قصائد الهلال مكتوبة
قصيدة هلالية لشهر محرم الحرام
عاشور شهر الحزن
عاشور. نبچي ونون
مـن يهـل اهـلالك دمـوعـي تهل
اذكر حسين وهله الخلصوا چتل
٠•••••••••••••
من اشوف اهلالك يهل بالسمه
ياشهــر عاشــور گلبـي تألّـمـه
يعني زينب تنفجع وي فاطمه
وينفجع حيدر علي وسيد الرسل
٠•••••••••••••
ياشهر عاشور بيك شچم مصاب
بيك ذبحوا چم طفل وشچم شباب
وشافوا اهل البيت انواع العذاب
وهُمّه اصل الدين والحق والعدل
٠•••••••••••••
بعاشر ايامك يشهر النايبات
ذبحوا حسين السبط يم الفرات
وهشّموا صدره بخيول العاديات
وراسه عن جسمه برمحهم ينفصل
٠•••••••••••••••
وعلي الأكبر ياشهر بيك انذبح
چم سهم مصيوب جسمه وچم رمح
دم شبيه الهادي عالغبره انسفح
وأمّه تصرخ ياعلي ضاع الأمل
٠•••••••••••••••
وجاسم العريس ياشهر الحزن
بعزّ شبابه بعده وشموعه انطفن
چفوفه مو حنّة بدماها تخضبن
عرس جاسم حلم صار وماكمل
٠••••••••••••••
وبعد نذكر بيك عباس الگمر
ياشهر عاشور طاح عله النهر
هذا سبع الگنطره وراعي الفخر
گطعوا چفوفه وعله الشاطي انچتل
٠•••••••••••••
ياشهر عاشور ودموعي جرت
وسفه زينب عالهزل بيك انسبت
ميسّره وللشام والكوفه مشت
اخت عباس وخذوها عله الهزل
خادم الإمام الحسين عليه السلام
سيد زيد الفحام
___________________
▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁
القصيدة الرئيسية ليلة الهلال
لا لا تهل يهلال عاشور
بيك شكثر راح انظر نحور
بيك افگد خواني ........... وتهيّج احزاني
لا لا تهل يهلال عاشور
آنه زينب والحزن شمسوي بيه
عيني مانشفت ابد صبح ومسيه
بالله يهلال الحزن شلّك عليه
ذكّرتني بكل مصاب الغاضريه
ريتك غبت يهلال بسماي
فزّت جروحي وهاجت وياي
بدموعي عنواني ........ وتهيّج احزاني
لا لا تهل يهلال عاشور
شفتك بعيني وصحت ياروحي موتي
ابچي يهلال الحزن ابچي عله صوتي
شفتك وهاج الدمع لمصاب اخوتي
عذبت گلبـي بصيـاحي وبسكـوتي
مصايب اخوتي تهدّ الجبال
منهـن تغيّـر حـــالـي يهـلال
بجروحي تلگاني............ وتهيّج احزاني
لا لا تهل يهلال عاشور
ذكّرتني بمصرع حسين ومصابه
گبالي ذبحوه وشعر بحاله وعذابه
عالرمح راسه انرفع ينزف خضابه
بخيل سحگوا جثّته وسلبوا ثيابه
بعيني انذبح يهلال شفته
ولمن رحت مسلوب عفته
ومصابه بچّاني .......... وتهيّج احزاني
لا لا تهل يهلال عاشور
شفتك وراح الگلب صوب الشريعه
للكفلني وطاحن چفوفه الگطيعه
بطيحـة العبـاس يهـلال الفجيعه
ذبحوا حسين العده وذبحوا رضيعه
وآنه انسبيت وخدري سلبوه
وخلافه متني بسوط ضربوه
محتاره خلاني. .......... وتهيح احزاني
لا لا تهل يهلال عاشور
وبعد يهلال الحزن اذكر مصابين
مصاب الأكبر من وگع مابين صوبين
وجاسم العريس طرّوا راسه نصين
حنّتـه يهـلال صـارت دم الايديـن
عندي شبعد يهلال خليت
المن تهل ياريت ماجيت
وعتابي اذّاني........... وتهيّح احزاني
لا لا تهل يهلال عاشور
والاشد من هالمصايب هالرزيه
من رحت يهلال عالهزّل سبيه
دخّلوني لمجلس يزيد آل اميه
عگب اخوتي يزيد يتشمّت عليه
بمجلس يزيد وتنظر الناس
حچي الشماته شيّب الراس
فرحانه عدواني .......... وتهيّج احزاني
لا لا تهل يهلال عاشور
خادم العقيلة زينب عليها السلام
سيد زيد الفحام 20/6/2017
_____________________
▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁
قصيدة هلالية لشهر محرم الحرام
طورها ملا باسم
آه يحسين ومصابه
قصيدة هلالية
نزله
طورها ملا باسم / آه يحسين ومصابه
آه يحسين ومصابه
ياشهر الحزن ياشهر المحرم
هيّجت الألم بيه وكتلني الهم
آنه ام الخدر زينب يشهر النوح
اصد لهلالك بعيني ودمعها يفوح
ذكّرني بجروحي هلالك المجروح
گلبــي بشوفتــه عذّبتــه وتألّم
گلبي بشوفتك ذاب ونزف دمه
ذكّرني بحبيبي حسين ابواليمه
گطعوا نحره ضامي وسلبوا جسمه
راسه عله الرمح مرفوع يگطر دم
عسه هلالك يغيب وعيني متشوفه
ذكّرني بچفيلي وگطعت چفوفه
رحت عنه بسبي وبحبال مچتوفه
من ماي الفرات بلا ذنب يحرم
وبعد اذكر القاسم من وگع مصيوب
تحنّه بدم وريده والوجه مخضوب
شباب بياجنايه وياذنب مطلوب
يشهر محرم وكل جسمه يتخذم
بعد ياجرح اذكره وياجرح انساه
جرح عبدالله لو جرح السبي وبلواه
اصيـحـن آه منـك ماتـفـيـــد الآه
يشهر محرم وجرح السبي اليلچم
عسن عيني انعمت لا شفتك بعيني
يشهـر محــرم بيـاحـــال تلفيني
تذكّرني بأخوتـي ومن يسلّيـنــي
عله فراگ اخوتي ابچي واون ولطم
خادم زينب عليها السلام
سيد زيد الفحام
____________________
#قصيدة_رئيسية
هل الكلمه ابشفاهي شكرا ياالاهي
هل محرم وانه عايش باالوجود
ابجي لحسين ولبست اهدومي سود
*
الاهي اتشكرك وادري الشكر واجب
اعيش الهل السنه ياربي ماحاسب
للمجلس اصدن والدمع ساجب
من اشوف من اخوتي اشجم واحد الغايب
لبسو بيض الهدوم برض المكبره اليوم
باالمكابر راحو الجنهم ورود
هل محرم وانه عايش باالوجود
*
عايش هل السنه والدمعه اجريها؟
وزينب عاالمصايب راح اواسيها
والرايات فوك الدار اخليها
وعلى امصاب الحسين الناس ابجيها
نعمة هل المواساه اكبر نعمه والله
والاجر بيها ابد مابي حدود
هل محرم وانه عايش باالوجود
*
محرم هل عليه وعايش بهل العام
واحضر باالمجالس اخدم الخدام
واشوف الناس من اتعلك الاعلام
لمحرم جنت اعدن واحسب الايام
عيني امحضره دمعات لجل الزينبيات
اه كل الاه من طاري القيود
هل محرم وانه عايش باالوجود
*
انه لصينية القاسم جبت شمعه
وجبت ماي الورد والحنه والدمعه
احس رمله اعله ابنها تطلم وتنعه
شباب ابعز شبابه وباجر اتودعه
ام وتودع ابنها شتصور حزنها
وهيه رايدته ذخر تالي الها عود
هل محرم وانه عايش باالوجود
*
ياليلة السابع من اعيشنها
نسمات الوفه من بعيد اشمنها
النفس لوينضم انه بصدري اضمنها
واكصد راية العباس اقبلنها
عطر الخوه موجود ليلة صاحب الجود
هل العطر لاوالله ماينقص يزود
هل محرم وانه عايش باالوجود
*
سعد العبودي
#قصيدة_نزلة
هلالية شهر محرم الحرام
...............
شدو همتكم شباب
عاود أهلال المصاب
عاد عاشور أولفتنه أحزانه
حسين مذبوح أبجبد عطشانه
................
هاي أول ليله من شهر البله
يسكت العالم أوتحجي كربله
للنبي المختار ولعقد الوله
صوتنه أبهليوم خلو أنوصله
الغايه من هلصوت
شيعه حد الموت
أبحسره واحدنه هتف وجدانه
حسين مذبوح أبجبد عطشانه
................
الليله ليلة فاجعه أبدمعه أوقهر
خل نترجم شوكنه أوننطي عبر
لو جبال أتسير ويزبد بحر
الكربله عدنه تظل وجهة نظر
لو تصير أطفوف
ما يهمنه الخوف
أبدمنه نتحده الظلم وعوانه
حسين مذبوح أبجبد عطشانه
.................
الليله هل أهلال عاشور الألم
حكهه هذا اليوم تتباره الخدم
الخدمة المخدوم وتسطر قيم
حسين ماي العين يرخصله نعم
حسين أبو السجاد
كعبه الهه أبعاد
ابحبه هنياله الختم عنوانه
حسين مذبوح أبجبد عطشانه
................
يلا شدو الهمه مجلسكم تره
الزهره يا خدامهه بي حاظره
تسجب الدمعات لو ناعي قره
والندب يحسين تجبر خاطره
الزهره هذا اليوم
يبني يا مظلوم
تنحب أومنهه النفس خلصانه
حسين مذبوح أبجبد عطشانه
..............
فوك رمضة كربله طاح النجر
أوسهم المثلث صفه أبلب الصدر
فوك صدره أتربع أبحيله الشمر
هلو دمع العين للدمعه أجر
كل دموع العين
عد أمير حسين
أمسجله أوكلمن ندب بلسانه
حسين مذبوح أبجبد عطشانه
................
خادم أهل البيت
الشاعر : أسماعيل الجوراني
الأربعاء : 29/8/2018
#قصائد_الهلال
#قصيدة_رئيسية
ــــــــــــ◐◐◐◐◐◐◐◐◐ــــــــــــــــ
يالهلال...بسك من الأمي
يالهلال...سوده كلهه أحلامي
......
هون وكافي المذابح يالهلال وانتضر
بعده أبو فاضل رميه طايح بصف النهر
يالهلال متوني زركه وجاي اشوفنك شمر
كافي من جروح زينب وجم خواطر تنكسر
بيه جم دمعه وألم وبالخواصر جم سهم
منك منك
نامت بروحي المحن وصطره بيه من الزمن
منك منك
بعد وين...بس حزن أيامي
يالهلال سوده كله احلامي
*
لا تمد ايدك عليه وتلجم جروح الگلب
ماتشوف البيت خالي وين اروحن وين أطب
عيسى صلبو مره وحده وأنه كل لحظه انصلب
بكلشي اشوف رسوم اخيي حتى بالماي الشرب
بذكرياتي ادولبت انت ماتدري متت
كافي كافي
بعد مااصبر ترى كلشي أشوفن منحري
كافي كافي
ترى النار...الهسه هم بخيامي
يالهلال...سوده كل احلامي
غمض عيونك بهيده ولاتفك عينك الي
هو أنه شباكي عندي خلصو كلهم هلي
يامحرم خذت كلشي حسين اخوي وكافلي
وحتى عبدالله أخذته وجاسم اليشبه علي
وحتى الأكبر منذبح بجسمه بايت جم رمح
بويه بويه
والعليل من اختنك كوه جا هم احترك
بويه بويه
الهجر حار.. لا تمر كدامي
يالهلال...سوده كله أيامي
**
بالهزل گلبي كطعته والدرب ماينحمل
حتى حبلي البين اديه كام من عندي يمل
ذكريات الطف عدتهه گامت عيوني تهمل
فرهدونه وانت واكف وطشرو بينه الشمل
انت تسئلني منو بيك رايحلي أخو
انت انت
انت يهلال الكدر بيك مكسورة ظهر
انت انت
والحسين..هم ذبح هم ضامي
يالهلال...سوده كله أيامي
عبد زينب
محمدالابراهيمي
#نعي
مع هلال محرم وفاء لأمي ولكل الأمهات النقيات الطاهرات الذين غرسوا فينا الولاية ورعوا ثمارها ...
أمي چانت تلبس اسود
من يهل شهر الحزن
وينكسف مبسم وجهها
وتجري الدمعة بشجن
تقلّي لاتضحك ييمه
واسي قلب ام الحسن
وتبچي والحسرة بقلبها..
آه يمصاب الحسين
.......
أمي من يقرَب محرم
چنها مو أمي تصير
چنها أم سكنه ورقية
وام لـعبدالله الصغير
قلب أمي في الولاية
قلب ينلفّ بحرير
إلها مديون بولائي
لاهل طه الطاهرين
.....
من يهل عاشور أمي
الماتم الها يصفى دار
وتلبس ثياب الخدامة
تواصل الليل بنهار
لاهو إلزام بوظيفه
ولاهو مربوط بقرار
هوّه بس حبها المحمد
واهل بيته الطيّبين
.....
امي طينتها النقية
تنتفض حزن وألم
من يقول القاري ردّالـ
ـمهر خالي للخيم
تنادي وي حمزة الصغيّر
والدموع احسبها دم
"قلي يالميمون" وتبچي
لبنت امير المؤمنين
....
امي ما تطمح تسافر
لا ولا تروح و ترد
بس اذا تطري الزيارة
نحس قلبها ينمرد
ومن يحن قلب امي نشتم
شوقها ريحة ورد
ويمتزج عطر الولاية
بالدمع في الأربعين
......
أمي ما رضعتني بس حب
ولا عطت بس الحنان
أمي رضعتني الولاية
وسلمتني صك أمان
ارحم امي يا الهي
وارفع امي بالجنان
ويا اللي حبتهم محمد
واهل بيته الأكرمين
الشاعر علي الحمود
....
@@@
#الرادود_احمد_الزوار
#قصيدة_رئيسية
ام الشهيد تخاطب السيدة الزهراء (عليها السلام)
للمحرم كل مسيه احسب حساب
انتظر مثل الزجيه فاكـده احـباب
بالمجالس فرحتي**لمن تنزل دمعتي
ــــــــــــــــــــــــ1
صرت يامولاتـي مثلج كلبي لهفان
والعزه مثـلج ادوره وين مـاجــان
اباب الحسينيه يمج رايـده امـجـان
ولوقره الرادود انوحن عله الشبان
طلب واحد بس اريده لوتسمحـين
اعله كيفج ويه ضلعج من تلطمين
هاي اطلبج حاجتي**لمن تنزل دمعتي
ــــــــــــــــــــــــ2
مره كلبي بلاسبب حيل انعصر
كلت خاف بمشيته وليدي عـثر
حاضنه هدومه وابوس بالصور
كلبي لاجمني احس صاير قـدر
ماحمل كلبي يزهره طول الغياب
باقيه متانيتـه نمـت بـعتبت الـباب
اكضي ليلي بحيرتي**لمن تنزل دمعتي ـــــــــــــــــــــــ3
كلبج اعله ابنج يزهره إشصبّره
بكربله تعـلمين ينـحـز منـحره
انـه ابني مـن مـشه اتـنطـره
وعدل يرجعـلي جنت اتـصـوره
شلون كلبج كدر يحمل وانتي تدرين
ينسحك بالخيل بالطف راس الحسين
انه سهله مصيبتي**لمن تنزل دمعتي
ــــــــــــــــــــــــ4
ابني من مات اعرفت معنى الجرح
ومن اهدهـه مالي لـيـل ولاصـبح
دمـعتـج تخـتـلـف ابـنج مـنـذبـح
وشهر كامل راسه مرفـوع بـرمـح
ابنـي وي موتـه خواته اتفاخــرن
بس خوات حسين وي موته انسبن
بسبب ونج ونتي**لمن تنزل دمعتي
ــــــــــــــــــــــــ5
بالعلم من جابو ابني وشافته العين
كلت ابني صار ويه اصحاب الحسين
وهذه خادم الج كون انـتي تقـبليـن
ومن اشوفج بالقيامه عني ترضـيـن
رضعت ابني بحـليـبي خدمـتـج هـاي
ولوعطش يذكر حسين ويشرب الماي
هوه فخري وعزتي**لمن تنزل دمعتي
ــــــــــــــــــــــــ6
عباس البديري
#قصائد_الهلال
#الليله_الاولى
يهلال الاحزان يهلال الاحزان
___
شـــهر الدمـــع جاي ابچــــــــــي يـــعيناي
خنحــضــــــر النوح للماشـــــــــــــرب ماي
مو بــس الدمــــوع نكـســـــراله اضلــــوع
للخنـــــصره اهنـاك بالحــــومه مگطــــوع
يهلال الاحزان يهلال الاحزان
___
يا شهر المـــــــصاب ويــــــــــاك العـــتاب
خنزيد الدمـــــــــوع للضـــــــــل عالتراب
مذبوح الحســـــــين دم صــــــبي يا عين
ما نلگــــــه بالنـــاس مــــثلــه وأبد ويـــن
يهلال الاحزان يهلال الاحزان
____
ما يبطــــل النــــــوح مدمـــــعنه مسفوح
للعاري والــــــــــضال كل كتـــــر مجروح
نلطم عالصـــــــــدور غالينـــــــــه منحور
ونمشيله كــــــل عام نتعُــــــــــــنه ونزور
يهلال الاحزان يهلال الاحزان
____
ما نضـــُـــعف ابــيوم وابســــــــود الهدوم
لبيك كـــل حـــــــــين نهـــــــــتف يمظلوم
وي فاطمــــــه اعهود أي ولـــــــنطه ازنود
ثورة عــــــــشگ هاي ما تمنــــــــــع اقيود
يهلال الاحزان يهلال الاحزان
_
صوت الخدم صــاح نفــــدي الولي أرواح
من نبچــــي لحسين والزهـــــــــــره نرتاح
منـــــٕـــــعوفه باقين اشـــــما مرت اسنين
نعميـــــــــــــها والله مـــــــــن تبخل العين
يهلال الاحزان يهلال الاحزان
___
الخادم المقصر ناجي ابو كيان الصالحــــــي ونسالكم الدعاء لي ولوالدي
_رابط قناة التلجرام
https://t.me/ahmed_alziwar
تعليقات
إرسال تعليق