ملهوف

*********

الشاعر

تحسين الخفاجي

القصيدة 27

نعي مفجع

السيده زينب ع اتخاطب العباس ع

طلعت امن الخيم والـگـوم كلهه اتناشد اعليـه

ناس اتگول اخت عباس وناس اتگول مو هيه

تدنّتلي الزلم والـخـيـل وشفت واحد يصد ليه

عرفني اختك يبوفاضل وبيدي مسويه بوشيه

گـلـتـلـه انه الكفلني الحيد نكرني وگـال ياهيـه

        جــهــل قــــدري وضـحـك يـمـي 

        ويـگـلــي اصـبـحـتــي مـسـبـيــه

الحچي وضـحـكـاتـه اذني واحسنهن رمـح بيه

تـمـنـيـت الزمن يرجع وتصد بالعين الي اشويه

       واشــوفــن بـيـرغــك يــصــفــگ 

       واشوف الحرم كلهن بيك محميه

هـاي بيا وگـت صـارت الغريب ايشوف علويـه

            *---------------*---------------*

 ✍️بقلم خادم الحسين ع

     الشاعر رعد الجريخي

القصيدة 28

لمولاي العباس محرمـ #اساسية

كسرنه ظهر  الحسين چبيره حچاية الناس

عساها بذمة الماي اخذ من عندي عباس

بعد يا عين التنام 

تبده فياي الخيام 

وبعد ماعندي خوان

...

اگوم وطولي يوگع

اودعه بخطوه و أرجع

يهلبت بي نفس وايگوم وياي

چبير الغيره طايح

اخوي المني رايح

انطبع چفي اعله خاصرتي يدنياي

صحت يحزام ظهري البيك اشد حيلي

انحنيت اگبالهم منهو اليتچيلي

دسولفلي يبعد حسين و حچيلي

اهد بيا ضوه لمن يچل ليلي

گلتله اشيوجعك گال اشيوصلك يم خيمنه

اخاف تموت يحسين اوراك تظل حرمنه

الوكت ما اعرف شضام

تبده افياي الخيام

وبعد ما عندي خوان

...

الطاحن موش چفين

هذني اعيوني الثنين

وعثرت بدرب كله اعيون شمات

اعله وجهي طحت مرتين

گمت ما چني الحسين

تره الرايحله اخو يگضيها طيحات

ضواي اعله النهر ما حسبت يطفه

الاخو مطروح وانه بعازة الوگفه

امد چفي اله شو ما يمد چفه

اديه اترد خليه اگبالهم كلفه

شبگته وچان عباس يضم بشيبي الدموع

تبدت عشرة اسنين وحِنيت اعليها الضلوع

ولا شالتني الجدام

تبده فياي الخيام 

وبعد ماعندي خوان

....

السهم بالعين شفته

صحت آخ ولچمته

متت واتنفس افراگه لگوني

بچيت لغربتي اجروح

وقريت بصوت مبحوح

عله العباس اعمن يا عيوني

شني ظلتهن وشيشوفن بدونك

الاخو لو راح حيره من يسألونك

تكسر ظهري صارت كلمة اشلونك

الدمع بعيوني وانت السهم بعيونك

شگولن للحنينات عفت عباسهن وين

ترد وياي لو لا يبعد عيون الحسين

ضوه ما بين السهام

تبده فياي الخيام

وبعد ما عندي خوان

...

اخذ كل حيلي يا ناس

عمود الطاح بالراس

طيّح عمد خيمتنه الچبيره

لگيت آثار الزنود

مطبوعات عالجود

وصحت ويلاه يا بدر العشيره

رجعت بلا اخو  والخيم سألني

يبعد العافيه ليش الظهر محني

صحت وآنه الدمع ياخذني ويردني

يخيمات النهر فرهد گمر مني

نهر عطشان للماي واخذ من عندي الچفوف

الضوه بعيوني عباس وبعد بعيوني ما شوف

النهر من باگ الاحلام

تبده فياي الخيام

وبعد ما عندي خوان

...

غريب لوحدي ظليت

اوي زينب تلاگيت

عين بعين سولفنه وبچينه

العطاشه لا يسمعون

اخيّچ طاح يم عون

وصفگنه الراح عالراح مندينه

هنا زينب قرت يم منحري المقتل

وذيچ الساعه دارت اعينها اعله التل

صاحت  ياجرح يحسين اتحمل

حرگ الخيم؟ ذبحك ؟ صعدت الهزل

ما دام العلم طاح هزيله باچر النوگ  

چبيره اعله اخت الحسين تطب مچتوفه للسوگ

اسمعه يصيحلي الشام

تبده فياي الخيام

وبعد ما عندي خوان

...

خادم الحسين ( عليه السلام)

كرار حسين الكربلائي

( ابو كميل)

#اللهم_عجل_لوليك_الفرج

القصيدة 29

لمولاي العباس محرمـ #مقدمة

يارب الخوه يهد فركاك

شو صار بسرعه وداعي وياك

اتموت احلامي  وي ممشاك

________

ها عباس اضنهه وياك خلصت عشرة سنيني

وكضه وكت الجنت الكاك يمي شما تصد عيني

يمدنك عمر هاليوم اصدن بيك خليني

عطش خوه بجفاك يصير يالتمشي  ابشراييني

يا توأم روحي ولب حشاي

ياخيمة خدري الكلهه فياي

عون بحب كلبي مايدناك

_________

تعال اكربلي ياسباح كلبي ويابعد لوني

من كل الملامح بيك اريد اترسهن عيوني

اريد اشبع نظر عيناي باجر مايخلوني

واسد شوفي عله رسومك وعليك اطبكهن جفوني

يالعايش بيه وليك اشتاك

بكلهن حاجيني اله فراك

ياشوغة روحي شلون انساك

_________

ادنالي بعد ياخوي اريدن ليه اضمك حيل

باجر تبرد عضامي وعله جدامي يموت الحيل

وين انطي الوجه عباس من تهد علينه الخيل

باجر وحدي ويه الخوف حاجيني شيخلص الليل

والليل بدونك ضلمه وخوف

الفاكد ضي عينه اشلون يشوف

لو رفت روحي وين الكاك

______

تعال اشتمك وارتاح طب بريتي يالريحان

باجر اختنك عباس من اتنفس الدخان

تشح باجر نظرتك هاي ويصير ابينه الميدان

راح اشتاك وكت غروب الك من كل كلب ولسان

وبحرك اخيامي ومن احتار

راح انده خويه الحكلي النار

لا اندل دربك واتعناك 

________

باجر عازتك عباس عازه بحركة خيامي

إمن اضل اركض واطفي بهاي وتوجر ذيج كدامي

ومن تحيط بيه الناس وترجف مستحه اعظامي

وكلهه تصيح الحكيلي وآنه اتصب دمه اجدامي

يالكبل الجلمه ويمي الكيك

ماتسمع صوتي اليوم اشبيك

مهضومه واركض واتمناك

________

كبل لا تمشي ياعباس اذني بصوتك امليهه

باجر بس حجي الشمات وصياح وشتم بيهه

أنه لجلمة يخويه اشتاك باجر وين الاكيهه

باجر يالسبيه هواي اسمع واسكت عليهه

شل كلبي وداعك يابو الجود 

إمودع بالله يالمتعود

حتلو ماترجع هم انخاك

مهدي عباس الهلالي الكربلائي

#اللهم_عجل_لوليك_الفرج

القصيدة 30

لمولاي العباس محرمـ #اساسية

لمولاي العباس عليه السلام   #مقدمة

انكسر گلب الخيام وعلى الخوة السلام يابوفاضل

اصد للطف وانوح واصيحن وين أروح يابوفاضل

ــــــــــــــــــــــــــــــــــــــ

يعباس انكشف ظهري 

وعليه مبينه الكسره

يخوية شما الم حيلي

افكدك والهوه يطشره

اليوم الحيرة ياعباس

عشتها بغيبتك حسره

شمت بي العدو رديت

كل نكله جدم عثره

محتار اخيك يفاعي. ومحد بالاخيام يداعي

وجهي انترس شيب يخوية. بدموعي ينشاف ضياعي 

ياعذابي. يابوفاضل

يامصابي يابوفاضل

اجيت اركض عليك. وعثر كلبي إبديك يابوفاضل 

لوى اذرعي الزمان. وفكد خدري الأمان يابوفاضل

ــــــــــــــــــــــــــــــــــــــ

اخوي أنت وشريج الروح

وغيرك ياوفي شعندي

العمر جبناه سوي انه وياك

وهسه شلون اضل وحدي 

وين الكالي اخو مثلك

شهم وامروتك بكدي

ذا مانتظر اسمع هاك

كل هذا الفزع ضدي

ماريد اجرحك ياغالي. بس بعدك يضيع دلالي

وتعطش بالاخيام يتامه وتتسلب ظعوني تالي 

ياعذابي يابوفاضل

يامصابي يابوفاضل

اخوك اصبح غريب. وصبغ وجوه المشيب. يابوفاضل

اجيتك خوية كوم. وبدا وصار الهجوم. يابوفاضل 

ــــــــــــــــــــــــــــــــــــــ

صرت من حيرتي أتمنى

اكبر امنية بعمري

اغمض وافتح عيوني

واشوفك واكف بظهري

اردهم وانه اخو العباس

ولكن ياكمر تدري

ظهر ماله أخو مكشوف

وعيني وكلبي يم خدري

حيره انه حرت بحياتي. بين العده وبين خواتي 

اعوفك الخيل تجيلك. يمك اجي تضيع بناتي

ياعذابي يابوفاضل

يامصابي يابوفاضل

ظهر عاشر طويل. اهيدن مستحيل يابوفاضل

انه فأكد عضيد. إحزام بظهري وايد. يابوفاضل

ــــــــــــــــــــــــــــــــــــــ

ياخوية الدنيا مابيها 

غيرك بيه اشد همتي

خوية ومن تطيح اليوم 

يعني إنحجت سالفتي 

شوَر بالنهر خيموت

الذابح شارتي وبختي

بعدك لا سكينه تنام

ولا يطفن خيام أختي

برا الخيم ومن ادينه. راحو يطشرون حجينه

ويفزن دموع رقية. وهنه العزيزات علينه

ياعذابي يابوفاضل

يامصابي يابوفاضل

الشدايد يل كفيل. يميلن وين أميل. يابوفاضل

اطيح من اطيح. اكض ظهري واصيح. يابوفاضل

ــــــــــــــــــــــــــــــــــــــ

اودَع عدمن خيامي

وعدوك خليه حضرهن

يخوي بعدك بساعات

اصيرن جوه حافرهن

وخواتك ينسبن للشام

الحادي بجسمك يمرهن

يشوفن ضيم مامشيوف

وحجي يكسر خواطرهن

يرحن على نوك هزيله. وانه سبي الليل طويله

خرايب الشام بلا باب وبيهن تبات العقيلة

*الشاعر/ احمد الهلباوي

#اللهم_عجل_لوليك_الفرج

القصيدة 31

لمولاي العباس محرمـ #اساسية

رد الخواتك يحسـين    مااكوم ايّس مني

گلهن امگطع عبــاس     خلّيهن ايعذرنّــي

بعيني السهم طفه الضوه

للخيم مانرجع ســـــــــوه 

ــ* ********************

مخلوق لجلك سيــدي      من زغري مافارگتك

من بعد ابوي انت الابو    والاخو وكلهن شفتك

ساقي العطاشه آنه وعدل   

والعطش فطّر شفتك

للزهره باجر شعتـــــــــذر     ابلا ماي مارد لختك

من گبل الاكبر مذبـــوح     ريت وسحگني الحافر

ولاشافتك عيني اوحيد      وتصيح الا من ناصر

ودعني يابعد الهـوه

للخيم مانرجع سوه

ــ* ***************

وحده بسهم وحـــده بدمه      انسدّن يبعد اعيوني

واجفوفي كل وحده بكتر        من شبگتك حرموني

تتگطع ادري ومن طحـــت       صحتلهم ايگطعوني

اتعذّرلي مـــــن العـــــــايله        گلتلهم ايتانوني

اتمنه اشـــــوفك بس لا       مااريد اشوفن محني

اتعذبني تاخذني اوياك        امن اتعوفني اتريّحني

للگومه ماظلّت گوه

للخيم مانرجع سوه

ـ***********************

يحسين بسّـــــــك لاتون        ارحمني لاتلجمني

الماي التبده اتلمّـــه بس         ماتگدر آنه اتلمني

كوم وعله سيفي انتجي         ولو ضاگ نفسك شمني

تذبحني اذا سمعك گلت          ظهري انكسر گوّمني

لاتحجي عن هشم الراس       وسولف الزينب كلشي

وگللها باجــر ويّـــــــــــاج        عالرمح حارس يمشي

وگلّلها من دمه ارتوه

للخيم مانرجع سوه

ـ***********************

كل عمري انشّــفلك دمع        هسه انا ابجّيك شلون

تعذرني عفتك وحّــــــدك        وممرود گلبي اعله ام عون

مدري يبــــــــو لون الحلو.       من طحت صرت ابيا لون

التم وارد نصـــــــــي انثلم        ظل وحده من ايصيحون

يحســــين عباسك راح.     اخر نفس ظل بيّه

رد صبّر العطشـــــــانات      خل لايتانن جيّه

من الطعن ضلعي التوه

للخيم مانرجع ســــــوه

ــ* *****************

مستحي امن اسكينه اشكثر       مو آنه الاخلف وعدي

بالجربه اهِم من انگطــــــــع        چفي احضنتها بزندي

ماصابها چنـــــه الســــــــهم         يحسين صوّب جبدي

المتبدي عمري اعله التـــرب         مو جودي المتبدي

رد وحدك ابلايــه احزام       والراح مايرجعلك

لو طحت انسه الياخوي       لاتنتظرني افزعلك

سامحني وشيل اللوه

للخيم مانرجع ســــوه

ـ********************

علي محسن الزيادي

#اللهم_عجل_لوليك_الفرج

القصيدة 32

لمولاي العباس محرمـ #اساسية

مااغمض اعيونك غفة بعينك سهم

مابية اشيلنك واردك للخيم

حيلي ويجودك طاح

والراح مو اي راح

كوم انضر الحالي يشيال العلم

ــــــــــــــــــــــــــــــــــــــ

انتة اخوية الراح اخية وحيلة رايح يعرف امري

ابنص شماتة ورغم ابائي ومن مصابك كاض ضهري

حتى دمعي ردت اضمة وعلة شيبي شفتة يجري

ياخوية من امشيت ضل كلشي خالي

كسرة جرح خليت حتى ابخيالي

ياخوية وبصدري بقالي اشجم نفس

كل حيلي راح من التوة سرج الفرس

والباقي بية اصياح

والراح مو اي راح

كوم انضري الحالي يشيال العلم

ــــــــــــــــــــــــــــــــــــــ

انه يمك وعيشتني يابو فاضل والله حيرة

ما اشوفك يمي واكف وهاية نضراتي الاخيرة

بدر هاشم ليش غايب ماتضوي اعلة العشيرة

المن شليلي انباك مو اي بشر كان

بس شاربك عباس يسولة ديوان

لمن طحت بين علة اعداي الفرح

واحد يكل للثاني لحسين انجرح

اعيون الشماتة اوكاح

والراح مو اي راح

كوم انضر الحالي يشيال العلم

ــــــــــــــــــــــــــــــــــــــ

تعرف انتة حيل جيشي يابو فاضل وانتة حيلي

وهاي طيحة ثلمة خلت بالمعسكر وبدليلي

انتة نجمة الكبرتهة ابنص سماية اتضوي ليلي

دم ابوسط شريان خوايتك اني

وافراكك اعلة العين طكني وعماني

بعدة اخضر وماناشف اصواب الحسن

انوبة رد بيك ولجم كلبي الزمن

كلبي ومليتة اجراح

والراح مو اي راح

كوم انضر الحالي يشيال العلم

ــــــــــــــــــــــــــــــــــــــ

جنت احسك مالي ضهري وهسة اخبرك ضهري خالي

كلشي عايف بية سكتة وبس ونيني الباقي عالي

ثوب لسود مايكفي لليلبسة اعلة الغوالي

تدري الاخو اليشتاك شوفة اخو ايريد

واني ارد اشبكك حيل بس ما الك ايد

الضيع اخية ايحس علية كلشي اختلف

الشيب كبل وكتة المصاب اعليه كلف

شتضن بعد يرتاح

والراح مو اي راح

كوم انضر الحالي يشيال العلم

ــــــــــــــــــــــــــــــــــــــ

من المخيم للشريعة بهالمسافة كبرتني

مو حسينك من اجيتك شيب كلي وماشفتني

وياك اسولف ماتجاوب وبسكوتك موتتني

كسرة بوسط شمات واصعب مواقف

واتذكرت وياك ذيج السوالف

لمن شبكتك شفتة ماليك البرد

ايست منك للمخيم ماترد

لعضامي جرحك لاح

والراح مو اي راح

كوم انضر الحالي يشيال العلم

ذوالفقار الزيدي

#اللهم_عجل_لوليك_الفرج

القصيدة 33

لمولاي العباس محرمـ #اساسية

بگلب ينحب    أتاني ترد    واعاين عالاثر 

اصيح اشرب   لمن شفتك  وكفت أعلى النهر 

عليك بداعتي لا خويه لتردها    

فرح گلبي وايدك للعذب مدها     

ــــــــــــــــــــــــــــــــــــــ

ارحم گلب اخوك اشرب  جفوفك لا تنزلهن

خويه الماي لترده    بس اشفاك بللهن

ها يا عم بنات حسين  يريدنك تعودلهن

اشرب خلي يرون بيك   اشرب وارجع اكفلهن

اصد لايدك    واراقبها   شلت بيها العذب 

 الوقت هذا  اخذ مني    عمر لو ينحسب 

اشفافك جمرة صارت فدوة بردها   

فرح گلبي وايدك للعذب مدها   

ــــــــــــــــــــــــــــــــــــــ

اعاين لايدك وروحي    لاجت يا گمر دنياي 

اگولن  هسه يرفعها     من مديتها اعله الماي 

اهواي تعاين بجفك   ها عباس شنهي الراي 

خويه لخاطر عيوني   اشرب واروي بيك اضماي 

لجل عيني  العشت بيها  وعليك معلمه 

يخويه ارجعلي وعيونك  بلا حال الضمه 

اصيح وايدي ترجف خويه وحدها   

 فرح گلبي وايدك للعذب مدها   

ــــــــــــــــــــــــــــــــــــــ

خله يمر على گلبك   تعاين للعذب كافي 

الماي اليوصل اشفافك   احسه يبلل اشفافي 

اشرب حتى لا تخله   بغيابك ساحة اجتافي 

اشرب حتى ما يركض   من خيامك جدم حافي 

يخويه اشرب  اريد اضمن  رجعتك للخيم 

ويرد حيلي  لون يرد  يرف يمي العلم 

عشيرة گلبي انته وانت قائدها    

فرح گلبي وايدك للعذب مدها   

ــــــــــــــــــــــــــــــــــــــ

ردت يبرد يخويه اظماك   رتك بيك ترويني 

اعاينلك رميت الماي    وضاگت دنيتي بعيني 

راح الماي عالشاطي    يگطع مني جفيني 

راح الماي يذبحني    ويعطشني اخو اسنيني

يعسركنه الذي بحيله   عرف حده العدو

شني برايك   تخليني   وحيد بلا اخو 

وروحي بيا وكت يبن امي وتهدها    

فرح گلبي وايدك للعذب مدها   

ــــــــــــــــــــــــــــــــــــــ 

طلعت من الخيام اعليك    خويه وطولي مو طولي 

طحت والجانوا بعيدين    يبو فاضل تدنولي 

يالعايف اخو عطشان    يخوي الشايل حمولي 

يبو فاضل كسرت حسين    لا خويه العدو يولي

انكسر ظهري   وعلى الشاطي  تشتت عسكري 

وصرت وحدي   اصد غارة  وادير بناظري 

والينصاب عينه اعله الاخو يصدها   

 فرح گلبي وايدك للعذب مدها   

كرار المحمداوي

#اللهم_عجل_لوليك_الفرج

القصيدة 34

لمولاي العباس محرمـ #اساسية

وداع

رخصه رايد حتى يكصد للنهر

وكلي اروحن واني حس ظهري نكسر

گتله روح وضهري مال

وگلبي يندهله تعال

ــــــــــــــــــــــــــــــــــــــ

اول مره بعيوني گفه وجه الگمر شفته

گدامي وجه عباس بس مو ليه واجِهته

سفرت موت بعيونه شفتهه بگلبي ودعته

تعنالي يفيض اوداع وكلشي رايح ابجيته

هوه راح وگلبي من صدري طلع

احزامي اشوفه گصد درب المارجع

بدربه اطرح جم سؤال

وگلبي يندهله تعال

ــــــــــــــــــــــــــــــــــــــ

وحيد ابعالم الخوان من دار الوجه عني

انكساري بين اعليه من اجدامي خانني

رجف كل مفصل ابجسمي وكلشي بيه يسألني

بطه حيلك عليك اهواي وحرت ياحيل يحملني

هوه يبطي وانه تكبر وحدتي

بس بسم عباس اكتل غربتي

موت بيني وبينه حال

وگلبي يندهله تعال

ــــــــــــــــــــــــــــــــــــــ

بطه ع الشاطي شرد اوصف الحاله المرت اعليه

الخِله العافهه العباس ماصارت گبل بيه

افراگ انترست الدنيا اوماتت كلمت الجيه

وهو التارسني خوه جان نفس يزگيني بالريه

كلشي يمي صار رايح ماكو جاي

وخلت العباس بينت من گفاي

اشگد قريب ودربه طال

وگلبي يندهله نعال

ــــــــــــــــــــــــــــــــــــــ

گصدته للنهر مكسور ابكل خطوه صرت مذبوح

گصدته وريت ماشفته دمه اعله الارض مسفوح

على امتون الشريعه اجفوف ونهر يم النهر مطروح

اشوف اگبالي ضهري طاح عليمن ارجي هم الروح

گوم كتلتني گلتله نومتك

كلشي بيه خويه ينطر ردتك

همي متحمله الجبال

وگلبي يندهله تعال

ــــــــــــــــــــــــــــــــــــــ

خذتني الحيره يم الماي السهم من شفته بعيونه

وندهته گوم ياعباس الماله خوه يلونه

تفز لو وحدي ارد للموت اخوك الگوم يردونه

يكافل للعرش خدر يحامي الستر وضعونه

گوم گتله وستمع صوت العدو

موت ينطرني ونه ابعازت اخوو

دمعي ويه ادمومه سال

وگلبي يندهله تعال

ــــــــــــــــــــــــــــــــــــــ

گلتله ابياهي اردن گوم كلشي راح وي موتك

تدري اشگد عفت بگفاي اعيون امناطره اوعودك

تدري جم طفل جم اه احلام اتعلگت بجدوك

عطش خيم عالمخيم عطش مو ماي لمروتك

الخوه خلصت من طفه ع الشط گمر

وكلمه باجر ع الرمح يحجي النحر

جسمي يبقه اعله الرمال

وگلبي يندهله تعال

علي سليم الحسناوي

#اللهم_عجل_لوليك_الفرج

القصيدة 35

لمولاي العباس محرمـ #مقدمة

بعازة اخو  والناس مو ناسي

وين انطي وجهي وراح عباسي

محني وتميل عمامتي براسي 

وينك

...

خِلة المفگود اخيه اتبيّن اعليه من بعيد

تطلع الكلمه  ويّه روحه آخ يفراگ العضيد

ايد تمسح دمع عينه وتلزم لخاصرته ايد

طحت يابيرغ عشيره وعايف حسينك وحيد 

 

الوادم تهابك لو اخو عندك

 وشامت سمعته يگلي شو وحدك

بس الهوه يتچيلي من بعدك 

وينك

...

يا بو فاضل من اجيتك جدمي بچفوفك عثر

وانحنيت اعليهن ابچي غيمه ودموعي مطر

انطيني ايدك ما گلتها خاف اجرحك يالگمر

گوم يالماعندي غيرك طولك احله من النهر

غيم السمه يالمحد يلوحك

وين الله تطلع روحي وي روحك

ظلت تصيح جروحي و جروحك

وينك

..

چانت الدنيه بوجودك تسوه لو طالت عمر

عندي جنه الگبر بعدك هاي اذا صحلي گبر

عمري بالخمسين عام وتوني حسيت بكبر

الراح من ايده اخيه يفتهم معنه الكسر

بعدك هواي اشتمه بالگوّه

ولو شفت اخوك تگول مو هوّه

ماكو احلى منها عشرة الخوه

وينك

...

كلشي يسألني اعله جيتك حته خطوات الدرب

اشلون راح احچي لخواتك والله ماعندي گلب

هواي صعبه گبال زينب دمعة عيوني تصب

خاف تبچي بصوت عالي وصوتها تسمعه الغرب

من تدري زينب طاحت الرايه

خايف تموت بهاي الحچايه

يا كلمه اگلك والحچي هوايه

وينك

...

طحت يا خيمة بناتي يالچنت الهن ضوه

وهسه احس بسكينه صاحت صوط بمتوني التوه

بطيحتك يعني رقيه چفها بالنار انچوه

وخوله فوگ الهزل تنخه وين شيّال اللوه

وحته رضيعي ما يخلونه 

بيدي يبو فاضل يذبحونه

شما شفته اقره كلمه بعيونه

وينك

...

فرگتك چنها المنيه وخلت بجرحي ملح

وكربله قانون بيها الماله اخو يشوف ينذبح

احسبلي يابالفضل ساعه وراسي تلگا عالرمح

اجروحي الف وتسعميه وجرح ما يشبه جرح

ساعه شمرهم يگطع بنحري

وساعه الحوافر ترفس بصدري

وزينب تصيح الحگ على خدري

وينك

...

خادم الحسين ( عليه السلام)

كرار حسين الكربلائي

( ابو كُميل)

#اللهم_عجل_لوليك_الفرج

القصيدة 36

لمولاي العباس محرمـ #مقدمة

السيدة زينب تخاطب اباالفضل 

عليهم السلام

جيت احچي اليلچملك گلبك 

واحچي الحارم عيني النوم  

يامن عافيتي گتلي انتي 

عافيتك سلبوها الگوم

ــــــــــــــــــــــــــــــــــــــ

هدت علي خيل وزلم والحيل خردل ممشاي

انهطر كل نگلت جدم ومرضرضه خويه اعضاي

والخذت گلبي من اطلعت فد صوت صاحو اي هاي

و ابروحي الم گوه گمت يا خويه جدام اعداي

صاحو فزعه اعله اختك الكافل 

واختك ترجف من الخوف

چبيره انه وثكله وعطشانه

واعداكم حد مد الشوف

ــــــــــــــــــــــــــــــــــــــ

عباس طكتني الغرب ما حسبت يوم انطگ

والتارسه اعيون الستر بيهه الزلم ضل تلحگ

فحطو گلبي من الركض وجدمي بجمر يتحرگ

وتعسر علي جرت النفس مخنوگه مابيه اشهگ

حدب كلشي بزينب بعدك 

وكلهه جروح ام اعون اثگال

يگودوني من اتنفس خويه 

شحاله الواصل هذا الحال

ــــــــــــــــــــــــــــــــــــــ

محتاره اشاكف بالشمر لو اطفي نار الخيمه 

لو لم اليتام الصفت طشار وسط الهيمه

والعطش وازاني وطحت وفوگي العده چن غيمه

هيج انه تاليتي افه ياخويه والله اهضيمه

بعد العز والهيبه الچانت

تاليتي ارگض بين الخيل

وانطگ وانسب واعثر خويه

وماضل بيه اوشالت حيل

ــــــــــــــــــــــــــــــــــــــ

عباس سالفت العطش انساهه وارجع ليه 

بس ماي محتاجه جنت بعدك صرت مسبيه

ومابيه شي ما منلچم من هامتي لرجليه

افراگ وسبي وحرگ وعطش ياخويه كلهن بيه

لا عالبال ولا عل خاطر 

مسبيه اصبح فوگ النوگ

رهمت خويه شلون وصارت

بت حيدر تدخل عل سوگ

ــــــــــــــــــــــــــــــــــــــــ

خويه الاخو مثل الهوه ولو راح يخنگ اخته

واستغني جنت من النفس لو رسم وجهك شفته

وهسا بكل شهگه اختنگ وطعم الهنه فارگته

وجمرت افراگك بالگلب ليل وصبح حارگته

خلصت روح اختك ياروحي 

وافراگك ضوگني المر

وصوفر كلشي بزينب بعدك 

ياكلشي بزينب اخضر

ــــــــــــــــــــــــــــــــــــــ

بعدك شباب اعله الگبر موش انت الي يطمه اتراب

بداعت الحدب من طحت گومنه خن نرد احباب

يازرع گلبي بشوفتك يلتم شكو بروحي اصواب

وارجع اميره مدلله بجالك يخويه وانهاب

وتشفه اجروحي ويسكت نوحي

وطولك يرجع خويه احذاي

وترد اجفوفك والجربه

وتشربني بچفك ماي

امير الساعدي

#اللهم_عجل_لوليك_الفرج

القصيدة 37

لمولاي العباس محرمـ #مقدمة

عباس بالخيمه شوف اشجره

عباس فزعت شكو امخدره

عباس لطمن مره ابصف مره

ــــــــــــــــــــــــــــــــــــــ

من المشرعه ابلايه الكمر رد الحسين ابضيمه

احتار ابجوابه من انسأل جا وينه راعي الشيمه

الخيمة ابوفاضل مشه وطيح عمود الخيمه

اباب المخيم ضل يون ويلطم احسين ابصدره

وكباله شوغات الحرم وصياح تارس خدره

مكسور طوله ومختنك صاح وتحودب ضهره

عباس كلشي انكسر من رحت

عباس اهونهن اتحدبت

عباس يالجرحك اشمكبره

ــــــــــــــــــــــــــــــــــــــ

يالكتلي ضهري منحني همزين فاگد عيني 

يالجنت الشوفنك شمس وبفيايك انغطيني 

كل ما اصد صوب النهر الگاك  بينه وبيني

يابعد ذنيج الطفن لو ردن اترسهن بيك 

شمحلاته وياك العطش بس منكسر كلبي عليك

يحسين كاتلني القهر لتضن اخيك ناسيك 

يحسين  سلملي عالبالخيم 

يحسين  ذكروني لو رف علم

يحسين  عيني الهن مناطره

ــــــــــــــــــــــــــــــــــــــ

من رحت والخدر تون واثغيب كل اخيامي

وكل ساعه وحده من الحرم تلطم وجه جدامي

واتلفت وبلجن ترد  وترجف احسهه عظامي

وايموت بعيوني الضوه كلما اشوفن زينب

طاحت عالتراب وتدك عالراس حيل وتنحب

واتشيل بيديهه الرمل واتطشه فوك المعصب

عباس امشي واطيحن كمت

عباس بيهن انه اتحيرت

عباس خايف يموتن تره

ــــــــــــــــــــــــــــــــــــــ

هديت حيلي من كلت عباس كمت اتعثر 

اشافت اعيونك بالخيم وصرت اعله زينب تفتر

من طاح يحسين العمد شصار ابعقيلة حيدر 

يحسين كل لام الخدر عالصار خل تعذرني 

وسمع بجيها البالخيم لتكول ما تسمعني 

عالراس لا تلطم بعد كلها اللطم يوجعني 

يحسين  عذرو الوكع عالنهر 

يحسين  عليكم دليلي انفطر 

يحسين  بزينب احس حايره

ــــــــــــــــــــــــــــــــــــــ

عباس سكنه من البجي خدهه بدموع اتحفر

وحافي اركضت من الخيم واتاني كعدت بالحر

لتكول عمج مايرد يابويه خلني اتنطر

بلكي بجمر كلبي يحس ويحن دليله اعلينه

يابويه اكصد للكمر  بس كله تبجي اسكينه

ماريد جود ولا عذب بس خله يرجع لينه

عباس طاحت تون عالترب

عباس تكسر يخويه الكلب

عباس حدما غفت عالثره

ــــــــــــــــــــــــــــــــــــــ

يحسين صرخات الخيم توصلني واتهز نحري

وامناطر سكينه اشد من كل حوافر صدري

اعليهه سلمني اشكثر وخليهه تقبل عذري

خل تكطع الضنه بعد المذبوح شيرد ليهه

مديوس بخيول وطعن واضلوعي امكسريهه

ومترس ارماح ونبل وعيني السهم طافيهه

يحسين سكت خواتك بعد

يحسين اعليهن دليلي انمرد

يحسين بس كلهن لخاطره

لخدام الحسين 

سيد بسام قابل الياسري

ومهدي عباس الهلالي

#اللهم_عجل_لوليك_الفرج

القصيدة 38

لمولاي العباس محرمـ #مقدمة

تعال. مو اغلى من عندي النهر

تعال. طاح الرماد على النظر

تعال. الحكني ياخويه الكمر

تعال

............١.............

عباس مد روحك الي وافزعلي لو توصل دم

يلما يشبهك كل مطر. من اطيح اعرفك تلتم

طاحت خيامي من الحرك وانكطعت النياط

وضلت مره اطك بمره من شدت السياط

لتخاف طولي ماطلع بلترب طولي غاط

عقلي ركض علتل صعد وللنهر كلبي شاط

اصيح. وشيسمعه صوت المختنك

اصيح. عباس بس لانفترك

اصيح.. وبيه الصدى يكلي اعتذر. تعال

............٢...........

كلما اصيح وماتجي يطلع الشيب بروحي

رماد الخيم مو جربتك بلل يخويه اجروحي

عباس منك ماشفت ياخويه بس دلال

الحكني شو هذه الشمر جايب بديه حبال

دخان هسه تنفست او وي دمعي لونه سال

الماينجوي بنار الخيم يتجوه بلرمال

اموت. طول وي طول وياك انه

اموت. ولا اظل هيج موهدنه

اموت. عباس موظهري انكسر. تعال

........... ٣.............

لحسين انه شما عاينت شوف النظر يتوجع

كل وذره تلصف من بعد شايف ضوه يتكطع

لو يدري ياصدر انهشم جان استحه الفرات

بالف وتسع مية جرح عطشان اخيي مات

كلما يشوفن مدمعي يلفني سائلات

ياعمه ابونه مايرد حسين وترك بنات

يخوي. ياألم ياحزن أحمله

يخوي. شو عذبتني كربله

يخوي. كطعوا من حسينك نحر

تعال

................ ٤.............

ماتن اجدامي من الركض عمري انه ضايع فيه

من رقيه جروا مهجتي من جروا الترجيه

للخيمه ترجع تنجوي تركض تجيهه خيل

جفهه على اذنهه والدمه صار علخدهه سيل

شما افزعلهه اوكع ارد ماضلي خويه حيل

صفصاف ديرة كربله واحنه طبعنه هيل

شصير. الزم طفل يشرد طفل

شصير. لوجتفوني عللهزل

شصير. ماينحمل ضيم الدهر

تعال

................. ٥............

قماش الخدر كزبر وفه لمن سمع بجروحك

وحسيته موذاك الخدر متغطيه جني بروحك

بعيونك مثلث كعد يعني انطفه ظواي

وجفوفك انكطعن غدر يعني انكطع هواي

عباس غير انت الكمر. خويه اطلع بسماي

الماي ماشربه جنت جنت انت اليه ماي

بقيت من جفك الجف السبي 

بقيت. تحرسني عين الاجنبي

بقيت.. وي راسك احجيهه بقهر

تعال

...................

الشاعر بشار السامي

#اللهم_عجل_لوليك_الفرج

القصيدة 39

لمولاي العباس محرمـ #اساسية

بين الخيام… صوت الجدام… اعرفت من مشيتة

هذا عباس… يمشي بأحساس… طلع من خيمتة

من وصل يم خيمتي

صاح يختي وهيبتي… ه̷̷ـَْـُذآ عباس 

………………………………………………… 

گعدنة أثنينة وسولفنة بهداي

عــن باجر  اذا مــاظلي حماي

گتلة الماي شنهو انتة موجود 

گــلي باجر يذبحوني عالماي 

بݘينة اثنينة بصوت… دمعتة اطيح ياقوت 

شسوي وباجر الموت… يفرقنة 

گعدنة أبين الخيام… شفت بعيونة الأحلام

حجالي شڰد على الشام… وثگل همنة

شفنة بالليل… نجمة اسهيل… تراݘي بالسمة

والحݘي هواي… وظحكة الماي… تهيج بالضمة

أختلط دمعة ودمعتي

صاح يختي وهيبتي… هذا عباس 

…………………………………………… 

ينسمة عافية تهب وكت الغروب

انة ادري الموت خوية اعليك مكتوب

اريد اوياك اسولف باجر شلون 

باجر كل حݘينة بس بالڰلوب

لون تتگطع اجفوف… تعيش بگلبي الحروف

الرسالة ابطن الظروف… وتحاجينة

السهم لوغمض العين… اندهي وصيحي يحسين

طريق المشرعة منين… وتواسينة 

حݘيي الگلوب. تفهمة الگلوب.  عكس حجيي السن

بين الجروح… كلشي مَسمَـَّوُوُح. عذابات وحزن

يختي ݘنݘ رايتي 

صاح يختي وهيبتي… هذا عباس 

……………………………………………… 

رسم بعيونة خيمة فوگ التراب

ورسم روحة ابو فاضل للستر باب

گبل صوت الأذان ورحنة لحسين 

ثلاثتنة ڰــعدنة گــعدت احباب 

كتبنة ذكرة الخوان… الحنينة وية الحنان

قرينة گبل الاذان… مصاحفنة 

يأذن گام العباس… خذاني بصوتة الاحساس 

أتوضة بروحي الانفاس… ومسامعنة

صوت الأذان… بطور الاحزان… أطمئن من اسمعة

كبر وصاح… والفجر لاح… ونظر للمشرعة 

انطيني سيفي وخوذتي

صاح يختي وهيبتي… هذا عباس 

…………………………………………… 

يسگاي العطش يالشايل الجود

يعامود الخيم وشلون عامود 

اذا توكع تطيح اخيامي عباس

الخيم شيجيسهة كون انتة موجود 

يرواي العطش نار… المهم ترويلي الزغار 

تشابح كل الانظار… على عيونك 

اجيب العلگمي وياي… اذا يردون بس ماي

يراي الطايفة وراي… يسمونك 

يختي ياام عون… خل يشربون. دمعتج والصبر 

بكل الاعذار… سكتي الزغار… عسن يطفى الجمر

رسمي الهم جربتي

صاح يختي وهيبتي… هذا عباس 

………………………………………………. 

يماي الله أشتهاك الماي وبطيت

رحت وانة بغيابك وحشة صليت

م̷ـــِْن طحت وتلگت وجهك الگاع 

تهدم كل كياني وركن بالبيت

ركضت بساع لحسين… لگيتة يدير بالعين

تعال انطيك ݘفين… واخذ عيني

أخيك ظهرة مكسور… يگع ويگوم مجبور 

دمعتة وگلبة مجمور… يحاݘيني

دمعة وازاه… واحݘي وياه… البگة براسك بعد

احجيلي معذور… راسة مطبور . اجة براسة العمد

ونكساري بمحنتي 

صاح يختي وهيبتي… هذا عباس 

……………………………………………… 

تمت 

الْحٍمَدٍ للـّہ 

✍️… حسين حمدان الدلفي 

رزقهم منهم وأليهم

#اللهم_عجل_لوليك_الفرج

القصيدة 40

لمولاي العباس محرمـ #اساسية

لمولاي اباالفضل العباس عليه السلام

رد محني الضهر ومدنك الراس 

يلطم عالوجه ويصيح عباس

وصل يمي  وصفك جفه وشبكني 

وصرخ زينب مشه العباس عني

راح راح 

........... 

مثل شفافه رد حسين ذبلان

وجنه اهلال ضهره

ماهي اعمامته وحافي وركض جاي 

وي كل خطوه عثره

مهضوم ويريد يسولف وياي 

لجن خانكته عبره

كض خاصرته وتلوه وبجه وصاح

أخوج اطاج عمره

حجه هالجلمتين وطاح بالكاع 

وجلمه راح اخوي اسمعها كلساع

وجلمة ياحزامي العذبتني 

وصرخ زينب مشه العباس عني 

راح راح

................

وصل ياكل بروحه حسين ويلوج 

ويعاين عليه

وتكابلنه جروح مكابله جروح 

وحط ايده بأديه

كال المثلي تسحك سدره الخيول 

من يوكع اخيه

وانتي خلافنه تمشين للشام 

مكيوده وسبيه

ولطمت ودرت بيدي تراب فوكاي 

وكابلني الحسين ولطم وياي 

وشفت دمعه اعله خده وزاد وني

وصرخ زينب مشه العباس عني 

راح راح 

... ... ... ... ... ... ... ... ... 

كتله شلون مات الكافل وليش

عفته وكمت عنه

كال المستحه وشوغات الاطفال 

هنه الموتنه

هنه الودن العباس للماي 

ومنهن زاد ونه

ولو ما ميت اعله النهر عباس 

يموت اكبال سكنه

موش سيوف اميه الجاتلاته

اخيج مات من كد مستحاته

كال اسكينه طلبت ماي مني

وصرخ زينب مشه العباس عني 

راح راح 

................... 

اجيت ابجي اعله حال حسين وحسين 

اهو يبجي اعله حالي

وخلص حيلي وطحت يم باب الخيام 

واجت تنشد اعيالي 

كتلهن الطمن طاح عباس 

أبو البيرغ العالي 

مثل زخ المطر طاحن عله الكاع 

ويلطمن اكبالي

وحده تصد لوحده وما مصدكات

الواعدهن بماي اعله النهر مات

وكتلهن تعالن جابلني 

وصرخ زينب مشه العباس عني 

راح راح

...............

شفته يناشغ حسين اعله عباس

ولجله انفطر جبدي

يسولف ويه روحه واسمع يكول 

غيرك ياهو عندي

كال خلاف اخيي كثرت اعداي

حته الماي ضدي

اخوي الجان لازم ضهري لا طيح 

مشه وخلاني وحدي

الله يعيني اعله احزام ضهري 

جافاني وخلص وياه عمري 

هسا كمت احس بكبر سني

وصرخ زينب مشه العباس عني 

راح راح

عباس الفرطوسي  الكربلائي

#اللهم_عجل_لوليك_الفرج

القصيدة 41

لمولاي العباس محرمـ #اساسية

اجـيــت ارگض يعباس

واديي مشـبوچه علراس

اجيتك لمن بيــدي اطــفت اخيام

بطيت وادري شوفك بي سهم نام

ــــــــــــــــــــــــــــــــــــــ

ابنهار ابفيـك امشــي چنــي باليل

وظوه اعيونك ابليل ايصير دربي

اجيت أركــض وأعــثر فاگـده الراي

وابكل طيحه احط ايدي على گلبي

اجيـتك شــايطه من شــوغه النار

احترگت خويه بيـهن طارف اعبي

ابـــد ما صـــدگت ترجعلي عــباس

واشكثر ياخويه رف الرايه اربي

ابدربي واحچي وياي

ادري يســـمع أبــچاي

وترد وياي ادعي الهاي الايتام

ــــــــــــــــــــــــــــــــــــــ

فوگ التل وگفت وصحتك اهواي

يـــاعــبـاس لـحــگ افـــزع الـنه

يلمـــشتكم الغـــيرة بــلا راس 

يابـــو الغيــره بالــنار احترگنه

الحرم فزعت الناس ابخيل وابنار

وكـــله اذبحـــت بالهــيمه اهلنه

احچي اليوجعني خـويه ويـاك

هظمــونه ابوگعــتك ونظـربنه

كل هيـبتنه راحت

من رايتك طاحت

وحچيهم من اسمعه لوعت اسهام

ــــــــــــــــــــــــــــــــــــــ

نزلت وشوف دربي ريحة اخوان

ماظل شوف بيهـن هاي الاعيون

نص شوفي گظه ابدخان الاخيام

ونص الثاني من دمــع اليروحون

الفگدت شـــوفك وفيـك يعباس

أبـشوف الاعيـون اتوچد اشلون

عثرت ابجسد دامي وانه ابممشاي

گلبته واعرفت هذة الجــسد عون

ما عطـلني ابنـي

اعرفك تنتظرني

وگلبي الشوفك ابهل ساعه محتام

ــــــــــــــــــــــــــــــــــــــ

المسـناية بــعدت خـــوية ع العين

بوجودك چنــت اشـوف النهر يمي

ابدربك روحي خلصت هظم وادموع

ومامش حـيل ينگــل خــطوة جدمي

ابعمرك ما صـحتني بسمي واليوم

ابشتم وابصـوت غربه اسمـع اسمي

ياطـــلاب حــگ عالــوني بـچفاك

انذبحت ابلايه دم من شتمو امي

من اسمعهم يشتمون

وشل دمــع الاعيـون

وماادري بعد درب السبي اشظام

ــــــــــــــــــــــــــــــــــــــ

وصلتك اسمع الظاهدني هليوم

من اجــروح گلبـي يبــو الغــيره

احسـينك يكسـر الخاطر يعباس

مـن انصــاره طاحـت والعشيره

يدير اعيونه يلگه ابظهرة نسوان

ونــگعت لحيتــه بدمــوع حيره

الكون ابعينه صاير دونك ازغير

بس الحســره من تطـلع چبيره

شفته اشگد لچمني

من بوحده محني

وجرح الخوه بيك شلون يلتام

ــــــــــــــــــــــــــــــــــــــ

شفت ابعيني يمناه سلت السيف

ولچمني ابيسرته من يكظ خصره

مو محني مجـازاً تنحــچي هاااي

ابنص الحرب يمشي اهلال ظهره

الحيله الگاظي كله ابفگدك وطاح

امعصبه اعيــونها الخيل التنطره

اتهشم صدره شوغه ألمن الخيل

تجي لحسين وادوس على صدره

اشباقي ابصدره وادوس 

وصدره اسهام متروس

ويزينب مادري شمحظره الايام

علي الحميداوي

#اللهم_عجل_لوليك_الفرج

القصيدة 42

لمولاي العباس محرمـ #اساسية

لمن رحت مشتاكلك

لمن طحت معتازلك

ضلت الا من ناصر اعله الساني

عباس تكتل حالة الوحداني

مشتاكلك ..معتازلك

ــــــــــــــــــــــــــــــــــــــ

مشيت ..ودريت

اخر نضره الك بيهة البعد واضح

وراك ..بجيت

جواني اعليك كلبي جويه الرايح

تطيح..محال

كلتهة وشفتك ابصوب النهر طايح

اتخيل حالي وكلي

طارش موت وصلّي

وشفتك بس شكل لهلي..والله حيرة

المن يسولف روحتك

الثكلان جرحه ابطيحتك

احجيلمن والعيله كلهة اتاني

عباس تكتل حاله الوحداني

مشتاكلك..معتازلك

ــــــــــــــــــــــــــــــــــــــ

اشتكول..امنعود

شطيح ياعمد خاطر يفهموني

الزغار ..تريد

ماي وحته ماضل ماي بعيوني

الوصول ..ممات

اعرف راح اموتن من يسألوني

شحمل ياامل طفلة

شحمل ياوجع نبلة

ياهو اليحمل انكلة..وهايه ضيعة

اتخيل يخويه احسينك

ايسألونه عنك وينك

المن اكول اتفرهدو خواني

عباس تكتل حالة الوحداني

مشتاكلك..معتازلك

ــــــــــــــــــــــــــــــــــــــ

الوداع ..ضياع

المضيع اخو اعليه الذبح هين

وصفيت ..نحيل

الكسر حتى ابخيالي واضح امبين

الشجاع..يطيح

ومن بعده الشماته اتطول ليهة السن

شامت يندس بشامت

لون حسين ضل باهت

وتعرف ليش اضل ساكت..شرد اجاوب

جلمه جرح كالوهة

وبيا كلب خلوهة

كلماتهم سيف ويحز وجداني

عباس تكتل حالة الوحداني 

مشتاكلك..معتازلك

ــــــــــــــــــــــــــــــــــــــ

الي راح..عضيد

وآخ المنوجع ياخويه بالمعنة

الحنين..الوصال

راح الجان روح ابروح يجمعنة

ضواي ..اشتغيب

الضوه الرايح يعيش العين بالمحنة

ضي واخذوك من عيني

وشيب اطشرن اسنيني

وهسة انكطعت ايميني..من عفتني

قلت يخوية الحيله

حسينك منو ايتجيله

يجناح اخوك اتكسرن جنحاني

عباس تكتل حالة الوحداني 

مشتاقلك ..معتازلك

ــــــــــــــــــــــــــــــــــــــ

الممات ..قريب

بعدك بس نفس باقيلي من عمري

انحنيت ..عليك

ياعباس يالبعدك كسر ضهري

الخيول ..تدوس

صدري بس حسرتك كسّرت صدري

موقصه سحك عشره

اخيك من طحن صدرة

عاييش ليك الم حسره..من وداعك

ياخوية ضيعت حيلي

غيبت ضواي ابليلي

عكبك طحت بس محد اتلكاني

عباس تكتل حالة الوحداني

مشتاكلك ..معتازلك

ذوالفقار الزيدي

#اللهم_عجل_لوليك_الفرج

القصيدة 43

لمولاي العباس محرمــ #اساسية

يادرب النهر .. كاسرلك ظهر .. هاضملك اخو

راح بدربه شاب..رد لرمشه شاب..وبيه يشمت عدو

رجعلي~~ يمشي وعثر

رجعلي~~ فاگد كمر

رجعلي~~ محني الضهر

وبيه يشمت عدو

_________

لمن ناده گمر هاشم//تعال ادرك//اخوك حسين

يگوم ويگعد انضرله//ولزم ظهره//وعثر مرتين

العمر يگصر على الغربه//وعلى الخوه//وعلى الجفين

انكسر شاف العلم طايح//وبخو نابت//سهم بالعين

راد ايشيله راد..وهم لبگلبه زاد..متگطع نضر

عباس العضيد..يبقى هنا يريد..يم راكَ النهر

تهدم~~ حسين وبچه

تهدم~~ صمته حچه

تهدم~~ حمله رچه

وبيه يشمت عدو

_________

رجع باين كسره طوله//ومو هوه//المشه العباس

حيله بالزمته الخصره//وبيه يوجع//كلام الناس

شيبه طالع ابظله//وبلا اعمامه//اجه اعله الراس

بهاي الساعه هم ميت//ابوي احسين//ابهل مقياس

اول مره هاي..يمشي وماله راي..ومتيه الدرب

يا خلت اخوه..ويا ضحكت عدوه.. تعصر بالگلب

اشوفه~~بانت عليه

اشوفه~~الوحده ابمشيه

اشوفه~~يصفچ بديه

وبيه يشمت عدو

_________

ما صارت گبل هايه//يرد خالي//ويرد وحده

يَگصر خطوته ابمشيه//يرد المن//شبقه عنده

ايتلكاه عمي كل مره//وعلى صدره//يدك زنده

منو الضل بيه نفس عايش//ايتلگه حسين//ويجي ايسنده

ضلت بس نسه..وضل الوحده..العنده بس عليل

هيج ابمنضره..الخاطر يكسره..الماعنده خليل

حسافه~~اعيونه بچن

حسافه~~دار الزمن

حسافه~~ايحير ابضعن

وبيه يشمت عدو

_________

وصل واقره بنضر عينه//وانه بنضره//اعرف البيه

سكوته تارس الهيمه//ومتعينه//شفت رجليه

احاچيه بويه ما يحچي//شكثر مهظوم//النهر ماذيه

احتار شيحچي وي عمتي//وشنو يگلها//شترك وشبيه

ايطيح ياعمود..ويخبر الوجود..ويخبر عمتي

ميت كافلچ..راح الدللچ..وطاحت خيمتي

يزينب~~طاح العمد

يزينب~~شضلي بعد

يزينب~~مالي سند

وبيه يشمت عدو

_________

گعد وي زينب ايگلها//انكشف ظهري//العدوي الان

وگرب موتي وگطع نحري//اوكت سبيچ//يزينب حان

وبعد ما تبقى اي خيمه//وعگب عباس//غرب الوطان

اميرة ضعني يحدونچ//عله هزله//شكثر بلدان

لا انه واخوچ..واليحدي عدوچ..واليئمر شمر

وكتچ ذاك چان.. المشي بلا امان..وي طر الفجر

دلالچ~~فوكَ النهر

دلالچ~~ابگطع النحر

دلالچ~~يگضي ابسفر

وبيه يشمت عدو

حسين سعد البهادلي 

#اللهم_عجل_لوليك_الفرج

القصيدة 44

لمولاي العباس محرمـ #موشح

السان ماظل عندي اسولف طيحتك

راح ياعبــــــــاس اطيّــــــح خيمتك

ـ#####################

جنت حيلي وهســـه اخوك ابلايه حيل

گبل ماترضه ابجي هسه ادموعي سيل

كلشـــــــي من طفّوك صـــار بعيني ليل

ومال ظهري من سمعت بصيحتك

ـ####################

يوم گتلك روح موت اتفســــــــرَت

موضمه الفگدك جبدّتي اتفطـــــرت

حـــــــــاير ابيا لون ارد للمــــــادرت 

بيك طايح  والگلب يم رايتك

ـ##################

الطاح اخوه احزام للفزعـــه يريد

وحيلي كلما ودّعت واحـــــد يبيد

صاحو العدوان ظل ابلا عضيـــــد

اتشمّتو بحسين تقبل غيرتك

ـ###################

ياوفي يالعوّضت كل المشــــــو

بطحيتك للخيــــم خويه اتگربو

مالي تچوه لو طحت بعدك درو

يابوفاضل هاي ساعة عازتك

ـ####################

اعمامتك عالغبــــــــره لو هذا الگلب

اعيوني ذني لو اجفـــــوفك عالترب

الخيمتك مااشيلها الهامه امن اطب

وشفته شمسوّي العمود بهامتك

ـ####################

روحتي عنك امَر من جَيتي الك

وتدري بالكاتلني نفســــه الكاتلك

شلون اكولن طــــــــــــاح للتأملك

وتدري جم عطشانه تانت جربتك

ـ#####################

انشل لســــــــاني وحيل ماعندي بعد

اضم دمعي ابردني ماظل عنــدي خد

راح اذب من خيمتك خويـــــــه العمد

بهاي اخيتك راح تدري بموتتك

ــ######################

علي محسن الزيادي

#اللهم_عجل_لوليك_الفرج

القصيدة 45

لمولاي العباس محرمـ #نزال

يعباس.. منو المثلك شهم

يعباس.. يصگار الزلم

___________

يكاسر حصن الصفوف

يالملعبها السيوف

على جفك تجي اطوف

خذت منك بخت

يالمرجفها السباع

ركضت وخلصت الگاع

وترد لزينب بساع

لون خويه اندبت

اليل ضايع يا گمر لخيامك

يانهر ضل ما ركض كدامك

____

سيفك يندل الروس 

وحافر مهرك ايدوس

عليها وصار مخلوس

يالمتعب الشگر

بيك شنحچي ونگول

يكاسر ظهر الخيول

من تركبها وتصول

يعين الله المهر

دخيل جفينك التذبح قاده

دخيل ريشاتك يعم الساده

_____

زينب ناده شتريد

لجلها خيبر انعيد

اخوچ الكلف صنديد

يسوي الما جره

وما يعصي علي ماي

اجر لخيامچ افياي

ارجفه الرايح اوجاي

واجيب الاخره

وما اهم كون اگطعو چفيني

ترد تخضر لو صحت يحسيني

_____

تهد اويا علي تصيح

مالت گصبه بالريح

الدنيا اتگوم وطيح

لمن تنگل جدم

تجدم ترجع الناس

وگامت تشمر الراس

صيحه الدخل عباس

ولا ضلت زلم

ما نقيس الگمر مره اويه النجم

نگول زلمه وبعد لا منعد زلم

_____

كلشي ينتخي بيك

النهر قبلهن ايديك

برايك ضل يماشيك

بجربتك طب سجد

خصمت الحچي بفعال

بالطف سلم من گال

روح حسين و الآل

وجيشه من تُعد

ياحچي اليكفي ونوصف اسطورك

وانت بس حسين يعرف نورك

_____

حسين سعد البهادلي 

#اللهم_عجل_لوليك_الفرج

القصيدة 46

لمولاي العباس محرمـ #نزال

لمولاي ابا الفضل العباس ع 

رنة نواقيس الحذر .. من النجم طالع گمر

حيّ على ذِل النهر .. گمر گمر

========

بسم رب الخيّم بسمل .. فر مهرة ولوه الجامة

طلع يضوي بحيث اتشوف،، بيضة انگلبت الشامة

بعدة ايودع وما جاي ... وتوة امرتب اللامة

اخر واحد امن الجيش .. رعشن ايدة واجدامة

إمعدل او يمشي نسق .. يمشي ويرتل بالفلق

من الحسد مو من خطر .. گمر گمر

===========

اقصد بالنجم يا ناس .. كل خيمة امن المخيّم

وطلع منهن گمر بي ماي،،على ارياگ العطش غيّم

فارس حيدري وفرّاس .. ابشيلة امة يتحزّم

بترانيمه الحروبية .. گام ابزودة يترنّم

بالراية ايدة امبخرة .. كظاها كظة گنطرة

والراية خاچية ظهر .. گمر گمر

=============

ابثنيّات العطش والموت… طلعت سكنة بالجربة

زمزم ليش ماموجود ... وخيمة زينب الكعبة

النهر متروس كلة اثگال .. وروس بروس مترتبة

حنطة لو ترش عالروس .. ما طاحت ولا حبة

شافاهم وهز رگبته .. بس راد يسحب جربته

شردوا رعب سطر سطر .. گمر گمر

===============

سيد شارته اتشوّر .... وابو فاضل عبد صالح

الطايح من خزرته ايگول،طلعت امن الحرب رابح

چفتهم چفتت الكردوس ،،من يچفت عله الطايح 

العرف والمو عرف صاحوا .. توجع ضربة المالح

والوگفوا ابجيّتْ البطل .. بيهم انحسبوا عالنخل

جردهم احساس البشر .. گمر گمر

=============

ارتجل والحومة صنتت صوت، وبس البيرغ ايكبّر

سد الطف ابو فاضل .... وابن امة البعد يعبر

اليريد ايعرف بُعد الگوم .. يظل سنتين بس يشبر

جهامة وبخت هيبه وحيد ... زلمة امعتبر اتعتبُر

اختاض السبع گص الرگب

سيفة الهوة وهمة الگصب

داعيله گلب امة العبر .. گمر گمر

============

گطع حتى الضوة اعليهم.... مو بس گاطع ارگبهم

من گد الرجيف الجيش .. نسوا حتى اسم ربهم

يفل گام ابگفة انگابة ... بزغ وجهه ويشع طبهم

شَطُب حرف الخطأ عباس .. حالف الة يشطبهم

وكّر عله القادة الصگر .. والحرب مجموعة شعر

وعباس چان اسبك شطَر .. گمر گمر

=============

علي هادي الخزعلي

#اللهم_عجل_لوليك_الفرج

القصيدة 47

لمولاي العباس محرمـ #نزال

فزاعية لمولاي العباس علية السلام.. 

شيخ الشريعة ـــــــ مترهــي طبها 

الجيش بيمينة ـــــ سبحة ويفـرها 

ـــــــــــــــــــــــــــــــــــــــــــــ

خرزة أعلى خرزة الروس صارت بيدة 

وبكيفة يختار اليگصة يريدة 

مرتين مرات اليموت يعيدة 

يستنگي ياهو الزين منها يفيدة 

(( ياخذ خيرة بالــرووس يطگ  )) 

ـــــــــــــــــــــــــــــــــــــــــــــ

صاحب مظيف وخير أبن الساده

شيخ ويعزب لليضيفة بزاده

بعيونة يقرة الضيف شنهو مراده

ولمن يهد يختار وين القاده

((  خشنة الصيدة يختار الحر  )) 

ـــــــــــــــــــــــــــــــــــــــــــــ

عباس يكتل بالوجـة و أخيالة 

وبالعركة ما واحد يصير گبالـة 

محسود من يمة الشرد هنيالة 

تفصالة شيخ ويانعم تفصالة 

((  سيف و شارة شايل بالطف  )) 

ـــــــــــــــــــــــــــــــــــــــــــــ

مـترهي هذا الجيش مو بحسابة 

ولايسووه جرت سيفة من گرابة 

كوون اليجرد سيفة يسووى طلابة 

وتستاهل يسرفن عليها ثيابة 

((  راعي الغيرة للكلفة إيطب  )) 

ـــــــــــــــــــــــــــــــــــــــــــــ

للمشرعة يطب سفرة ما چَن حومة 

ولا چَـنها من سبعين ألف ملزومة 

كشاخ حتى بعركـــة حلووة هدومة 

سيفة الگمر والرووس كلها نجومة 

((  ويتخير لـو طبها بكيفة  )) 

ـــــــــــــــــــــــــــــــــــــــــــــ

عباس بحساب الكفر مو واحد 

من كل مچان يشوفــة كلمن شارد 

بيها يتفاخر منة كلمن لابد 

مو هَلّ مبارز صاح هَل من زايد 

((وليهسه و محد گال أنا  )) 

نسألكم الدعاء 

ابو سجاد البزوني

#اللهم_عجل_لوليك_الفرج

القصيدة 48

لمولاي العباس محرمـ #نزال

(((شجاعة ورجولةّ ابي الفضل) ))

طلع وانتـرست الدنـيا بساتـين

حي الله ابو فاضل نخوةّ حسين

                           **************

راكب عالمهر مدري بسفينه

هذا شراع لو رايه بيمينه

ماجت وأَطبگ الطف بالمدينه 

الهوه والگاع مدري الناس ميتين 

حي الله ابو فاضل نخوة حسين 

                           **************

تهب الريح مدري مهرته تهب

تَنَگب والگمر ياناس محرِب

ضل يشيل بيده الخيل ويذب

حوطهم ودگ سور وحياطين

حي الله ابو فاضل نخوة حسين

                           **************

عنوان البطوله والرجوله

هوهَ الراح موهمه الأجوله

شو گدامه ركضو شنهي ذوله

الفوارس گامت تنادي الدرب وين

حي الله ابو فاضل نخوة حسين

                           **************

الهوه ضل ينبعث من ريشةّ الطاس

الريشه تميل مدري يميل عباس

بجربته ضل يعبي النهر والناس

مو بس نهر واحد جاب نهرين 

حي الله ابو فاضل نخوة حسين 

                           **************

نوبه يصفهم ويحسبهم انوب

على صفحه يروح الثوبه مذبوب

الماتايب گبل ميفيد ويتوب

قيامه وضل يحاسب بالقوانين

حي الله ابو فاضل نخوة حسين 

                           **************

موبس موت شايل قمةّ الموت 

ومن يحجي تخضر الگاع ياقوت

كلها مدنگه ياهو اليگدر يفوت 

سلطان وطلع من السلاطين 

حي الله ابو فاضل نخوة حسين 

                           **************

مبهوره السمه من يصدر احكام

يحكمه اعدام كلمن شاف الخيام

النخل خايف ودنگ من الاعدام

حرب راضعته يمكن أم البنين 

حي الله ابو فاضل نخوة حسين 

   عبد زينب

 محمد الابراهيمي

#اللهم_عجل_لوليك_الفرج

القصيدة 49

لمولاي العباس محرمـ #نزال 

ريشاتةشركت سيف ابوه الذوالفقار

وهاي العلامة الناس تعرفهة انتصار

ايسمونة راس الحار لاكن كلة حار

ليث الحرايب..عباس

كبش الكتايب ..عباس

ــــــــــــــــــــــــــــــــــــــ

عباس يحتار الوصف من يوصل الشخصيتة

موروث روحية علي ابنفس الضبط روحيتة

تربيته خاص امن السمة ونازل وحي ابتربيتة

وعباس حار من الزغر مدري اختة  شمحاجيتة

ارد اعرف اخت الهاشمي محاجيته بيش

من زغرة مايعند فرد واحسابة جيش

استفهام حيرة احرورتة اشكد بيه ليش

من العجايب ..عباس

كبش الكتايب..عباس

ــــــــــــــــــــــــــــــــــــــ

عباس اصفه من العذب شايل نقاوة نية

عايش حسيني الهوى جيف اختة وسط الرية

هزت جذع مريم نبي وهزت علي البدوية

وخلفت سبع الكنطره وسبع الكرة الارضية

عيسى ابن مريم معجزة واحياله ميت

وعباس احية الخوة من ماتت لكيت

بل وجعلنا من الماء اتمعنيت

قول الله صايب..عباس

كبش الكتايب..عباس

ــــــــــــــــــــــــــــــــــــــ

من وجعلنا اتفهمت ماتعني هاي الايه

وتكليف سكاي الخدر توجد رسالة بهاية

خدر الله وردات النبي وجان المعيش ابماية

والهذا زينب شامخة من جان راعي الرية

والشمر جان ايصيح بالطف ماكو ماي

وحسين جان يردلة عباس بكفاي

وانتم كطعتو ارواحكم من كلتو هاي

تدروني جايب..عباس

كبش الكتايب..عباس

ــــــــــــــــــــــــــــــــــــــ

استأذن حسين اوكبل لايمشي كل لحسينة

طالع اجيب المشرعة ودك صدرة يروي اسكينة

طب الحرب واهس علي امخلي العقيلة ابعينة

دار الجمع دور الرحة وطشر شمل سبعينة

ابسبعين الفهة ايشيل ويطش ويشيل

وغيمت الحومة وصارت امجادح صليل

والماي كلة ابشاربك طايح دخيل

طب جودة تايب..عباس

كبش الكتايب ..عباس

ــــــــــــــــــــــــــــــــــــــ

اويه الماي اله موقف كلف منه اوكف يم حدة

بعباس ضن يكصي العطش والحل يضل بس عدة

وعباس اجه وشالة وفرح بس ردة سطرة بخدة

والماي لا لون وطعم ضل من سرعتة ابردة

اتفاجئ وكلة اشربني تعرف مو حرام

بس كله لا خاطر تضل درس احترام

خليني عطشان انه فايز بالختام

سوة الغرايب..عباس

كبش الكتايب..عباس

ذوالفقار الزيدي

#اللهم_عجل_لوليك_الفرج

القصيدة 50

لمولاي العباس محرمـ #نزال 

ميمر

خدر وظوه// كعدو سوه 

خايف وكف// حته الهوه 

لخته ابتسم راعي الجود _ من قدمتله الرايه 

◇◇◇◇◇◇◇◇◇◇◇◇◇◇◇◇◇

سجدت شكر ضل ساجد آمن الفرحه 

كاشخ ضواه اعله النهار وصبحه 

بكل معركه يعرفونه ظامن ربحه 

فر النهر بجفوفه مثل السبحه

هيبت علي // اليشبه علي 

كال النهر // مسجل الي 

تعرفونه بسم العباس _ شاطي الفرات ومايه 

◇◇◇◇◇◇◇◇◇◇◇◇◇◇◇◇◇

شاف العطش وازه خيم مولاته 

الحد الزند كفاهن ارداناته 

بخد الزلم ضل تنسمع صطراته 

لرض النجف ضل يوصل بصولاته 

العسكر شرد // صوب النجف 

وبجربته // طب وغرف 

صورة احسين اعله الماي _ صارت الوجه مرايه 

◇◇◇◇◇◇◇◇◇◇◇◇◇◇◇◇◇

بوجه الحسين امكحلات اعيونه 

جفيت الساده الكمر بمتونه 

من كل عقلكم غاضب ايلاكونه 

عباس ابو الغيره تره يسمونه 

طب كربله// ناذر نذر 

يرفض ابد // يعطش خدر 

تشهد لهسه الفرسان _ بكربله سوه سوايه 

◇◇◇◇◇◇◇◇◇◇◇◇◇◇◇◇◇

من حشمت زينب يعم الساده 

جاب النهر للخيمه وفوكه زياده 

ظل يسحك برجله اعله روس القاده 

سبعين الف من طبهه سوه الراده 

شاطي النهر // روس انترس 

شاف الشمر // شيله لبس 

ذيج الزلم من شافوه _ ماتسمع الهه حجايه 

◇◇◇◇◇◇◇◇◇◇◇◇◇◇◇◇◇

كعدو سويه وسولفو عالقادم 

دك صدره الهه وكلهه زينب خادم 

بخوتنه باجر سمعي تحجي الوادم 

فدوه العمر بس خدرج يضل سالم 

خادم انه // لبت فاطمه 

سيفي طرد // شر الظمه 

خل يطمئن كلبج حيل _ وفرشيلج امصلايه 

تمت _علاء الزيدي

#اللهم_عجل_لوليك_الفرج

القصيدة 51

لمولاي العباس محرمـ #شور

يا سيد الماي اللذي عطشت عَذب روحه

ويمّك نهاية خادمك لو زادت اجروحه

شفتك على مرّ الزمن مَنبع شكو غيره

بعين البَصر نورك فلا يگدر حچي يلوحه

انّه يا مالك رگبتي ابقه بس بحمّاك

رأي ماله العنده مثلك رايي بس وياك

شلي بالنجمه الزغيره وعندي ابو الاقمار

كافل اليخدم حبيبه سيدك سماك

يا ابا الفضل

سيّد الماي... عباس

بضيجي وياي... عباس 

ابقه عبدك ما اخونك وانته مولاي... عباس 

راعب الطف... عباس 

صاحب الچف... عباس 

يا ابو روحي ومالك امري وبيدك الراي... عباس

ابو فاضل يا ابا الفضل 

(١) 

صايد شواهين العَرب يا نبلة الخزره

يل بل عرش اسمك صبح عين امك الزهره

ماكو بشر بس الگمر حيّر ملاك الموت

راعي الزلم بس التخط رجله على مهره

سيدي الشلّع رسنها لو لكدها ابغيض

ترّس گلبي حب غمرني وحُبه بالدم فيض

رحمته غطت اچتافي وخيري من الكفيل

هوه بس يمه عرفته شنو كضم الغيظ

يا ابا الفضل

فورة الدم... عباس

للضعن عمّ... عباس

يم عطر جوده اگضّي هل عمر شمّ... عباس 

ابقه اندب... عباس

سيد الحب... عباس

عمري كله ناذرّه لحامي المُخيم... عباس

ابو فاضل يا ابا الفضل

(٢) 

كحلة مُخييّم نضّرتك يا حامي خدر الله

وبشاربك عبدك صرخ واعله البخت صلّه

دارت على معرفتك الدنيه ومنو بيها

وبيدك قميص الحب وآنه عاري بحچي الغفله

يا چريم الماكو منك رايد الُحب حياة

وأنته(رُبّان) السفينه البيها سرّ النجاة

اوزعني اشكرها نعمتك والشُكر يا كريم

هم شُكر ينراد لجله وسجده اله وچم صلاة

يا ابا الفضل

منهو شافك... عباس 

وانته طافك... عباس 

چم مَلك من العرش لثموا شفافك... عباس 

يا عشيره... عباس 

كلها غيره... عباس 

من فگر روحه اللذي بالضيجه عافك... عباس 

ابو فاضل يا ابا الفضل

(٣)

يا غيث ما مَسّ الأرض بس غرگ الدنيه

والسانك اتعود على هل حاجه مگضيه

خَلت( الحُر) من الذَنب يصبح بخت لنصار

يا نضرتك چلمة بخت تعدل حچي النيّه

طامع ابجود اخو زينب والعبد حلمه دوم

يرضي مولاه حته بخته بزود ربه يدوم

انته متفضل عليه وابسفرتك اشوف

عرضت اچتافي وحسافه ارفس النعمه يوم

يا ابا الفضل 

رب نعمتي... عباس 

وبي صفنتي... عباس 

من اشوفه هوه بس مصدر خدمتي... عباس 

عم رقيه... عباس 

للزچيه... عباس

أصبح اسمه مقلة الزهره ودمعتي... عباس 

ابو فاضل يا ابا الفضل

(٤)

اشكبره البخت لو بالحلم شفتك يمولانه

ابزودك الخادم من صبح عالي وعلّه شانه

نضرة رأفتك سيدي اتغطي الگلب والروح 

وبيك اليقين انته اللذي ترزقنه مبچانه

أنبياء الباري كلها بغيرتك تستغيث

نوح، آدم، ابن مريم، يوسف، وحته شيثّ

امغطي حته املاك ربنه بالنِعَم يا كريم

انته الاتزخ غيرة عُظمى، والخلگ بس نثيثّ

يا ابا الفضل 

حامي گلبي... عباس 

هوه حبي... عباس 

جدمي ما يزلف اريد الخدمه دربي... عباس 

شكبره بختي... عباس 

لو غربتي... عباس 

يمك اتصير وعيوني لدربه تربّي... عباس 

ابو فاضل يا ابا الفضل

صدر الدين

#اللهم_عجل_لوليك_الفرج

القصيدة 52

لمولاي العباس محرمـ #شور

#فزاعي 

ابعَمود او سيف يختي ... هشّموا راسه 

وگع يم النهر ودمومه تتجاره 

گطعوهن جفوفه الناس غداره 

من هسه كفيلچ راحت اخباره 

راح الجان تلفن دوم بكْتاره 

وچفوف اخو زينب... هوّسوا بيهن 

.

.

شفت حال الكفيل اشلون من شفته 

صدره اسهام ذيچ اعداه تارسته 

شفت زلْم او خيول اهناك ساحكته 

مامش كل كتر بعضاه عايفته 

من كثر السحگ .. ضاعت معانيّه 

.

.

اكْعَدِتْ يمه او لكيت اعيونه عميانه 

يزينب ما عرفني اليمشي بدمانه 

كتله احسين اخيّك آنه يلوانه 

راد ايگوم بس اعضاه ذبلانه 

اول مرة خويه .. ايگول بلسانه 

.

.

طحت ودموعي تجري او حيل ما عندي 

راح الجان حيلي او قوّتي او سدّي

كتله اشلون ترضاها آنه أضل وحدي 

او هاي الناس كلها اتحاشمت ضدي 

راسي اخلافك اعدانه ... يكطعونه 

.

شِلْت الكافل او لاچنّه ما ينلم 

كتله انرد يبيرغنه للمخيّم 

بچه ودموع عينه تجري بس من دم 

كال احسين ما بيّه آنه ارد تِعلَم 

بلا ماي او جفوف ...اشلون ارد ليهن 

.

.

فاضل عباس الخزاعي 

#اللهم_عجل_لوليك_الفرج

القصيدة 53

لمولاي العباس محرمـ #شور

#شجاعة

عباس گاضي الكلفه و الـملزومه

تبرد الحومه وچفه تحمي الحومه

هذا ابن حيدر و ابن گلاع البوب 

مثل الشموس الواضحات اعلومه

خيالهه    و ريالهه       شيخ المحربه الضغور

بچفوفه  من تشوفه     يعصــر البيده وتزغر 

ــــــــــــــــــــــــــــــــــــــ

عباس شيخ و سيفه سيف الساده

هاشم بچفه و چفه بيها امجاده

عَدّو الجيش و عَدّو وياها الخيل

مـا يكفي  للـعبـاس كــل تعداده

من عينه   ويمينه   ضلت تلوب الساحه

بالرايه     دگ ثايه   ويلمع بچفه سلاحه

ــــــــــــــــــــــــــــــــــــــ

من خزرة عيونه العـساكر تجـفـل 

و يتيه دربـه المبـتعد و الـمجـبل 

هذا ابن هاشم والطواري الخشنات

من يحل سيفه الموت معناهه يحل

بعيونه   يشوفونه      يصيد الطريده التجفه 

طاريها   راعيها          علـوم المـحربه الـكلفه

ــــــــــــــــــــــــــــــــــــــ

حچاي وحده  و ما يثني بسيفه 

من شيخهم لو يهوه ياخذ حيفه

زلمة هله وما دار وجهه من الضيف

جاله السهم بعيونه گَـعّد ضـيفه 

 رداهه    و ساواهه      بالحومه عجت هوسه

الما شافه   ماعافه      معناهه خيله اتـدوسه

ــــــــــــــــــــــــــــــــــــــ

عباس من چفه الشرد هنياله 

مبخوت كلمن ما تلوحه شماله

محد بيومه يموت يم العباس 

عباس يمه الموت باليحلاله

بالحومه       معلومه      سيــف الكفيل شسوه 

عل عسكر  ضل يفتر     حي الله راعي النخوه

#نزال_للعباس_شجاعة

#ابو_نوح_الكناني

#اللهم_عجل_لوليك_الفرج

القصيدة 54

لمولاي العباس محرمـ #شور

جندل أحيود الزلم سيفه إيذبح

من حليب امه وغده يعرگ ملح

هذا ابو فاضل طلع ياهل ترى

 عالصبح وجهَ غده يطلع صبح

رف ضميره وشاربه    ورفع بيرغ حاجِبهَ

وحدد خيام الخدر      ودگ مخيم زينبه

 بكوسر عيونه گعد هيبه الخدر 

وشد على ضهر الهوه سرج الشگر

وضكت الدنيا رعب من خزرته

تسمع الرمشه اذا بيهم يمر 

يبو فاضل...... يعباس

                           **************

وانحنه أگبال الهُدى حسين ودنه

ورعدت ضلوع الگمر من انحنه 

انه عبدك والعبد يطلب أذن

ناوي اركضهم سنه تتبع سنه

الدنيه رجفت سمعته       راح ينشر رايته

ومد يمينه عله الشمس   راح تبدي صولته

والهوه  (زَمّ)  الهوه لاينجلي

مره حيدر يصبح ومره علي

يطوي حته الگاع ضل بصرخته

مابرد والمهره ضلت تسطلي

يبو فاضل...... بعباس 

                           **************

عالشريعه عَزَمّ بزوده يمر

والنخل ضل ينقلع من الجذر

والنهر ضم روحه بعيون الجرف

والجرف من النهر ضل يعتذر 

عيده من يبدي العرچ     والگمر مايندرچ

المهره صاعد لو هوه ضل يكور وضل يرچ

عَيَتّ الطف وانتفض مثل الأسد

وبعثر صفوف العده يروح ويرد

اليركض أگباله انمرد من السحگ

ضل يصيح ويفخر بزينب مدد

يبو فاضل..... يعباس

                           **************

وأبو اليمه يعاين وضل يبتسم 

يشاهد العباس ضل بيهم يلم 

ضل يطير اعله الزلم مثل الصگر

وهيله ضل (يشبخ)عله ضهور الزلم

وابتسم من شاهده     راكب ضهور العده

وينفخ بصور السمه    والحشر يمكن بده

من جماله وهيبته يخر السعف

رَكضّ الفرسان لحدود النجف

مثل طر البايده بيهم يطر 

الزلمه بيهم هوه وحصانه رجف

يبو فاضل......... يعباس

                           **************

طفه ضويات الحرب من السمه

والشعار يصيح ثار الفاطمه

اليوم اخلي ضلوعهم تشبع كسر

غير أنه المضموم بس للموزمه

 

ونحدر بيهم ضرب      ضل يوكلهم ترب

موصعب چلمه وتمر    لاصعب من الصعب

وشَمـر الچَـفـيه ورتــاح الــهوى

تلاگه وي حسين وانطش الضوى 

يگله بعد امي يَفَراس الوغى

والگمر وي الشمس صارو سوه

يبو فاضل..... يعباس

     عبد زينب

 محمد الابراهيمي

#اللهم_عجل_لوليك_الفرج

القصيدة 55

لمولاي العباس محرمـ #نعي

▪️قصيدة العباس (ع) لهذه السنة

واضيعتنا بعدك يا أبا الفضل ..

أمرُرْ على جدَثِ الكفيلِ وَقُلْ لِقِربَتِهِ الرويّهْ

يا قِرْبةً تسقي الحياةَ مكارمَ الكفِّ النديَّهْ

ما طابَ شربٌ بعدَ رميِكِ بالسهامِ الحرمليهْ

تلكَ السهامُ رمَتْكِ أمْ رمَتِ النبوَّةَ والوصيَّهْ

وبعينِ عباسٍ ثوتْ أمْ عينِ فاطمةَ الزكِيَّهْ

نظروه مقطوعَ اليدينِ فغالَهُ إبنُ البغيَّهْ

وعلاهُ بالعَمدِ اللئيمِ يشجُّ هامتهُ العليَّهْ

فهوى ينادي : يا أخي  عجِّلْ فقد دنتِ المنيَّهْ

"كالرمحِ" أسرعَ إذ يرى العباسَ "درعَ" الهاشميهْ

ملقَىً عليهِ تشابكت بيضٌ وسمرٌ سمهريَّهْ

"كالقوسِ" أحنى ظهرهُ ودعا بآهاتٍ شجيَّهْ

الآنَ جُذَّ لهــاشمٍ عرنينُــها بِشبا أميَّهْ

الآنَ شُتِّتَ عسْكريْ وكُسرتُ يا كبشَ السَّريَّهْ

مَنْ لي إذا شمرٌ جثا فوقَ الضلوعِ الأحمديَّهْ ؟

منْ لي إذا جالتْ عليَّ العادياتُ الأعوجيَّهْ ؟

مَنْ للحمى مِنْ بعدِ عينِكَ يا فتى حامي الحميَّهْ ؟!

مَنْ للعقيلةِ حينَ تدعوها الخوارجُ خارجيَّهْ ؟!

مَنْ للعزيزةِ وهْيَ تُسبى فوقَ أعجافِ المطيَّهْ ؟!

مَنْ لابنة الهادي إذا أخذت إلى الطاغي هديَّه؟!

مَنْ ذا سيقطعُ كفَّ رجسٍ سالبٍ قرطَيْ رُقيَّهْ ؟!

حتى إذا نزلَ القضاءُ ارتجَّ وادي الغاضريَّهْ

وأتى النبيُّ المصطفى يسقيهِ من كأسٍ رويَّهْ

فأبى ولمْ يشربْ قُبيلَ أخيهِ ذو النفسِ الوفيَّهْ

أبكي الحسينَ مكفكفاً بالكُمِّ أدمعَهُ الجريَّهْ

فاستقبَلتْهُ شريفةُ الأشرافِ تسألُ ما القضيَّهْ

أأُخيَّ هلْ أنتَ الحسينُ ؟ تَرَاهُ شابَ منَ الرزيَّهْ

فأجابها رحلَ الحسينُ وعاد ظلاًّ يا أخيَّهْ..

اللهم عجل لوليك الفرج

أسألكم الدعاء

علي عسيلي العاملي

#اللهم_عجل_لوليك_الفرج

القصيدة 56

لمولاي العباس محرمـ #نعي

السيده زينب ع اتخاطب العباس ع

طلعت امن الخيم والـگـوم كلهه اتناشد اعليـه

ناس اتگول اخت عباس وناس اتگول مو هيه

تدنّتلي الزلم والـخـيـل وشفت واحد يصد ليه

عرفني اختك يبوفاضل وبيدي مسويه بوشيه

گـلـتـلـه انه الكفلني الحيد نكرني وگـال ياهيـه

        جــهــل قــــدري وضـحـك يـمـي 

        ويـگـلــي اصـبـحـتــي مـسـبـيــه

الحچي وضـحـكـاتـه اذني واحسنهن رمـح بيه

تـمـنـيـت الزمن يرجع وتصد بالعين الي اشويه

       واشــوفــن بـيـرغــك يــصــفــگ 

       واشوف الحرم كلهن بيك محميه

هـاي بيا وگـت صـارت الغريب ايشوف علويـه

         

 ✍️بقلم خادم الحسين ع

     الشاعر رعد الجريخي

مصدر القصائد قناة  قصائد محرم على التليجرام وهذا معرف القناة 

https://t.me/ammeer16

#اللهم_عجل_لوليك_الفرج