#قصائد_الامام_الحسين_ع
ليس بالضرورة ان تكون مقدمة
نمنه ابنص خرايب..ماعدنه گرايب
عود احنه الاميرات..ظلينه غريبات
ماعدنه گرايب
@@@@
ماكو واحد من اخوتي واشتكيله
الصار بيه من بعدهم مو قليله
طلعه الحرمه ويه غربه اشگد ثگيله
شلون انام بهالخرايب مستحيله
طول الليل اناطر..ليه اتصد نواظر
نسوان واسيرات..ظلينه غريبات
ماعدنه گرايب
@@@@@
الشمر خزراته سم وظل يصدلي
كافلچ گليلي وينه ظل يگلي
وبحقد ظل بيه يضرب من وصلي
ريت انه باللحظه ميته بموته اهلي
سوطه يطگ بالعظام..وانه احمي بالايتام
ياوسفه الگمر مات..ظلينه غريبات
ماعدنه گرايب
@@@@@
بس حرم واطفال بتنه بهالخرابه
من التعب اطفال نامت عالترابه
والحرم ظلت وحدهه ابلا گرابه
بس اكو وحده تنادي بابه بابه
تنادي ابدمعه العين..اريدن والدي حسين
مايرجع حرامات..ظلينه غريبات
ماعدنه گرايب
@@@@@
احنه ظلينه وحدنه ابلا عشيره
شفت اسيره ظلت تلوذ باسيره
والزلم تنظر علينه ابلايه غيره
اشگد چبيره دموعي تنزل وانه اميره
عشنه الغربه والخوف..ريت الكافل يشوف
دمعات اليتيمات..ظلينه غريبات
ماعدنه گرايب
@@@@@
ندخل ابديوان زحمه ابين اميه
وابحبل واحد يدخلونه سويه
واسمع الشماته تتجاسر عليه
صاحوا اعليه الغريبه هايه هيه
مابين اليشمتون..گدامي يضحكون
جابونه سبيات...ظلينه غريبات
ماعدنه گرايب
@@@@@
الخادم عمار الساعدي
ما شالله حلوات كلش بتوفيق الكم بس ريد بعد تنزلون شكرآ عله الطميات الحلوه💗💗💗👌👌
ردحذفعاشت ايدكم الحسين يحفضكم
ردحذفالحمدلله صرت ملاية
ردحذف